Jɛnɛsis 39

Yosef kɛ Potifar ŋa lɛ

1Ishmaelbii lɛ kɛ Yosef tee Ijipt, ni amɛyahɔ̃ɔ lɛ amɛhã Potifar, ni ji Farao piafonyo kɛ eblafoiatsɛ lɛ. 2#Bɔf 7.9 Yehowa kɛ Yosef yɛ, ni ehã efee nɔbatsɛ. 3Enuŋtsɔ Ijiptnyo lɛ we lɛ eyɔɔ. Potifar na akɛ Yehowa kɛ Yosef yɛ, ni ehãa nɔ fɛɛ nɔ ni Yosef feɔ lɛ shwereɔ yɛ edɛŋ. 4Enɛ hã Yosef na hiɛ yɛ enuŋtsɔ lɛ hiɛ, ni lɛ esɔ̃mɔɔ enuŋtsɔ lɛ. Potifar fee Yosef ewe lɛ nɔkwɛlɔ nukpa ni etu nɔ fɛɛ nɔ ni eyɔɔ lɛ ewo edɛŋ. 5#Jɛn 30.27 Kɛjɛ gbi nɔ ni Ijiptnyo lɛ wo Yosef onukpa yɛ ewe lɛ kɛ nɔ fɛɛ nɔ ni eyɔɔ lɛ nɔ lɛ, Yehowa jɔɔ Ijiptnyo lɛ we lɛ yɛ Yosef hewɔ. Yehowa jɔɔmɔ ba Ijiptnyo lɛ shĩa nii kɛ eŋmɔshi nii fɛɛ nɔ. 6No hewɔ lɛ, Potifar tu enibii fɛɛ ni eyɔɔ lɛ ewo Yosef dɛŋ, ni egbaaa ehe naa yɛ nɔ ko nɔ ko he ja nɔ ni ebaaye kɛkɛ.

Kɛji ona Yosef lɛ ehe yɛ fɛo naakpa. 7#Abɛi 5.3 Yɛ mli aahu lɛ, enuŋtsɔ lɛ ŋa lɛ kɛ hiŋmɛi ko bɔi Yosef kwɛmɔ ni ekɛɛ lɛ akɛ, “Okɛ mi abawɔ.” 8Ni Yosef ekpɛlɛ̃ɛɛ; shi ekɛɛ, “Minuŋtsɔ gbaaa ehe naa yɛ enɔ ko nɔ ko he yɛ shĩa nɛɛ, ejaakɛ etu enii fɛɛ ni eyɔɔ lɛ ewo midɛŋ. 9Ehã mi hewalɛ yɛ shĩa nɛɛ nɔ tamɔ lɛ diɛŋtsɛ nɔŋŋ, ni ekãmãaa mi nɔ ko nɔ ko akɛ ja bo pɛ kɛkɛ; ejaakɛ bo lɛ eŋa ji bo. Te aaafee tɛŋŋ mɔ ni mafee efɔŋ kpeteŋkple ni tamɔ nɛkɛ hu ni mafee esha mashi Nyɔŋmɔ hu?” 10#Ɛks 20.14 Yoo lɛ hiɛ Yosef kɛ wiemɔ daa nɛɛ, shi Yosef eŋɔɔɔ nɔ ni ekɛ lɛ awɔ aloo ebɛŋkɛ lɛ.

11Ni eba mli akɛ gbi lɛ eko lɛ, Yosef tee shĩa lɛ eyaatsu nii. Shĩa lɛ mli bii lɛ ekoeko bɛ. 12Kɛkɛ ni yoo lɛ mɔ Yosef atade lɛ mli ni ekɛɛ, “Okɛ mi abawɔ!” Shi Yosef shi etade lɛ ewo edɛŋ, ni ejo foi kɛje kpo. 13Be ni yoo lɛ na akɛ Yosef eshi etade lɛ yɛ edɛŋ ni ejo foi kɛje kpo lɛ, 14etsɛ eshiaŋ bii lɛ, ni ekɛɛ amɛ akɛ, “Nyɛbakwɛa nɔ ko! Miwu eyaŋɔ Hebrinyo bi nɛɛ kɛba shĩa nɛɛ koni ebaye wɔhe fɛo. Eba miŋɔɔ koni ekɛ mi abawɔ, ni mibolɔ waa. 15Ni be ni ena akɛ miwo migbee nɔ miibolɔ waa lɛ, eshi etade lɛ efɔ̃ mimasɛi, ni ejo foi kɛje kpo.”

16Kɛkɛ ni ekɛ Yosef atade lɛ fɔ̃ emasɛi kɛyashi Yosef nuŋtsɔ lɛ ba shĩa. 17Kɛkɛ ni eyajaje sane lɛ etsɔ̃ɔ ewu lɛ ekɛɛ, “Nyɔŋnuu Hebrinyo lɛ ni okɛba shĩa nɛɛ lɛ, eba ni ebahɔlɔ mi. 18Shi be ni mibo waa lɛ, eshi etade lɛ ehã mi, ni ejo foi.”

19Be ni Yosef nuŋtsɔ lɛ nu sane ni eŋa lɛ jaje etsɔ̃ɔ lɛ lɛ akɛ, “Bɔ ni onyɔŋnuu lɛ bafee mi nɛ” lɛ, emli wo la naakpa. 20Ni Yosef nuŋtsɔ lɛ mɔ lɛ, ni eyawo lɛ tsuŋ yɛ he ni awoɔ maŋtsɛ lɛ gboklɛfoi atsuŋ yɛ lɛ, jɛi Yosef hi. 21#Bɔf 7.9 Shi Yehowa kɛ Yosef yɛ. Ena lɛ mɔbɔ ni ehã ena hiɛ yɛ gboklɛfoi akwɛlɔ lɛ hiɛ. 22Gboklɛfoi akwɛlɔ lɛ tu gboklɛfoi fɛɛ ni yɔɔ tsu lɛ mli lɛ ewo Yosef dɛŋ, ni nɔ fɛɛ nɔ ni atsuɔ yɛ jɛi lɛ, Yosef ni kwɛɔ nɔ. 23Gboklɛfoi akwɛlɔ lɛ gbaaa ehe naa yɛ nii ni etu ewo Yosef dɛŋ lɛ he, ejaakɛ Yehowa kɛ Yosef yɛ, ni nɔ fɛɛ nɔ ni efeɔ lɛ, Yehowa hãa eyeɔ omanye.

Currently Selected:

Jɛnɛsis 39: NEGAB

Highlight

Copy