KA ʻEUANELIO I KĀKAU ʻIA AI E IOANE 21
21
MOKUNA XXI.
1 Hōʻike hou mai ʻo Iesū iā ia iho i nā haumāna. 12 ʻAi pū ʻo Iesū me lākou. 15 Kā Iesū nīnau ʻana iā Petero.
1¶ Ma hope iho o kēia mau mea hōʻike hou maila ʻo Iesū iā ia iho i nā haumāna ma ka moana wai ʻo Tiberia. Pēnēia ʻo ia i hōʻike ai.
2Noho pū ihola ʻo Simona Petero me Toma i kapa ʻia ʻo Didumo, a me Natanaʻela no Kāna i Galilaia, a me nā keiki a Zebedaio, a me nā mea ʻē aʻe ʻelua o kāna poʻe haumāna.
3ʻĪ akula ʻo Simona Petero iā lākou, “E hele ana au i ka lawaiʻa.” ʻĪ mai lākou iā ia, “ʻO mākou kekahi e hele pū me ʻoe.” Hele akula lākou, a eʻe koke aʻela i ka moku; ʻaʻohe mea i loaʻa iā lākou ia pō.
4A ao aʻela, kū maila ʻo Iesū ma ke kapa; ʻaʻole naʻe i ʻike nā haumāna, ʻo Iesū ia.
5A laila nīnau maila ʻo Iesū iā lākou, “E nā pōkiʻi, ʻaʻole a ʻoukou wahi iʻa?” ʻĪ akula lākou iā ia, “ʻAʻole.”
6ʻĪ maila ʻo ia iā lākou, “E kuʻu aku i ka ʻupena ma ka ʻaoʻao ʻākau o ka moku, a e loaʻa iā ʻoukou.” No ia mea, kuʻu ihola lākou, ʻaʻole i hiki iā lākou ke huki mai ia i ka nui loa o nā iʻa.
7A laila, ʻī akula ka haumāna a Iesū i aloha ai iā Petero, “ʻO ka Haku ia.” A lohe aʻela ʻo Simona Petero, ʻo ka Haku ia, kāʻei aʻela ia i ke kapa; no ka mea, ua ʻōlohelohe ia, a lele ihola i ka moana wai.
8A holo mai nā haumāna i koe ma ka moku e kauō ana i ka ʻupena me ka iʻa, (no ka mea, ʻaʻole lōʻihi aku lākou mai ka ʻāina aku, ʻelua paha haneri kūbita.)
9A pae lākou i uka, ʻike akula lākou i ka lānahu ahi, a me ka iʻa i kau ʻia ma luna, a me ka berena.
10ʻĪ maila ʻo Iesū iā lākou, “E lawe mai i ka iʻa i loaʻa iho nei iā ʻoukou.”
11Hele aʻela ʻo Simona Petero, a huki mai i ka ʻupena i uka, ua piha i nā iʻa nui, hoʻokahi haneri a me kanalimakumamākolu; ʻaʻole naʻe i moku ka ʻupena i ko lākou lehulehu ʻana.
12ʻĪ maila ʻo Iesū iā lākou, “E hele mai e ʻai.” ʻAʻole i ʻaʻa kekahi o nā haumāna e nīnau aku iā ia, “ʻO wai ʻoe?” Ua ʻike nō lākou, ʻo ka Haku ia.
13Hele maila ʻo Iesū, a lālau ihola i ka berena, a hāʻawi maila iā lākou, a me ka iʻa nō hoʻi.
14ʻO ke kolu kēia o ko Iesū hōʻike ʻana iā ia iho i kāna poʻe haumāna, ma hope iho o kona ala hou ʻana aʻe mai ka make mai.
15¶ A pau kā lākou ʻai ʻana, nīnau maila ʻo Iesū iā Simona Petero, “E Simona na Iona, ua nui mai anei kou aloha iaʻu i ko kēia poʻe?” ʻĪ akula kēlā iā ia, “ʻAe, e ka Haku; ua ʻike nō ʻoe, ua aloha au iā ʻoe.” ʻĪ maila ʻo ia iā ia, “E hānai ʻoe i nā keiki hipa aʻu.”
16Nīnau hou maila ʻo ia iā ia, ʻo ka lua ia, “E Simona na Iona, ke aloha mai nei anei ʻoe iaʻu?” ʻĪ akula kēlā, “ʻAe, e ka Haku; ua ʻike nō ʻoe, ua aloha au iā ʻoe.” ʻĪ maila ʻo ia iā ia, “E hānai ʻoe i kaʻu poʻe hipa.”
17Nīnau hou maila ʻo Iesū iā ia, ʻo ke kolu ia, “E Simona na Iona, ke aloha mai nei anei ʻoe iaʻu?” Kaumaha ihola ʻo Petero, no ke kolu o kona nīnau ʻana iā ia, “Ke aloha mai nei anei ʻoe iaʻu?” A ʻī akula kēlā iā ia, “E ka Haku, ua ʻike ʻoe i nā mea a pau; ua ʻike hoʻi ʻoe, ua aloha au iā ʻoe.” ʻĪ maila ʻo Iesū iā ia, “E hānai ʻoe i kaʻu poʻe hipa.”
18“ʻOiaʻiʻo, he ʻoiaʻiʻo kaʻu e ʻōlelo aku nei iā ʻoe, i kou wā ʻōpiopio, kāʻei ʻoe iā ʻoe iho, a hele akula i kāu wahi i makemake ai; akā, i kou wā ʻelemakule e kīkoʻo aku ʻoe i kou mau lima, a na haʻi ʻoe e kāʻei mai, a e alakaʻi aku i kahi āu e makemake ʻole ai.”
19ʻO kēia kāna i ʻōlelo mai ai, e hōʻike aku ana i ke ʻano o ka make e hoʻomaikaʻi aku ai ʻo ia i ke Akua. A pau kāna ʻōlelo ʻana i kēia, ʻī maila ʻo ia iā ia, “E hahai mai ʻoe iaʻu!”
20Hāliu aʻela ʻo Petero, a ʻike maila i ka haumāna a Iesū i aloha ai e hahai mai ana, ʻo ia hoʻi ka mea i hilinaʻi ma ka poli o Iesū i ka ʻahaʻaina, a nīnau akula, “E ka Haku, ʻo wai ka mea nāna ʻoe e kumakaia?”
21ʻIke aʻela ʻo Petero iā ia, nīnau akula iā Iesū, “E ka Haku, e aha hoʻi ʻo ia nei?”
22ʻĪ maila ʻo Iesū iā ia, “Inā makemake au e noho ia a hoʻi hou mai au, he mea aha ia iā ʻoe? E hahai mai ʻoe iaʻu!”
23No laila, laha akula ia ʻōlelo i waena o nā hoahānau, ʻaʻole e make kēia hoahānau. ʻAʻole naʻe ʻo Iesū i ʻōlelo aku iā ia, ʻaʻole ia e make; akā, “Inā makemake au e noho ia a hoʻi hou mai au, he mea aha ia iā ʻoe?”
24¶ ʻO kēia ka haumāna e hōʻike aku no kēia mau mea, a kākau hoʻi ia mau mea, a ua ʻike mākou he ʻoiaʻiʻo kāna hōʻike ʻana.
25¶ He nui loa nā mea ʻē aʻe a Iesū i hana ai, inā e pau ia mau mea i ka palapala ʻia, ke manaʻo nei au, ʻaʻole wahi kaʻawale ma ke ao nei no nā buke e palapala ʻia. ʻĀmene.
Currently Selected:
KA ʻEUANELIO I KĀKAU ʻIA AI E IOANE 21: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
