Yohane 5

Betesda Kpaakpo lɛ naa helatsɛ lɛ tsamɔ

1Enɛ sɛɛ lɛ Yudafoi lɛ agbijurɔ ko bashɛ, ni Yesu tee Yerusalɛm. 2Kpaakpo ko yɛ Yerusalɛm yɛ Toi Agboi lɛ masɛi, ni Hebri wiemɔ mli lɛ atsɛɔ lɛ Betesda, ni koii enumɔ yɛ he. 3Enɛɛmɛi amli helatsɛmɛi pii — shwilafoi, akpakei kɛ obubuafoi — kãmɔ [ni amɛmɛɔ nu lɛ mlitaa. 4Ejaakɛ bei komɛi lɛ ŋwɛi bɔfo ko kpelekeɔ shi kɛbaa kpaakpo lɛ mli ni ebataa nu lɛ mli; kɛkɛ lɛ emlitaa lɛ sɛɛ lɛ, mɔ fɛɛ mɔ ni yagbeɔ nu lɛ mli tsutsu lɛ, hela fɛɛ hela ni eyeɔ lɛ ehe tãa.] 5Nuu ko yɛ jɛi ni ehe eye afii nyɔŋmai etɛ̃ kɛ kpaanyɔ. 6Yesu na lɛ ni ekã shi, ni akɛni ele akɛ etsɛ aahu lɛ, ebi lɛ akɛ, “Oosumɔ akɛ ohe awa bo lo?” 7Helatsɛ lɛ here lɛ nɔ akɛ, “Nuŋtsɔ, mibɛ mɔ ko ni kɛ abata nu lɛ mli ni eeewo mi eyawo kpaakpo lɛ mli; shi kɛ miiya lɛ, mɔ kroko tsɔ̃ɔ mihiɛ eyagbeɔ mli.” 8#Mat 9.6 Yesu kɛɛ lɛ akɛ, “Tee shi, kɔ osaa lɛ, ni onyiɛ!” 9#Yoh 9.14 Ni amrɔ lɛ gbɔmɔ lɛ he wa lɛ, ni ewo esaa lɛ ni enyiɛ.

Shi nakai gbi lɛ hejɔɔmɔ gbi ni. 10#Yer 17.21; Neh 13.19 No hewɔ lɛ, Yudafoi lɛ kɛɛ mɔ ni atsa lɛ akɛ, “hejɔɔmɔ gbi nɛ, obɛ hegbɛ akɛ otereɔ osaa.” 11Ehere amɛ nɔ akɛ, “Mɔ ni tsa mi lɛ, lɛ ekɛɛ mi akɛ, ‘Kɔ osaa lɛ ni onyiɛ.’ ” 12Amɛbi lɛ akɛ, “Namɔ ji mɔ ni kɛɛ bo akɛ, ‘Kɔ osaa lɛ ni onyiɛ’ lɛ?” 13Shi mɔ ni atsa lɛ leee mɔ ni ji; ejaakɛ mɛi pii yɛ jɛi, ni Yesu egbala ehe shi. 14#Yoh 8.11 Fee sɛɛ lɛ Yesu yana lɛ yɛ Sɔlemɔ we lɛ, ni ekɛɛ lɛ akɛ, “Naa, ohe ewa bo; kaafee esha dɔŋŋ, koni efɔŋ ni fe tsutsu nɔ lɛ akaba onɔ.” 15Nuu lɛ yiŋ etee ni eyagba Yudafoi lɛ akɛ Yesu ji mɔ ni tsa lɛ lɛ.

16 # Mat 12.14 No hewɔ lɛ, Yudafoi lɛ jie amɛhiɛ amɛka Yesu, ejaakɛ hejɔɔmɔ gbi lɛ nɔ efee nii nɛɛ. 17#Yoh 9.4 Shi Yesu here amɛ nɔ ekɛɛ, “MiTsɛ miitsu nii kɛbashi be nɛ, ni mi hu miitsu.” 18#Yoh 7.30; 10.33 No hewɔ titri Yudafoi lɛ taoɔ lɛ agbe lɛ, ejaakɛ jeee akɛ ebule hejɔɔmɔ gbi lɛ kɛkɛ, shi asaŋ etsɛ Nyɔŋmɔ akɛ lɛ diɛŋtsɛ eTsɛ, ni efee ehe akɛ mɔ ko ni kɛ Nyɔŋmɔ ye hegbɔ.

Hegbɛ ni Bi lɛ yɔɔ

19 # Yoh 3.11, 32 No hewɔ lɛ, Yesu here nɔ ekɛɛ amɛ akɛ, “Anɔkwale mikɛɔ nyɛ akɛ, Bi lɛ diɛŋtsɛ nyɛŋ eto eyiŋ efee nɔ ko, ja nɔ ni ena akɛ Tsɛ lɛ miifee; ejaakɛ nibii fɛɛ ni Tsɛ lɛ feɔ lɛ, nomɛi nɔŋŋ Bi lɛ hu feɔ. 20#Yoh 3.35 Ejaakɛ Tsɛ lɛ sumɔɔ Bi lɛ, ni etsɔ̃ɔ lɛ nibii fiaa ni lɛ diɛŋtsɛ efeɔ lɛ, ni eeetsɔ̃ɔ lɛ nitsumɔi wuji ni fe enɛɛmɛi tete, ni nyɛnaa aaakpɛ nyɛhe. 21Ejaakɛ bɔ ni Tsɛ lɛ teɔ gbohii ashi ni ehãa amɛ wala lɛ, nakai nɔŋŋ Bi lɛ hu hãa mɛi ni esumɔɔ lɛ wala. 22#Dan 7.13, 14; Bɔf 17.31 Ejaakɛ Tsɛ lɛ ekojooo mɔ ko, shi moŋ etu kojomɔ lɛ fɛɛ ewo Bi lɛ dɛŋ; 23#Fil 2.10, 11; 1 Yoh 2.23 koni mɛi fɛɛ abu Bi lɛ, tamɔ bɔ ni amɛbuɔ Tsɛ lɛ. Mɔ ni ebuuu Bi lɛ, ebuuu Tsɛ lɛ ni tsu lɛ lɛ hu.

24 # Yoh 3.16, 18 “Anɔkwale mikɛɔ nyɛ akɛ, mɔ ni nuɔ miwiemɔ ni eheɔ mɔ ni tsu mi lɛ eyeɔ lɛ, eyɛ naanɔ wala, ni ebaŋ kojomɔ mli, shi moŋ efo mli yɛ gbele mli kɛtee wala mli. 25#Efes 2.5, 6 Anɔkwale mikɛɔ nyɛ akɛ: ŋmɛlɛtswaa lɛ miiba, ni eshɛ etã, ni gbohii lɛ aaanu Nyɔŋmɔ Bi lɛ gbee, ni mɛi ni nuɔ lɛ aaana wala. 26#Yoh 1.1-4 Ejaakɛ bɔ ni Tsɛ lɛ yɔɔ wala yɛ lɛ diɛŋtsɛ emli lɛ, nakai nɔŋŋ ehã Bi lɛ wala yɛ lɛ diɛŋtsɛ emli. 27#Yoh 5.22 Ni ehã lɛ hegbɛ akɛ ekojo hu, ejaakɛ lɛ ji Gbɔmɔ Bi lɛ. 28Enɛ akafee nyɛ naakpɛɛ; ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui amli lɛ aaanu egbee, 29#Yoh 6.40; Dan 12.2 ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.”

Nii ni yeɔ Yesu he odase

30 # Yoh 5.19; 6.38 “Mi diɛŋtsɛ minyɛŋ miyiŋ mato mafee nɔ ko; bɔ ni minuɔ lɛ nakai mikojoɔ, ni mikojomɔ lɛ jalɛ kojomɔ ni, ejaakɛ mitaooo nɔ ni mi diɛŋtsɛ misumɔɔ, shi moŋ nɔ ni mɔ ni tsu mi lɛ sumɔɔ. 31Kɛji mi diɛŋtsɛ mihe odase miyeɔ lɛ, midase lɛ jeee anɔkwale. 32#Yoh 5.36, 37 Mɔ kroko yɛ ni yeɔ mihe odase, ni mile akɛ odase ni eyeɔ yɛ mihe lɛ anɔkwaleŋ. 33#Yoh 1.19-27; 19.34 Nyɛ lɛ nyɛtsu atee Yohane ŋɔɔ, ni eye anɔkwale lɛ he odase. 34Shi mi lɛ, mikɛ mihe efɔ̃ɔɔ gbɔmɔ ko odase nɔ; shi bɔ ni afee ni ahere nyɛyiwala hewɔ miwieɔ enɛɛmɛi nɛɛ. 35Yohane ji kane ni tsoɔ ni ekpɛɔ lɛ, shi nyɛ lɛ, nyɛsumɔ akɛ nyɛmli afili nyɛ be kukuoo kɛkɛ yɛ elá lɛ mli. 36#1 Yoh 5.9; Yoh 1.33; 3.2; 3.27-30 Shi mi lɛ, miyɛ odase ni fe Yohane nɔ lɛ; ejaakɛ nitsumɔi lɛ ni Tsɛ lɛ ehã mi akɛ migbe naa lɛ, nakai nitsumɔi ni mitsuɔ lɛ nɔŋŋ yeɔ mihe odase akɛ Tsɛ lɛ tsu mi. 37#Mat 3.17; Mar 1.11; Luk 3.22 Ni Tsɛ lɛ ni tsu mi lɛ, lɛ diɛŋtsɛ eye mihe odase. Nyɛnuko egbee dã lɛ, asaŋ nyɛnako esubaŋ dã; 38ni ewiemɔ lɛ mɔɔɔ shi yɛ nyɛmli, ejaakɛ nyɛheee mɔ ni etsu lɛ nyɛyeee. 39#Luk 24.27; 2 Tim 3.15-17 Nyɛtaoɔ ŋmalɛi lɛ amli, ejaakɛ nyɛ diɛŋtsɛ nyɛsusuɔ akɛ nomɛi amli nyɛnaa naanɔ wala yɛ; ni nomɛi nɔŋŋ ji nii ni yeɔ mihe odase lɛ. 40Kɛ̃lɛ nyɛsumɔɔɔ akɛ nyɛbaa miŋɔɔ ni nyɛna wala.

41“Mitaooo gbɔmɛi ahiɛnyam. 42Shi moŋ mikpa nyɛ shi akɛ nyɛbɛ Nyɔŋmɔ suɔmɔ yɛ nyɛmli. 43Mi lɛ miba yɛ miTsɛ gbɛi mli, ni nyɛhereee mi; kɛji mɔ kroko ba yɛ lɛ diɛŋtsɛ egbɛi mli lɛ, lɛ lɛ nyɛaahere lɛ. 44#Yoh 12.43 Te aaafee tɛŋŋ ni nyɛaanyɛ nyɛhe nyɛyeŋ, nyɛ ni nyɛtaoɔ anunyam yɛ nyɛteaŋ, shi anunyam ni jɛɔ Nyɔŋmɔ koome lɛ ŋɔɔ lɛ nyɛdii sɛɛ lɛ? 45#Deut 31.26 Nyɛkasusua akɛ mi mibafolɔ nyɛnaa mahã Tsɛ lɛ; mɔ ko yɛ ni miifolɔ nyɛnaa, lɛ ji Mose, mɔ nɔ ni nyɛŋɔ nyɛhiɛ nyɛfɔ̃ lɛ. 46#Jɛn 3.15; 49.10; Deut 18.15 Shi eji nyɛhe Mose nyɛye kulɛ, mi hu nyɛaahe mi nyɛye; ejaakɛ mihe sane eŋma lɛ. 47#Luk 16.31 Shi kɛji nyɛheee eŋmalɛi lɛ nyɛyeee lɛ, te aaafee tɛŋŋ ni nyɛaahe miwiemɔi lɛ nyɛyeŋ?”

Currently Selected:

Yohane 5: NEGAB

Highlight

Copy