KA BUKE MUA A MOSE, I KAPA ʻIA KINOHI 12
12
MOKUNA XII.
1 Kā ke Akua hoʻomaikaʻi ʻana iā ʻAberama a me ka ʻōlelo iā Kristo. 5 Ka hele o lākou me Lota i Sikema ma Kanaʻana. 7 Hāʻawi ʻia Kanaʻana nona. 10 Kona hele i ʻAigupita, a me kona wahaheʻe ʻana. 14 Lawe Paraʻo iā Sarai, a ma hope hoʻihoʻi mai iā ia.
1¶ I ʻōlelo mai ʻo Iēhova iā ʻAberama:
“E hele aku ʻoe mai kou ʻāina aku,
A mai kou poʻe hoahānau aku,
A mai ka hale o kou makua kāne aku,
A hiki i ka ʻāina aʻu e kuhikuhi aku ai iā ʻoe.
2“A e hoʻolilo au iā ʻoe i lāhui kanaka nui,
E hoʻomaikaʻi aku hoʻi au iā ʻoe,
E hoʻokaulana hoʻi au i kou inoa,
A e lilo ʻoe i mea e pōmaikaʻi ai.
3“E hoʻopōmaikaʻi aku hoʻi au i ka poʻe hoʻomaikaʻi iā ʻoe,
A e hōʻino aku au i ka mea hōʻino iā ʻoe,
A iā ʻoe e pōmaikaʻi ai nā ʻohana a pau o ka honua.”
4Hele akula ʻo ʻAberama e like me kā Iēhova i ʻōlelo mai ai iā ia; a hele pū ʻo Lota me ia. He kanahikukumamālima nā makahiki o ʻAberama, i kona wā i hele mai ai mai Harana mai.
5Lawe aʻela ʻo ʻAberama i kāna wahine iā Sarai, a me Lota ke keiki a kona kaikuaʻana, a me ka waiwai a pau a lākou i hōʻiliʻili ai, a me nā ʻōhua a pau i loaʻa iā lākou ma Harana; a puka maila lākou e hele mai i ka ʻāina ʻo Kanaʻana; a hiki maila lākou i ka ʻāina ʻo Kanaʻana.
6Kaʻahele aʻela ʻo ʻAberama i ka ʻāina, a hiki akula i kahi o Sekema, i ka lāʻau ʻoka o More. E noho ana nō nā mamo a Kanaʻana ma ia ʻāina ia manawa.
7ʻIkea aʻela ʻo Iēhova e ʻAberama, ʻī maila ia, “E hāʻawi aku nō wau i kēia ʻāina no kāu poʻe mamo.” Ma laila ʻo ia i hana ai i kuahu no Iēhova, ka mea i ʻikea e ia.
8Hele akula ia mai ia wahi aku a ka puʻu ma ka hikina o Betela, a kūkulu ihola i kona halelewa, ʻo Betela ma ke komohana, a ʻo ʻAi ma ka hikina; ma laila ʻo ia i hana ai i kuahu no Iēhova, a hea akula ia i ka inoa ʻo Iēhova.
9Hele hou akula ʻo ʻAberama e neʻeneʻe ana i ke Kūkulu Hema.
10¶ He wī ma ia ʻāina; a hele akula ʻo ʻAberama i lalo i ʻAigupita e noho malihini ma laila; no ka mea, ua nui loa ka wī ma ka ʻāina.
11A kokoke akula ia e komo i ʻAigupita, ʻī akula ia i kāna wahine iā Sarai, “Eia hoʻi ke ʻike nei au he wahine maikaʻi ʻoe ke nānā ʻia aku.
12“No laila, a ʻike mai ko ʻAigupita iā ʻoe, e ʻōlelo auaneʻi lākou, ʻEia kāna wahine’; a e pepehi mai lākou iaʻu, a e hoʻōla aʻe lākou iā ʻoe.
13“Ke nonoi aku nei au iā ʻoe, e ʻī aku ʻoe, he kaikuahine ʻoe noʻu, i pōmaikaʻi ai au iā ʻoe, a e mālama ʻia kuʻu ola nou.”
14A hiki akula ʻo ʻAberama i ʻAigupita, ʻike maila ko ʻAigupita i ka wahine he maikaʻi loa.
15A ʻike maila nā luna a Paraʻo iā ia, hoʻomaikaʻi lākou iā ia i mua o Paraʻo, a ua lawe ʻia akula ua wahine lā ma ka hale o Paraʻo.
16Lokomaikaʻi maila ʻo ia iā ʻAberama no Sarai; a iā ia nā hipa, nā bipi, nā hoki, nā kauā kāne, nā kauā wahine, nā hoki wahine, a me nā kāmelo.
17Hoʻoʻeha maila ʻo Iēhova iā Paraʻo a me kona poʻe ʻōhua i nā maʻi ʻeha loa, no Sarai ka wahine a ʻAberama.
18Kāhea maila ʻo Paraʻo iā ʻAberama, ʻī maila, “He aha kēia mea āu i hana mai ai iaʻu? No ke aha lā i haʻi ʻole mai ʻoe iaʻu ʻo kāu wahine ia?
19“No ke aha lā ʻoe i ʻōlelo mai ai, ʻʻO koʻu kaikuahine ia,’ i mea e lawe ai au iā ia i wahine naʻu? Eia hoʻi kāu wahine, e lawe ʻoe iā ia, a e hele aku.”
20Kauoha akula ʻo Paraʻo i kona poʻe kānaka nona, a hoʻihoʻi maila lākou iā ia, me kāna wahine, a me kāna mau mea a pau.
Currently Selected:
KA BUKE MUA A MOSE, I KAPA ʻIA KINOHI 12: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
