KA BUKE MUA A MOSE, I KAPA ʻIA KINOHI 15
15
MOKUNA XV.
1 ʻŌlelo hoʻohoihoi a ke Akua iā ʻAberama. 2 ʻAʻohe āna keiki. 4 Ka ʻōlelo i keiki a me ka poʻe mamo. 6 Hoʻāpono ʻia ʻo ʻAberama ma ka manaʻoʻiʻo. 7 ʻŌlelo hou ke Akua i ka hāʻawi i ka ʻāina, iā Kanaʻana nona. 9 Kā ʻAberama mōhai. 12 Kona hihiʻo. 13 E hele kāna poʻe mamo i ʻAigupita. 18 Ka berita a ke Akua me ia.
1¶ Ma hope mai o ia mau mea, hiki maila ka ʻōlelo a Iēhova iā ʻAberama ma ka hihiʻo, ʻī maila,
“Mai makaʻu ʻoe, e ʻAberama, ʻo wau nō kou pale kaua a me kāu uku nui loa.”
2ʻĪ akula ʻo ʻAberama, “E ka Haku, e Iēhova ē, he aha kāu mea e hāʻawi mai ai iaʻu; no ka mea, ke hele keiki ʻole nei au, a ʻo ka puʻukū o kuʻu hale, ʻo ia ʻo ʻEliezera no Damaseko?”
3ʻĪ akula ʻo ʻAberama, “Aia hoʻi, ʻaʻole ʻoe i hāʻawi mai i keiki naʻu; a ʻo kekahi i hānau i loko o koʻu hale, ʻo ia kuʻu hoʻoilina.”
4Aia hoʻi, hiki maila ka ʻōlelo a Iēhova iā ia, i ka ʻī ʻana mai, “ʻAʻole kēia o kou hoʻoilina; akā, ʻo ka mea e hele mai ana mai loko mai ou iho, ʻo kou hoʻoilina ia.”
5Kaʻi akula ʻo ia iā ia ma waho, ʻī maila, “E nānā aku ʻoe i luna i ka lani, e helu i nā hōkū, inā e hiki iā ʻoe ke helu.” ʻĪ maila kēlā iā ia, “Pēlā auaneʻi kāu poʻe mamo.”
6Manaʻoʻiʻo akula ʻo ia iā Iēhova, a hoʻoili maila ʻo ia ia mea i pono nona.
7ʻĪ maila kēlā iā ia, “ʻO wau nō Iēhova nāna ʻoe i lawe mai nei, mai ʻUra o ko Kaledea mai, e hāʻawi aku nou i kēia ʻāina i wahi e noho ai.”
8ʻĪ akula ia, “E ka Haku, e Iēhova ē, pehea lā au e ʻike ai, e ili mai ana kēia ʻāina noʻu?”
9ʻĪ maila kēlā iā ia, “E lālau ʻoe naʻu i bipi wahine ʻakolu makahiki ona, i kao wahine ʻakolu makahiki ona, i hipa kāne ʻakolu ona makahiki, i manu kuhukukū, a me ka nūnū ʻōpiopio.”
10Lawe maila ʻo ia ia mau mea a pau i ona lā, a mahele aʻela iā lākou ma waena, a waiho ihola i kēlā ʻāpana i kēia ʻāpana e kū pono aku i kona hoa; akā, ʻaʻole ia i mahele i nā manu.
11A lele maila nā manu ma luna iho o nā mōhai, hoʻopuehu akula ʻo ʻAberama iā lākou.
12¶ A i ka napoʻo ʻana o ka lā, ua paʻuhia ʻo ʻAberama i ka hiamoe nui; aia hoʻi, kau maila ka weliweli a me ka pouli nui ma luna iho ona.
13ʻŌlelo maila ia iā ʻAberama, “E ʻike pono ʻoe, e lilo ana kāu poʻe mamo i malihini ma ka ʻāina ʻē ʻaʻole no lākou, a e hoʻokauā aku na lākou; a e hōʻino ʻia mai lākou e kēlā poʻe i nā haneri makahiki ʻehā.
14“A ʻo ua lāhui kanaka lā nāna lākou e hoʻoluhi mai, naʻu lākou e hoʻohewa aku; a ma hope iho, e puka mai lākou i waho me ka waiwai nui.
15“E hui ʻia aku ʻoe i ou mau mākua me ka malu; a e kanu ʻia ʻoe i ka wā ʻelemakule maikaʻi.
16“Akā, e hoʻi hou mai nō lākou i ʻaneʻi i ka hā o ka hanauna; no ka mea, ʻaʻole i lawa ka hewa o kā ʻAmora i nei manawa.”
17A napoʻo ihola ka lā, a pōʻeleʻele ihola, aia hoʻi, neʻe aʻela ka umu ahi e pūnohu ana a me ke kukui e ʻā ana ma waena o ua mau ʻāpana lā.
18Ia lā nō, hoʻopaʻa ihola ʻo ia i berita me ʻAberama, i ka ʻī ʻana mai,
“Ua hāʻawi aku nō wau i kēia ʻāina no kāu poʻe mamo,
Mai ka muliwai o ʻAigupita a hiki aku i ka muliwai nui, ka muliwai ʻo ʻEuperate:
19i kā Kena, i kā Keniza, i kā Kademona,
20i kā Heta, i kā Pereza, me kā Repaima,
21i kā ʻAmora, i kā Kanaʻana, i kā Giregasa, a me kā Iebusa.”
Currently Selected:
KA BUKE MUA A MOSE, I KAPA ʻIA KINOHI 15: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
