Yohane 1

Wiemɔ lɛ tsɔ̃ heloo

1 # Yoh 17.5; 1 Yoh 1.1-2; Kpoj 19.13 Shishijee mli lɛ Wiemɔ lɛ yɛ momo, ni Wiemɔ lɛ kɛ Nyɔŋmɔ yɔɔ ni Wiemɔ lɛ Nyɔŋmɔ ni. 2#Abɛi 8.22 Lɛ nɔŋŋ shishijee mli lɛ ekɛ Nyɔŋmɔ yɔɔ. 3#Kol 1.16-17; Heb 1.2 Lɛ enɔ atsɔ̃ afee nibii fɛɛ, ni ashiii lɛ afeee nɔ ko nɔ ko ni afee. 4#Yoh 5.26 Emli wala yɔɔ, ni wala lɛ ji gbɔmɛi ala lɛ; 5#Yoh 3.19 ni la lɛ tsoɔ yɛ duŋ lɛ mli, ni duŋ lɛ nyɛɛɛ enɔ eye.

6 # Luk 1.13-17, 57-80; Mat 3.1; Mar 1.4 Nuu ko yɛ ni Nyɔŋmɔ tsu lɛ kɛba, atsɛɔ lɛ Yohane. 7Eba odaseyeli, ni ebaye la lɛ he odase koni mɛi fɛɛ atsɔ̃ enɔ ahe aye. 8#Yoh 1.20 Jeee lɛ diɛŋtsɛ ji la lɛ; shi moŋ eba la lɛ he odaseyeli. 9Anɔkwa la lɛ ni tsoɔ hãa mɔ fɛɛ mɔ lɛ baa je lɛ mli nɛɛ. 10#Yoh 1.3-5 Je lɛ mli la lɛ yɔɔ, ni enɔ atsɔ̃ afee je lɛ, shi je lɛ leee lɛ. 11Lɛ diɛŋtsɛ emɛi aŋɔɔ eba, ni mɛi ni ji lɛ diɛŋtsɛ emaŋbii lɛ hereee lɛ. 12#Gal 3.26 Shi mɛi abɔ ni here lɛ, ni amɛhe egbɛi lɛ nɔ amɛye lɛ, ehã amɛ hegbɛ akɛ amɛtsɔ̃mɔ Nyɔŋmɔ bii, 13#Yoh 3.5, 6 mɛi ni jeee lá loo heloo loo nuu ko suɔmɔ naa afɔ amɛ yɛ, shi moŋ Nyɔŋmɔ fɔ amɛ. 14#Yes 7.14; 2 Pet 1.16-17 Ni Wiemɔ lɛ tsɔ̃ gbɔmɔ adesa, ni ebahi shi yɛ wɔteŋ, ni wɔna enunyam lɛ akɛ Tsɛ lɛ Bi koome lɛ anunyam, ni dromɔ kɛ anɔkwale eyi lɛ obɔ̃.

Yohane Baptisilɔ lɛ ye Yesu he odase

(Mateo 3.1-12; Marko 1.6-8; Luka 3.15-17)

15 # Yoh 1.27, 30 Yohane ye ehe odase ni ebo ekɛɛ, “Mɔ nɛ ji mɔ ni mikɛɛ yɛ ehe akɛ, ‘Mɔ ni baa yɛ misɛɛ lɛ efe mi, etsɔ̃ mihiɛ, ejaakɛ eyɛ dani miyɔɔ lɛ.’ ” 16#Yoh 3.34; Kol 1.19 Ejaakɛ ebɔ̃yimɔ lɛ mli jɛ ni wɔ fɛɛ wɔna dromɔ wɔshi dromɔ nɔ. 17#Rom 10.4 Ejaakɛ Mla lɛ, Mose nɔ atsɔ̃ akɛhã; shi dromɔ kɛ anɔkwale lɛ, Yesu Kristo nɔ etsɔ̃ kɛba. 18#Yoh 6.46; 1 Yoh 4.12; Mat 11.27 Nyɔŋmɔ lɛ, mɔ ko enako lɛ pɛŋ; Bi koome ni yɔɔ Tsɛ lɛ mlishi lɛ, lɛ ebajie lɛ shi etsɔ̃ɔ faŋŋ.

19 # Luk 3.15, 16 Ni enɛ ji Yohane odase ni eye be ni Yudafoi lɛ tsu osɔfoi kɛ Levibii kɛjɛ Yerusalɛm ni amɛbabi lɛ akɛ, “Namɔ ji bo?” lɛ. 20Ni egba mli faŋŋ ni eshiuuu nɔ, ni egba mli akɛ, “Jeee mi ji Kristo lɛ.” 21#Mat 17.10; Deut 18.15; Mal 4.5 Ni amɛbi lɛ akɛ, “Namɔ ji bo mɔ? Elia ji bo?” Ni ekɛɛ, “Jeee lɛ ji mi.” Gbalɔ lɛ ji bo? Ni ehere nɔ ekɛɛ, “Dabi.” 22No hewɔ lɛ, amɛbi lɛ akɛ, “Namɔ ji bo? (Kɛɛmɔ wɔ) koni wɔna hetoo ko wɔyahã mɛi ni tsu wɔ lɛ; Te okɛɔ yɛ bo diɛŋtsɛ ohe tɛŋŋ?” 23#Yes 40.3; Mat 3.3; Mar 1.3; Luk 3.4 Ekɛɛ,

“Mi ji mɔ gbee ni boɔ yɛ ŋa lɛ nɔ akɛ,

‘Nyɛjajea Nuŋtsɔ lɛ gbɛ lɛ,’ ”

tamɔ bɔ ni gbalɔ Yesaia kɛɛ lɛ.

24Ni mɛi ni atsu lɛ jɛ Farisifoi lɛ ateŋ; 25ni amɛbi lɛ akɛ, “Kɛjeee Kristo lɛ loo Elia loo gbalɔ lɛ ji bo lɛ, mɛɛ hewɔ obaptisiɔ mɔ?” 26#Mat 3.11; Mar 1.7-8 Yohane here amɛ nɔ ekɛɛ, “Mi lɛ mibaptisiɔ yɛ nu mli, shi mɔ ko damɔ nyɛteŋ ni nyɛ lɛ nyɛleee lɛ, 27#Yoh 3.26 lɛ ji mɔ ni baa yɛ misɛɛ, mɔ tokota naakpãa ni misaaa mɔ ni fɛneɔ lɛ.” 28Afee nii nɛɛ yɛ Betania, yɛ Yordan sɛɛ, he ni Yohane baptisiɔ yɛ lɛ.

Nyɔŋmɔ Toobi lɛ

29 # Yoh 1.36; Yes 53.7 Enɔ jetsɛremɔ lɛ Yohane na Yesu miiba eŋɔɔ ni ekɛɛ, “Naa Nyɔŋmɔ Toobi lɛ ni woɔ je lɛ esha lɛ kɛyaa lɛ! 30#Yoh 1.15, 27 Mɔ nɛ ji mɔ ni mikɛɛ yɛ ehe akɛ, ‘Nuu ko miiba yɛ misɛɛ ni etsɔ̃ mihiɛ, ejaakɛ eyɛ dani miyɔɔ lɛ.’ 31Ni mi lɛ́ mileee lɛ, shi moŋ bɔ ni afee ni ajie lɛ kpo atsɔ̃ɔ Israel hewɔ, ni miba mibaptisiɔ yɛ nu mli nɛɛ.” 32#Mat 3.15; Mar 1.10; Luk 3.22 Ni Yohane ye odase ekɛɛ, “Mina Mumɔ lɛ yi shi kɛjɛ ŋwɛi tamɔ okpo, ni ebahi enɔ. 33#Luk 3.2 Ni mi lɛ mileee lɛ, shi mɔ ni tsu mi akɛ mibaptisi yɛ nu mli lɛ, lɛ nɔŋŋ ekɛɛ mi akɛ, ‘Mɔ nɔ ni ooona akɛ Mumɔ lɛ yiɔ ni ehiɔ enɔ lɛ, lɛ ji mɔ ni baptisiɔ yɛ Mumɔ Krɔŋkrɔŋ mli lɛ.’ 34Ni mina, ni miye he odase akɛ, Nyɔŋmɔ Bi lɛ nɛ.”

Kaselɔi ni atsɛ klɛŋklɛŋ lɛ

35Asaŋ enɔ jetsɛremɔ lɛ Yohane kɛ ekaselɔi lɛ ateŋ mɛi enyɔ damɔ shi; 36#Yoh 1.29 ni be ni Yesu hoɔ lɛ, ekwɛ lɛ ni ekɛɛ, “Naa Nyɔŋmɔ Toobi lɛ!” 37Ni kaselɔi enyɔ lɛ nu ewiemɔ lɛ, ni amɛyanyiɛ Yesu sɛɛ. 38Ni Yesu tsɔ̃ ehe, ni be ni ena akɛ amɛnyiɛ esɛɛ lɛ, ebi amɛ akɛ, “Mɛni nyɛtaoɔ?” Ni amɛkɛɛ lɛ akɛ, “Rabi” (eshishi ji: Tsɔɔlɔ), “Nɛgbɛ ohiɔ?” 39Ekɛɛ amɛ akɛ, “Nyɛbaa ni nyɛbakwɛa.” No hewɔ lɛ, amɛtee ni amɛyana he ni ehiɔ lɛ, ni amɛkɛ lɛ hi shi nakai gbi lɛ. Ni gbɛkɛ ŋmɛji ejwɛ mli ni. 40Mɛi enyɔ lɛ ni nu ni Yohane wie ni amɛyanyiɛ Yesu sɛɛ lɛ ateŋ mɔ kome ji Andrea, Simon Petro nyɛmi lɛ. 41#1 Sam 2.10; Lal 2.2 Lɛ eyana lɛ diɛŋtsɛ enyɛmi Simon tsutsu, ni ekɛɛ lɛ akɛ, “Wɔna Mesia (ni eshishi ji Kristo,) loo (mɔ ni afɔ lɛ mu) lɛ.” 42#Mat 16.18 Ni ekɛ lɛ ba Yesu ŋɔɔ. Ni Yesu kwɛ lɛ ni ekɛɛ, “Bo ji Simon, Yona bi lɛ, aaatsɛ bo Kefa (eshishi ji Petro loo tɛsaa).”

43Enɔ jetsɛremɔ lɛ Yesu miitao akɛ eyaa Galilea, ni ena Filipo; ni Yesu kɛɛ lɛ akɛ, “Nyiɛmɔ misɛɛ!” 44Shi Filipo jɛ Betsaida, Andrea kɛ Petro maŋ lɛ mli. 45#Deut 18.18; Yes 7.14; 53.2; Yer 23.5; Eze 34.23 Filipo hu na Natanael, ni ekɛɛ lɛ akɛ, “Wɔna mɔ ni Mose ŋma ehe sane yɛ Mla lɛ mli, kɛ mɔ ni gbalɔi lɛ hu ŋma ehe sane lɛ, Yesu, Yosef bi ni jɛ Nazaret lɛ.” 46#Yoh 7.41 Ni Natanael kɛɛ lɛ akɛ, “Ani nɔ ko kpakpa ko aaanyɛ ajɛ Nazaret?” Filipo kɛɛ lɛ akɛ, “Ba ni obakwɛ.” 47Yesu na Natanael miiba eŋɔɔ, ni ekɛɛ yɛ ehe akɛ, “Naa anɔkwa Israelnyo, mɔ mli ni apasa bɛ lɛ.” 48Natanael bi lɛ akɛ, “Nɛgbɛ ole mi yɛ?” Yesu here nɔ ni ekɛɛ lɛ akɛ, “Mina bo fɛɛ dã ni Filipo tsɛ bo, be mli ni oyɔɔ agbãmitso lɛ shishi lɛ.” 49#2 Sam 7.14; Lal 2.7; Yoh 6.69; Mat 14.33; 16.16 Natanael here nɔ ni ekɛɛ lɛ akɛ, “Rabi, bo ji Nyɔŋmɔ Bi lɛ, bo ji Israel Maŋtsɛ lɛ.” 50Yesu here nɔ ni ekɛɛ lɛ akɛ, “Ni mikɛɛ bo akɛ mina bo yɛ agbãmitso lɛ shishi lɛ hewɔ oheɔ oyeɔ nɛɛ? Ooona nii wuji ni fe enɛ.” 51#Jɛn 28.12 Ni etee nɔ ekɛɛ lɛ akɛ, “Anɔkwale mikɛɔ nyɛ akɛ, kɛjɛ be nɛɛ nɔ lɛ nyɛaana akɛ ŋwɛi naa kã ni Nyɔŋmɔ bɔfoi lɛ miikwɔ miikpeleke yɛ Gbɔmɔ Bi lɛ nɔ.”

Currently Selected:

Yohane 1: NEGAB

Highlight

Copy