Gyenesise 8
8
Nzue ne hyɛ ye bo twe
1Nakoso Nyameɛ lole Nowa ne ngaka ne nyɛmmoa mukoraa bɔ bɛ ne ye wɔ ɛlɛen alaka ne anu. Nyameɛ mane mvrama tu fale aseɛ so, na nzue ne hwene. 2Nyameɛ mane aseɛ bo dɔ nzue ne pɛle, ɔtotole anwuro nzue mboma nemɔ anu, na ɔmane esue ne koso yakyili tɔlɛ. 3Afei nzue ne hwene ngaka ngaka fili aseɛ so, na odwuli ngyẽa ɛyaa ko ne aburannu ne, né nzue ne ahwe paa. 4Na ye bosome nzoo ne anu, ngyẽa bɔ ɔtɔ so buru ne nzoo ne aso, ɛlɛen alaka ne oogyinane Ararate mmokaa ne aso. 5Nzue ne hɔle so hwene alaa maa oodwuli bosome buru ne anu. Na kyẽa bɔ oli moa wɔ bosome buru ne anu nen, mmokaa nemɔ ti tetɛle berɛ. 6Ye eleburanna ne aso, Nowa bukyele mboma bɔ ɔpɛ tole ɛlɛen alaka ne anu ne, 7na ɔsomane adene; na adene ne oohyinihyini toonn maa oodwuli kyɛ nzue ne wewele wɔ aseɛ so ɔ. 8Afei ɔsomane abubure kyɛ ɔɔnea sɛ nzue bɔ ɔwɔ aseɛ so ne ahwe a; 9nakoso abubure ne annya neka fee wandena, yiti osa wale Nowa berɛ wɔ ɛlɛen alaka ne anu, ofikyɛ né nzue ne afa aseɛ so amukoraa. Yiti Nowa tengyɛle ye sa sɔle ye nu, na ɔfale ye wale ye nwo berɛ wɔ ɛlɛen alaka ne anu. 10Nowa nwondɛle ɛlɛsoo bieku, na ɔsomane abubure ne fili ɛlɛen alaka ne anu. 11Abubure ne sá wale ye berɛ nɔsoa, na edwirɛ nwanwa, né olive nyaa monɛ tua ye noa, na ɛhe mane Nowa nwuni kyɛ nzue ne awewe wɔ aseɛ so. 12Nowa nwondɛle ngyẽa ɛlɛsoo bieku, na osa somane abubure ne, nakoso abubure ne anza amma ye nwo berɛ ko.
13Nowa afoɛ ɛyaa nzia ne ko ne anu, kyẽa bɔ oli moa wɔ bosome bɔ oli moa ne anu ne, né nzue ne awewe afi aseɛ so. Nowa tofili ɛlɛen alaka mmɔsoɛ ne anu, ɔtotole ye nye, na onwuni kyɛ aseɛnwo awo. 14Kyẽa bɔ ɔtɔ so buru ne nzoo wɔ bosome bɔ ɔtɔ so nyɔ ne anu, né aseɛnwo awo wosee. 15Na afei Nyameɛ sele Nowa kyɛ, 16“Fi ɛlɛen alaka ne anu dwu ase, wɔ, ɛye, wɔ mma mɔ ne bɛ ye mɔ. 17Nikyee biala bɔ nwomeɛ wɔ ye nu na ɔboka wɔ so ne, fa ye fite: nnomaa, ngaka ne kaka biala bɔ ɔtwe ye nwo ase, amaa bawo pee wɔ aseɛ ye aso, ná bata wɔ so.” 18#2 Pet 2.5 Yiti Nowa ne ɔye, ye mma mɔ ne bɛ ye mɔ befili ɛlɛen ne anu bedwuli ase. 19Na ngaka mukoraa, bɛ bɔ bɛtwe bɛ nwo ase, nnomaa mukoraa ne nikyee biala bɔ ɔnate aseɛ ye aso, befili ɛlɛen alaka ne anu befitele kure kure, kyɛbɔ ebiala sue si te ɔ.
Nowa bɔ afɔleɛ
20Nowa sili afɔleɛ bokyea mane AWURADE; na kaka biala bɔ ye nwo te, ɔne anomaa biala bɔ ye nwo te ne, ɔfale nu bie bɔle naen yeralɛ afɔleɛ wɔ bokyea ne aso. 21Na AWURADE tele afɔleɛ ne fona nen, ɔhane ye ye ti anu kyɛ, “Ɔnate kuro sona ti mengɔnoma aseɛ ko, ofikyɛ sona ti anu nzusuleɛ te bɔne fite ye ngwadaa nu; na sɔ ala yeɛ mengɔsɛkye abɔdeɛ biala ko kyɛbɔ mayɔ ye ɔ.” 22#Yer 33.20, 25 Na mmerɛ biala bɔ aseɛ tɛ wɔ berɛ ye de, mmakaammaa lualɛ ne ye bulɛ, ɛyerɛ ne ahuhuro, asuso ne wawa, alehyeleɛ ne alesaleɛ ngɔyakyi le.”
Currently Selected:
Gyenesise 8: EBP
Highlight
Share
Copy
Want to have your highlights saved across all your devices? Sign up or sign in
Esahie Bible © Bible Society of Ghana, 2018.
