KA BUKE MUA A MOSE, I KAPA ʻIA KINOHI 9
9
MOKUNA IX.
1 Ko ke Akua hoʻomaikaʻi ʻana iā Noa. 4 Ka uku no ka pepehi kanaka. 8 Kā ke Akua berita me Noa a me kāna poʻe mamo. 20 Ka māla waina o Noa a me kona ʻona ʻana. 22 Ka hana a kāna mau keiki. 25 Kā Noa wānana iā lākou. 28 Kona make ʻana.
1¶ Hoʻopōmaikaʻi maila ke Akua iā Noa, a me kāna mau keiki kāne, ʻī maila iā lākou, “E hoʻohua mai ʻoukou, e māhuahua, a e hoʻopiha i ka honua.
2“E kau mai auaneʻi ka makaʻu iā ʻoukou a me ka weliweli ma luna o nā holoholona a pau o ka honua, ma luna hoʻi o nā manu a pau o ka lewa, a ma luna hoʻi o nā mea a pau e hele ana ma ka honua, a ma luna nō hoʻi o nā iʻa a pau o ke kai; ua hāʻawi ʻia aku lākou i loko o nā lima o ʻoukou.
3“ʻO nā mea hele a pau e ola ana, na ʻoukou ia e ʻai; me kaʻu i hāʻawi aku ai i nā lau nahele ʻōpiopio na ʻoukou, pēlā kaʻu e hāʻawi aku nei i nā mea a pau.
4“Akā, mai ʻai ʻoukou i ka ʻiʻo me kona ola, ʻo ia kona koko.
5“He ʻoiaʻiʻo, e hoʻopaʻi auaneʻi au i ke koko o ko ʻoukou ola; ma ka lima o nā holoholona a pau kaʻu e hoʻopaʻi aku ai; a ma ka lima hoʻi o nā kānaka; ma ka lima hoʻi o ka hoahānau o kēlā kanaka kēia kanaka kaʻu e hoʻopaʻi aku ai i ke ola o kānaka.
6“ʻO ka mea nāna e hoʻokahe i ke koko o kānaka,
E hoʻokahe ʻia nō kona koko e kānaka;
No ka mea, ma ke ʻano o ke Akua
ʻO ia i hana ai i kānaka.
7“A ʻoukou, e hoʻohua mai ʻoukou, a e māhuahua;
E hānau nui ma ka honua,
A e hoʻolaha ma laila.”
8¶ ʻŌlelo maila ke Akua iā Noa a i kāna mau keiki me ia, ʻī maila:
9“ʻO wau lā ē, ke hoʻopaʻa nei au i kaʻu berita me ʻoukou, a me kā ʻoukou poʻe mamo ma hope o ʻoukou.
10“A me nā mea ola a pau me ʻoukou, ʻo nā manu, ʻo nā holoholona laka a me nā holoholona hihiu o ka honua me ʻoukou; mai ka poʻe a pau i hele mai i waho o ka hale lana, a i nā holoholona a pau o ka honua.
11“E hoʻopaʻa nō wau i kaʻu berita me ʻoukou; ʻaʻole hoʻi e luku hou ʻia nā mea ola a pau i nā wai o ke kai a Kahinaliʻi; ʻaʻole hoʻi he kai a Kahinaliʻi e hiki hou mai ana e pau ai ka honua.”
12ʻĪ maila ke Akua, “Eia ka hōʻailona o ka berita aʻu e hana nei ma waena oʻu a ʻo ʻoukou, me nā mea ola a pau me ʻoukou, no nā hanauna a pau;
13ke kau nei au i kuʻu ānuenue ma ke ao, i hōʻailona ia no ka berita ma waena oʻu a ʻo ka honua.
14“A hoʻouhi aku ai au i ke ao ma luna o ka honua, e ʻikea auaneʻi ke ānuenue ma ke ao;
15a e hoʻomanaʻo iho nō au i kaʻu berita ma waena oʻu a ʻo ʻoukou, me nā mea ʻiʻo e ola ana a pau; ʻaʻole loa e lilo hou ana ka wai i kai a Kahinaliʻi e luku ai i nā mea ʻiʻo a pau.
16“A e kau mai auaneʻi ke ānuenue ma ke ao; a e nānā aku au ia i hoʻomanaʻo iho ai au i ka berita mau loa ma waena o ke Akua a ʻo nā mea ola a pau o nā mea ʻiʻo a pau ma luna o ka honua.”
17ʻŌlelo maila ke Akua iā Noa, “ʻO ia ka hōʻailona o ka berita aʻu i hoʻopaʻa iho ai ma waena oʻu a ʻo nā mea ʻiʻo a pau ma luna o ka honua.”
18¶ ʻO nā keiki kāne a Noa, nā mea i puka mai i waho o ka hale lana, ʻo ia ʻo Sema, ʻo Hama, a ʻo Iapeta; a ʻo Hama ka makua kāne no Kanaʻana.
19ʻO lākou nā keiki kāne ʻekolu a Noa, a na lākou i hoʻolaha ʻia aku nā kānaka ma ka honua a pau.
20¶ Hoʻomaka ihola ʻo Noa e mahi ʻai, a kanu ihola ia i ka māla waina.
21Inu ihola ia i ka waina, a ʻona; a ua uhi ʻole ʻia ʻo ia i ke kapa ma loko o kona halelewa.
22ʻIke akula ʻo Hama ka makua kāne o Kanaʻana i kahi hilahila o kona makua kāne, a haʻi maila i kona mau hoahānau ʻelua ma waho.
23Lālau akula ʻo Sema lāua ʻo Iapeta i ka ʻaʻahu, a kau ihola ma luna o ko lāua mau poʻohiwi, a hele hope akula lāua, a uhi ihola i kahi hilahila o ko lāua makua kāne; ua huli hope ko lāua mau maka, a ʻike ʻole aku lāua i kahi hilahila o ko lāua makua kāne.
24Ala aʻela ʻo Noa i ka pau ʻana o kona waina, a ʻike ihola ia i ka mea a kāna keiki muli iho i hana aku ai iā ia.
25ʻŌlelo maila ʻo ia,
“E pōʻino nō ʻo Kanaʻana;
He kauā ia na nā kauā
A kona poʻe hoahānau.”
26ʻŌlelo maila hoʻi ʻo ia,
“E hoʻomaikaʻi ʻia ʻo Iēhova,
Ke Akua o Sema;
A ʻo Kanaʻana kāna kauā.
27“E hoʻomāhuahua auaneʻi ke Akua iā Iapeta,
A e noho nō auaneʻi ia ma nā halelewa o Sema;
A ʻo Kanaʻana kāna kauā.”
28¶ A ʻo ko Noa ola ʻana ma hope o ke kai a Kahinaliʻi, ʻakolu ia haneri makahiki a me kanalima.
29ʻO nā lā a pau o Noa, ʻaiwa ia haneri makahiki a me kanalima; a make ihola ia.
Currently Selected:
KA BUKE MUA A MOSE, I KAPA ʻIA KINOHI 9: KBH
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.