Luka 1
1
1Mmenia pee babɔ mmɔden bafa edwirɛ mɔ bɔ bawa nu wɔ yɛ nu ɔ bagua ngrataa so wɔ ye nnidisoɛ nnidisoɛ so, 2kyɛbɔ bɛ bɔ ofi ye bohyɛlɛ ne bɛfale bɛ nye benwuni ye, bɔ bɛte edwirɛ ne nwo asomvoɛ ne bamaa yɛ sa ahã ye ne ala. 3Yiti yɛ mene animnyamniɛ Tiofilo, mato me bo ase maneanea bɔ osisili ne amukoraa nu pɛpɛɛpɛ, ofi ye bohyɛlɛ, na manwu kyɛ ɔte paa kyɛ me koso ngɔhyerɛ ye nnidisoɛ nnidisoɛ ngɔbrɛ wɔ ɔ, 4amaa ɔnate so anwu nahorɛ pefee bɔ ɔwɔ ngyerɛkyerɛ bɔ bafa bama wɔ ne anu.
Asubɔlɛniɛ Yohane aworɛ nwo ngɔm
5 #
1 Abe 24.10 Yudea hene Herode aberɛ so, né ɔsɔfo bie wɔ berɛ bɔ bɛfrɛ ye Sakaria, bɔ ofi Abiya asɔfo kure nu ɔ. Né ɔye te Aarɔn bosofoɛ nemɔ anu bie, na ye dumaa li Elisabɛte. 6Né bɛ munyɔ bɛtengyɛ wɔ Nyameɛ nyunu, na belili Awurade mmeraa dwirɛ ne ye ahyɛdeɛ so pɛpɛɛpɛ. 7Nakoso né belle ba, ɔnate kyɛ né Elisabɛte te mmotaen, yeɛ né bɛ munyɔ koso banyi paa.
8Na ɔwale kyɛ, odwuli ye asɔfo kure ne aso, bɔ né ɔyɔ ye ɔsɔfo dwuma wɔ Nyameɛ nyunu ɔ. 9Na kyɛbɔ né asɔfodwuma nhyehyɛleɛ te nen, ye yeɛ serewagualɛ ne yele ye kyɛ ɔhɔ Awurade asɔneyɛɛ sua ne anu ɔɔyera ɛyɛɛ ɔ. 10Na mmerɛ bɔ ɔ́yera ɛyɛɛ ne nen, né ɛlɔen ne amukoraa bɛwɔ aluo dɔ bɛbɔ mbaeɛ.
11Na Awurade abɔfo bie ɔɔyele ye nwo ali hyirele ye, na oogyinane ɛyɛɛ afɔleɛ bokyea ne famaa so. 12Na Sakaria nwuni ye nen, ye kunu tele ye, na osurole. 13Nakoso abɔfo ne sele ye kyɛ, “Sakaria, nnɛsuro, ofikyɛ Nyameɛ ate wɔ mbaeɛ ne, na ɛye Elisabɛte kɔwo baa bienzua kɔma wɔ, na ɛkɔto ye dumaa Yohane.
14Ɔkɔmaa ekonya anigye ne anwosɛpɛ,
na ye aworɛ ne ati mmenia pee koli ahurusi;
15 #
Num 6.3 ofikyɛ ɔkɔyɛ sona titire wɔ Awurade nyunu,
na ɔngɔno bobe nzaa anaa nzaa biala,
na Sunzum Krongron koyi ye tɛkyɛ kofi oni akunu.
16Na ɔkɔma Yisraelfoɛ pee bekosa bɛkɔwa Awurade bɛ Nyameɛ berɛ.
17 #
Mal 4.5-6 Ɔkɔfa Elia sunzum ne ye tumi koli ye nyunu
kɔkakyi seɛ mɔ b’adwene kɔwa mma mɔ so
ɔne asoserɛfoɛ kɔhɔ teneneefoɛ nworɛ nwo,
na okosiesie maen bɔ waboaboa ye nwo ɔ kɔma Awurade.”
18Na Sakaria bisale abɔfo ne kyɛ, “Ɔkɔyɛ sɛɛ né manwu kyɛ ɛhe te nahorɛ? Ofikyɛ mayɛ aworowaa, yeɛ me ye koso wayɛ aworowaa.” 19#Dan 8.16; 9.21 Na abɔfo ne buale ye kyɛ, “Me ole Gabriel bɔ ngyi Nyameɛ nyunu; na basoma me kyɛ mmanga ngyire wɔ, ná mva ndɛenvɛen he mmrɛ wɔ. 20Na tie, anne me dwirɛ bɔ ɔkɔwa nu wɔ ye mmerɛ nu ne anni, yiti ɛkɔtɔ mumu, ɛngɔhora dwudwo maa okodwu kyẽa bɔ ɛhemɔ kɔwa nu ɔ.” 21Né mmenia nemɔ bɛnwondɛ Sakaria, na ɔyɛle bɛ nwanwa kyɛ wahyɛ asɔneyɛɛ sua ne anu sɔ ɔ. 22Na mmerɛ bɔ ofite wale ne, wangora dwudwo kyire bɛ, yiti benwuni kyɛ wanwu nikyee bie wɔ asɔneyɛɛ sua ne anu dɔ; wangora dwudwo, na ɔfale ye sa yeɛ ɔyɛle nzɛngyerɛnneɛ hyirele bɛ ɔ.
23Na ɔwale kyɛ, ye solɛ adwuma mmerɛ wale ayieleɛ ne, ofili berɛ hɔle ye awuro. 24Na ngyẽa biemɔ asi ne, ɔye Elisabɛte nwonzɛle, na ɔfale ye nwo siele ɛsraen nnu, na ɔhane kyɛ, 25“Sɔaa yeɛ Awurade aboka me ɔ, wɔ mmerɛ bɔ walo me wapa ɛfɛrelɛ bɔ mafɛre mmenia nyunu ne wagua ɔ.”
Bɛhyɛ Yesu aworɛ nwo ngɔm
26Na nwonzɛen ne lili bosome nzia ne, Nyameɛ somane abɔfo Gabriel maa ɔhɔle Galilea kuro bie bɔ bɛfrɛ ye Nasarɛte so, 27#Mat 1.18 maa ɔhɔle ababunu bie berɛ. Né bafa ye babɔ biaa bie bɔ bɛfrɛ ye Yosef, bɔ ofi Dawide abusua nu ɔ asiwa; na ababunu ne dumaa li Maria. 28Na abɔfo ne wale ye berɛ oosele kyɛ, “Asomdwee hã wɔ! Wɔ bɔ balo wɔ ɔ, Awurade gyi wɔ si!”
29Na edwirɛ ne hale ye paa, na ɔdwenene ye nwo kyɛ, “Nzikyɛ ahyebisalɛ ɛhe?” 30Na abɔfo ne sele ye kyɛ, “Maria, nnɛsuro, ofikyɛ Nyameɛ alo wɔ. 31#Mat 1.21 Na tie, ɛkɔnwonzɛ, ná awo baa bienzua, ná ato ye dumaa Yesu.
32 #
2 Sam 7.12, 13, 16; Yes 9.7 Ɔkɔyɛ sona titire, na bɛkɔfrɛ ye Anwuro Anwuroniɛ n’Awa;
na Awurade Nyameɛ kɔfa ye nana Dawide ahennie bia ne kɔma ye,
33na okoli Yakob awuro so hene afebɔɔ,
na ye ahennie ne olle ayieleɛ.”
34Na Maria bisale abɔfo ne kyɛ, “Nnwuni biaa le, na ɔkɔyɛ sɛɛ né ɛhe awa nu?” 35Na abɔfo ne buale ye kyɛ,
“Sunzum Krongron ne kɔwa wɔ so,
na Anwuro Anwuroniɛ ne, ye tumi komundu wɔ so;
yiti baa krongron bɔ ɛkɔwo ye ne,
bɛkɔfrɛ ye Nyameɛ Awa.
36Na tie, wɔ busuaniɛ Elisabɛte bɔ bɛnwa ɔte mmotaen ne, ɔnwonzɛ baa bienzua ɛsraen nzia ɛhe; ye bɔ wayɛ aworowaa posoposo ne; 37#Gye 18.14 ofikyɛ Nyameɛ de, nikyee biala nne berɛ bɔ ɔngora nyɔ ɔ.”
38Yeɛ Maria buale kyɛ, “Yieee, nde Awurade afaneɛ; maa ɔyɛ berɛ ma me kyɛbɔ wɔ dwirɛ ne te ɔ.” Na abɔfo ne yakyili ye berɛ hɔle.
Maria kɔpasa Elisabɛte nwo
39Na sɔ mmerɛ ne anu, Maria yɛle ndɛndɛ sili nu hɔle mmokaa so Yuda kuro bie anu, 40na ɔhɔle Sakaria awuro, na obisale Elisabɛte ahye. 41Na Elisabɛte tele Maria ahyebisalɛ nen, akwadaa ne huruli wɔ ye kunu; na Sunzum Krongron yili Elisabɛte tɛkyɛ, 42na ɔteane nu serɛserɛ kyɛ, “Wɔ yeɛ anya saleɛ wɔ mmrasua mukoraa nu ɔ, na bayira baa bɔ ɔla wɔ kunu ne! 43Yieee, ɔwale ye sɛ bɔ m’Awurade ani ɔba bapasa me nwo ɔ? 44Ɔnate kyɛ, mmerɛ bɔ ndele w’ahyebisalɛ ne pɛ, yeɛ akwadaa ne le anika ohuruli wɔ me kunu ɔ. 45Na saleɛ te bɔ wale wali ɔ deɛ, ofikyɛ edwirɛ mɔ bɔ Awurade amaa baahã bahyire ye ne, ɔkɔwa nu.”
Maria ye Nyameɛ ayɛ
46 #
1 Sam 2.1-10 Na Maria hane kyɛ,
“Me kra kamvo Awurade,
47na me sunzum di ahurusi wɔ me Ngoadefoɛ Nyameɛ nu;
48 #
1 Sam 1.11 ofikyɛ wakaye ye afaneɛ awiɛmvoɛ!
Yieee, ofikyɛ ofi ɛnɛ bɔ ɔkɔ ɔ, aworɛ ndoatoasoɛ amukoraa
bɛkɔfrɛ me bɔ wanya saleɛ ɔ;
49ɔnate kyɛ, Tuminiɛ ne ayɔ nikyee piri wama me,
na ye dumaa ole krongron.
50Na ye anwumvoinnwunɛ ne, ɔwɔ bɛ bɔ besuro ye ɔ so,
wɔ aworɛ ndoatoasoɛ amukoraa nu.
51Wafa ye basa wayɔ nningyein mbiri mbiri,
na wapanzam ahandaenfoɛ b’adwene nzusuleɛ nu.
52 #
Yob 5.11; 12.19 Watu tumifoɛ mɔ wafi b’ahennie bia so,
na wapagya awiɛmvoɛ mɔ so.
53Wama bɛ bɔ ɛhɔen ku bɛ ɔ bali aleɛ paa ma bɛ ko ayi,
yeɛ wama esikafoɛ bafa nzanza bahɔ.
54Waboka ye akoaa Yisrael,
ofikyɛ wakaye ye anwumvoinnwunɛ ne,
55 #
Gye 17.7 kyɛbɔ ɔhã hyirele yɛ nana mɔ,
Abraham ne ye bosofoɛ afebɔɔ ne.”
56Na Maria lili Elisabɛte nwo berɛ kɔyɛ ɛsraen nza, na osa hɔle ye kuro.
Elisabɛte wo Asubɔlɛniɛ Yohane
57Elisabɛte aworɛ dwuli ne, ɔwole baa bienzua. 58Na ye mandamu berɛ ama ne ye abusuafoɛ bɛtele kyɛbɔ Awurade asi alo ye paa nen, bɛ ne ye bɛ nye gyele. 59#Lew 12.3 Na ɔwale kyɛ, ye ɛlɛbɔtwɛ ne aso, bɛwale kyɛ bɛbaapɛ akwadaa ne bienzua; na ahaa bɛpena kyɛ bɛfa ye bɛto ye baba Sakaria; 60nakoso oni hane kyɛ, “Daabi, bɛkɔfrɛ ye Yohane.” 61Na besele ye kyɛ, “Ebiala nne w’abusua nu bɔ oli sɔ ɔ.” 62Na bele bɛ sa bɛyɛle nzɛngyerɛnneɛ bebisale ye baba, dumaa horɛ bɔ okuro kyɛ bɛfa bɛto ye ɔ. 63Ohyirele kyɛ bɛma ye nikyee bɔ bɛkyerɛ so ɔ, na ɔhyerɛle so kyɛ, “Ye dumaa li Yohane.” Na ɔyɛle bɛ mukoraa nwanwa. 64Na berɛ ne ala, ye noa ne tele, na ye temverema nyamaa sangyele maa odwudwole, na ɔyele Nyameɛ ayɛ. 65Na ɛserɛ hane mandamu berɛ ama amukoraa. Na sɔ dwirɛ nemɔ trɛ hɔle Yudea mmokaa maen ne anu amukoraa. 66Na bɛ bɔ bɛtele ne amukoraa, bɛdwenene ye nwo paa, na bɛhane kyɛ, “Akwadaa he de, ɔkɔyɛ nzikyɛ sona ɛhe?” Ɔnate kyɛ né Awurade tumi wɔ ye so.
Sakaria hyɛ ngɔm
67Na Sunzum Krongron yili ye baba Sakaria tɛkyɛ, na ɔhyɛle ngɔm kyɛ,
68“Animnyam hã Awurade, Yisrael Nyameɛ ne,
ɔnate kyɛ waapasa ye maen nwo, na wapɔ ye wale ye,
69na wama ngoalelɛ awɛen so wama yɛ
wɔ ye akoaa Dawide awuro;
70kyɛbɔ ɔnate ye ngɔmhyɛlɛfoɛ krongron so fi tetetete dwudwole,
71kyɛ okole yɛ kofi yɛ pɔfoɛ mɔ sa nu,
ɔne bɛ bɔ bekyi yɛ mukoraa bɛ sa nu,
72kyɛ okonwu yɛ nana mɔ anwumvoin,
ná wakaye ye apam krongron ne.
73Ndaen bɔ ɔta hyirele yɛ nana Abraham
74kyɛ ɔkɔmaa bekole yɛ bekofi yɛ pɔfoɛ mɔ sa nu,
ná yaso ye bɔ esurolɛ nne nu,
75wɔ anwotelɛ ne tenenee nu,
wɔ ye nyunu yɛ ngoa ngyẽa mukoraa ne.
76Na wɔ, akwadaa he, bɛkɔfrɛ wɔ Anwuro Anwuroniɛ ne, ye ngɔmhyɛlɛniɛ;
ɔnate kyɛ ekoli Awurade nyunu moa ekosiesie ye atee nu,
77ná afa ngoalelɛ nwo nimdeɛ ama ye maen,
wɔ bɛ bɔne fakyɛ nu,
78ɔnate yɛ Nyameɛ anwumvoinnwunɛ bɔ ɔma ye kunu tete ye ne anu.
Na ye sɔ ati yeɛ alehyeleɛ bɔ ofi anwuro ɔ wapukye wɔ yɛ so ye,
79kyɛ ɔkɔta kɔma bɛ bɔ bɛtete awosii nu ɔne ewue wawoɛ nu ɔ,
ná wayɛ yɛ taataa wahɔ asomdwee atee so.”
80Na akwadaa ne nyini, na ɔyɛle se sunzum nu, na ɔtenane ɛserɛ so maa oodwuli kyẽa bɔ ɔyele ye nwo ali hyirele Yisrael ɔ.
Currently Selected:
Luka 1: EBP
Highlight
Share
Copy
Want to have your highlights saved across all your devices? Sign up or sign in
Esahie Bible © Bible Society of Ghana, 2018.
