Luka 11

Mbaeɛbɔlɛ nwo ngyerɛkyerɛ

(Mateo 6.9-13; 7.7-11)

1Na ɔwale kyɛ, né Yesu wɔ nekaa bie ɔbɔ mbaeɛ, na oyiele nen, ye asuafoɛ nemɔ anu ko sele ye kyɛ, “Awurade, kyire yɛ mbaeɛbɔlɛ, kyɛbɔ Yohane koso ohyirele ye asuafoɛ nemɔ ne.” 2Na osele bɛ kyɛ, “Sɛ ɛmɔbɔ mbaeɛ a, ɛmɔhã kyɛ,

‘Baba [bɔ ɛwɔ nyameɛso so ɔ,]

Wɔ dumaa nwo ɔte;

w’ahennie ɔbra.

3Ma yɛ yɛ daa daa aleɛ daa;

4ná fa yɛ bɔne kyɛ yɛ,

ofikyɛ yɛ koso yɛfa ebiala bɔ ɔfõ yɛ ɔ ye deɛ yɛkyɛ ye.

Na nnɛfa yɛ kɔ nzɔhwɛ nu.’ ”

5Na osele bɛ kyɛ, “Yɛfa ye kyɛ, ɛmɔ nu bie ole obiɛngo, ná ɔkɔ ye berɛ abunnamu kose ye kyɛ, ‘Me damvo, fɛmo me paanoo nza, 6na mmiɛngo bie fi atee so wawa m’awuro, na aleɛ biala nne berɛ bɔ ngonya ngɔma ye ɔ.’ 7Na okobua ye kofi ye sua nu dɔ kyɛ, ‘Nnɛha me! Mato m’anoa nu, na me mma lela me nwo wa wɔ mba so, na mengɔhora dwɔso mengɔma wɔ nikyee biala.’ 8Na mekã mekyire ɛmɔ kyɛ, sɛ ɔte obiɛngo po a, ongodwɔso ngɔɔma ye huu, nakoso ɔnate edwanenɛ bɔ odwane ye nwo ne ati, okodwɔso kɔɔma ye bɔ ohia ne amukoraa.

9“Yiti mekã mekyire ɛmɔ kyɛ: Ɛ́mɔbisa, na bɛkɔfa bɛkɔma ɛmɔ; ɛ́mɔpena, na ɛmɔkonwu ye; ɛ́mɔbɔ nu, na bekobukye ɛmɔ. 10Ofikyɛ ebiala bɔ obisa ne, ye sa kã ye; na ebiala bɔ ɔpena ne, onwu ye; yeɛ bɔ ɔbɔ nu ne, bebukye ye. 11Ɛmɔ nu nwa yeɛ ɔte seɛ ná ɔwa bisa ye [paanoo a, ɔkɔma ye nyɔboɛ ɔ? Anaakyɛ obisa ye] tiré a, ɔkɔma ye ewoo ɔ? 12Anaakyɛ obisa ye kyiremvua a, ɔkɔma ye anyanyangyeleɛ ɔ? 13Na sɛ ɛmɔ po bɔ ɛmɔte bɔnefoɛ ɔ ɛmɔse kyɛbɔ ɛmɔma ɛmɔ mma mɔ nningyein paa a, ɔkɔyɛ sɛɛ bɔ ɛmɔ Baba bɔ ɔwɔ nyameɛso ne ɔngɔfa Sunzum Krongron ngɔma bɛ bɔ bebisa ye ɔ?”

Bɛto Yesu soen

(Mateo 12.22-30; Marko 3.20-27)

14Ɛlɛho bie, né Yesu otu sunzummɔne bie bɔ ɔte mumu ɔ. Na ɔwale kyɛ sunzummɔne ne tu fili ye nu nen, emumu ne dwudwole, na ɔyɛle ɛlɔen ne nwanwa. 15Nakoso bɛ nu biemɔ hane kyɛ, “Sunzummɔne mɔ panyi Beɛsebul tumi yeɛ ɔfa tutu sunzummɔne mɔ ɔ.” 16#Mat 12.38; 16.1; Mak 8.11 Yeɛ ebiemɔ koso besole ye bɛneane, na bebisale nzɛngyerɛnneɛ bɔ ofi nyameɛso ɔ befili ye berɛ. 17Nakoso ye de, né ɔse b’adwene ne ati, osele bɛ kyɛ, “Ahennie biala bɔ ɔne ye nwo ko ne, ogu; yeɛ awuro bɔ ɔne ye nwo ko ne, ɔbɔ. 18Na sɛ Satan koso ɔne ye nwo ko a, ɔkɔyɛ sɛɛ né ye ahennie agyina? Ofikyɛ, ɛmɔnwa Beɛsebul tumi yeɛ mefa metutu sunzummɔne mɔ ɔ. 19Na sɛ Beɛsebul tumi yeɛ mefa metutu sunzummɔne mɔ de a, né nzaade nwa tumi yeɛ ɛmɔ mma mɔ bɛfa betutu bɛ ɔ? Yiti bɛ yeɛ bɛkɔyɛ ɛmɔ ndɛenbualɛfoɛ ɔ. 20Nakoso sɛ Nyameɛ sa mmɛseka yeɛ mefa metu sunzummɔne mɔ a, né nzaade Nyameɛ ahennie ne anya awa ɛmɔ so.

21“Sɛ kwabranoa ole akodeɛ ɔwɛne ye awuro a, ye anwodeɛ nwo sonn. 22Nakoso sɛ ebie bɔ ye nwo yɛ se tra ye ɔ ɔba ye so ná odi ye so ngonim a, ode ye sa nu akodeɛ bɔ wafa ye nye wato so ne, na ɔkyekyɛ ye koɛ nu nzesadeɛ ne anu. 23Ebiala bɔ ɔbboka me so nen, né otia me; yeɛ ebiala bɔ ɔne me mmoaboa ye noa nen, né ɔsande nu.

Sunzummɔne sa ba ye si

(Mateo 12.43-45)

24“Sɛ sunzummɔne tu fi sona nu a, okokyinikyini aseɛ katerepee mɔ so pena nekaa bɔ okole ye nwome ɔ; na onnya bie a, ɔkã kyɛ, ‘Ngosa ngɔhɔ me sua bɔ mvili nu mmale ne anu.’ 25Na ɔba a, ɔbanwu ye kyɛ bapoapoa nu ná basiesie berɛ ɔ. 26Afei ɔkɔ kɔfa sunzum nzoo foforɛ bɔ bedi bɔne bɛtra ye ɔ ɔboka ye nwo so, na bɛbawura nu bɛtena berɛ. Na sɔ sona ne, ye asetena bɔ oli nziɛ ne te bɔne asetena tra daa ne.”

Nyameɛ dwirɛ nwo sotie ma saleɛ

27Na ɔwale kyɛ ogu so ɔkã edwirɛ hemɔ nen, braa bie bɔ ɔwɔ mmenia ne anu ɔ ɔteane nu sele ye kyɛ, “Koɛ bɔ ɔwole wɔ, ɔne nyɔfone bɔ ɛnone ne, banya saleɛ!” 28Nakoso osele kyɛ, “Bɛ bɔ bɛte Nyameɛ dwirɛ ne ná bedi so ne mmom yeɛ banya saleɛ ɔ!”

Ɛnɛmmafoɛ pena sɛngyerɛnneɛ

(Mateo 12.38-42)

29 # Mat 16.4; Mak 8.12 Na mmenia yɛle berɛ birikabirika nen, ɔhyɛle ye bo hane kyɛ, “Ɛnɛmmafoɛ te bɔnefoɛ. Bɛpena sɛngyerɛnneɛ, nakoso bɛngɔma bɛ sɛngyerɛnneɛ biala, sana Yona sɛngyerɛnneɛ deɛ ne ala. 30#Yona 3.4 Na kyɛbɔ né Yona te sɛngyerɛnneɛ ma Ninewefoɛ nen, sɔ ala yeɛ Sona Awa ne kɔyɛ kɔma ɛnɛmmafoɛ ɔ. 31#1 Ahe 10.1-10; 2 Abe 9.1-12 Ngwaen dɔ hemmaa ne, ɔne ɛnɛmmafoɛ bekodwɔso wɔ ndɛenbualɛ ne anu, na ɔkɔbɔ bɛ kwaadu, ofikyɛ ofili aseɛ noa dɔ paa wale ootiele Solomon nworɛ dwirɛ; na tie, bɔ odi mu tra Solomon wɔ wa! 32#Yona 3.5 Ninewefoɛ ne ɛnɛmmafoɛ bekodwɔso wɔ ndɛenbualɛ ne anu, na bɛkɔbɔ bɛ kwaadu, ofikyɛ Ninewefoɛ tele Yona nzɛmba nen, bɛsakyerale b’adwene; na tie, bɔ odi mu tra Yona wɔ wa!

Nipadua kanea

(Mateo 5.15; 6.22-23)

33 # Mat 5.15; Mak 4.21; Luk 8.16 “Ebiala nzɔ kanea mva mvea anaa ɔmva nwura ɛkorɛ bo; na mmom ɔfa sie kanea bakaa so, amaa bɛ bɔ bɛba awuro berɛ ne banwu ye hyireinn ne. 34Wɔ nye te nipadua ne kanea. Yiti sɛ wɔ nye nwu nikyee yé a, wɔ nipadua ne amukoraa te hyireinn; nakoso sɛ wɔ nye te wusiwusi a, wɔ nipadua ne amukoraa koso te awosii. 35Yiti nea yé né kanea bɔ ɔwɔ wɔ nu ne wangakyi awosii. 36Sɛ wɔ nipadua ne amukoraa te hyireinn bɔ awosii nne ye nekaa biala a, nipadua ne amukoraa kɔyɛ hyireinn, kyɛbɔ kanea ta hyireinn ma wɔ ne.”

Yesu twi Farasiifoɛ ne ahyerɛlɛfoɛ nyunu

(Mateo 23.1-36; Marko 12.38-40)

37Yesu noa wɔ so bɔ odwudwo nen, Farasiiniɛ bie tole ye sa frɛle ye kyɛ ɔbra ma beedidi. Yiti ɔhɔle nu ɔɔtenane ase kyɛ odidi. 38#Mak 7.1-5 Na Farasiiniɛ ne nwuni kyɛ Yesu annwunzi ye sa koraka yeɛ odidi nen, ɔyɛle ye nwanwa. 39Na Awurade sele ye kyɛ, “Ɛmɔ Farasiifoɛ de, ɛmɔnwunzi kwangoa ne prɛte nwo, nakoso ɛmɔ nu de, apoo ne bɔne yɔleɛ ayi ye tɛkyɛ. 40Ngwaseafoɛ! Bɔ ɔyɔle bɛ nwo ne, aso nna ye ala yeɛ ɔyɔle nu ne koso ɔ? 41Odi kyɛ ɛmɔfa bɔ ɔwɔ nu ne bɛyɛ adɔeɛ, na tie, nikyee biala nwo kɔte kɔma ɛmɔ.

42 # Lew 27.30; Mika 6.8; Mat 23.23 “Ɛmɔ Farasiifoɛ, ɛmɔ yaakɔ! Ofikyɛ, ɛmɔfa ɛmeɛ, ɛmanyire ne nyaanyaa biala buru nu ngyɛmuɛ ko bɛma, nakoso ɛmɔbu bɛ nye begua pɛpɛɛpɛyɛlɛ ne Nyameɛ nwo dɔ so. Na ɛhemɔ yeɛ ahaa odi kyɛ ɛmɔyɔ ɔ, bɔ ɛmɔnyakyi ye ngaa nemɔ koso yɔlɛ ɔ.

43“Ɛmɔ Farasiifoɛ, ɛmɔ yaakɔ! Ofikyɛ, mbanyi bia yeɛ ɛmɔkuro wɔ nyianu sua mɔ nu ɔ, ɔne kyɛ mmenia kobisa ɛmɔ ahye wɔ dwaaso ɔ. 44Ɛmɔ yaakɔ! Ofikyɛ, ɛmɔte kyɛ asieleɛ mɔ bɔ bennwu bɛ, bɔ mmenia nate so nakoso bɛnze ɔ.”

45Yeɛ mmeraa nwo nimdeɛfoɛ nemɔ anu ko sele ye kyɛ, “Kyerɛkyerɛniɛ, sɛ ɛkã sɔ de a, né awɔ yɛ koso safure!” 46Na Yesu buale ye kyɛ, “Mmeraa nwo nimdeɛfoɛ, ɛmɔ koso, ɛmɔ yaakɔ! Ofikyɛ, ɛmɔfa nningyein bɔ ye soalɛ yɛ yea ɔ bɛsoa mmenia, nakoso ɛmɔ bɔbɔ de, ɛmɔndengyɛ ɛmɔ sa mmɛseka ko po bɛmva bɛnga nningyein ne. 47Ɛmɔ yaakɔ! Ofikyɛ, ngɔmhyɛlɛfoɛ bɔ ɛmɔ nana mɔ behuhuni bɛ ne, ɛmɔto b’asieleɛ so. 48Yiti, ɛmɔdi ɛmɔ nana mɔ yɔleɛ ne nwo adanzeɛ, na ɛmɔpene so, kyɛ bɛ yeɛ behuhuni bɛ ɔ, yeɛ ɛmɔ koso ɛmɔto b’asieleɛ so ɔ. 49Na ɛhe ati koso yeɛ Nyameɛ Nworɛ ne kã kyɛ, ‘Ngɔsoma ngɔmhyɛlɛfoɛ ne asomafoɛ maa bɛkɔhɔ bɛ berɛ; na bekohu biemɔ, ná batane ebiemɔ anye.’ 50Yiti ngɔmhyɛlɛfoɛ amukoraa bɛ mogya bɔ bahã bagua fi ewiase ahyɛaseɛ ne, ye nwo asodie la ɛnɛmmafoɛ so, 51#Gye 4.8; 2 Abe 24.20-21 ofi Abel mogya so kodwu Sakaria bɔ behuni ye wɔ afɔleɛ bokyea ne ne nekaa krongron berɛ b’afia ne, ye mogya so. Yoo, mekã mekyire ɛmɔ kyɛ, ye nwo asodie kɔla ɛnɛmmafoɛ so.

52“Ɛmɔ, mmeraa nwo nimdeɛfoɛ, ɛmɔ yaakɔ! Ofikyɛ, ɛmɔafa nimdeɛ safoaa ne; ɛmɔ bɔbɔ a, ɛmɔangɔ nu, nakoso bɛ bɔ bɛ́kɔ nu ne koso, ɛmɔsi bɛ ate.”

53Na Yesu fili berɛ bɔ ɔkɔ nen, ahyerɛlɛfoɛ ne Farasiifoɛ mɔ hyɛle ye bo bɛfɛle ye so yaa, na bɛfale edwirɛ pee bɛtetale ye bɛfa bɛgyegyele ye, 54kyɛ ebiaa ɔkɔhã dwirɛ bɔ ɔkɔma ye noa kɔtɔ ɔ.

Currently Selected:

Luka 11: EBP

Highlight

Copy