Juɛl a pwɔdɛn tɛ Mak 8

1TƐ ɣoŋkɛ nɛnɛ ma ballɛ a coŋɛn a coŋɛn, ɔci wakɛ amtɛn bawɛ; Yecu bortɛ makɛ botɛn, ɔci gɔkjɛn eken ti: 2Yum Ya pɔkɛ tɛ makɛ coŋɛn. Aca ninkɛ aŋɛ a dorgɔ, ɔci ma ballɛ tɛ Ya, ɔci wakɛ amtɛn bawɛ ma ti. 3Kan ma otɛ Ya ban ji, ma bildɛ tɛ yum; ma bɛnɛ a cwɔkɛn bɛ. 4Ɔci makɛ botɛn gɔkjɛn Eke ti: Non a nɛnɛ a wuwɛ; ikin yakin ti wɛtin ma am a ɔki? 5Yecu tocɛ ma ti: Am kicra ballɛ yɛke ti aŋɛ yitɛn? Ma gɔkjɛ: Am kicra ballɛ a intu witkɛn ayo. 6Yecu gɔkjɛ, aŋkɛ ma cocɛn inyu tɛra ji; ɔci am kicra luldɛ, ɔci muortɛ Juɔŋ a Tolɛn ti, am wɛtɛn, yonnɛn tɛ makɛ botɛn; aŋkɛ makɛ coŋɛn wɛtɛn wakɛnda. 7Ɔci yak tɔlgɛn ballɛ a diɛkɛn: Yecu muortɛ Juɔŋ a Tolɛn ti tha nɛnɛ, Eke makɛ wɛtkɛ mokɛ. 8Ɔci ma omɛn nɛ tolɛn ɔci munɛn: ma limmɛ wakɛ dulɛn, ɔci ɔden kwumɛn a intu witkɛn ayo. 9Ma omɛn a elp a ŋanɔ: ɔci ma ɔgdɛ otɛ Eke ban ji. 10Aca nɛntɛ Yecu kacɛn bumɛ ji yakɛn makɛ botɛn, bɛnɛ tɛ ban Dalmanuta.

11Ɔci ma Paraci bɛnɛ, ɔci tocɛ Yecu ti, lirtɛ Eke noŋdɛ kijɛ wakɛ tɛ nyalɔ, aŋkɛ lupɛ Eke ti. 12Yecu wiagɛ yumɛ ti, ɔci gɔkjɛ: Ɣɛke a kegen a ɔki? lirtɛ aginɛ naŋɛ tɛ nyalɔ ɣogɛ? Ya gɔkjɛn a warɛ ɣɛke ti: Aginɛ kiejɛ Juɔŋ a Tolɛn bawɛ ɣɛke ti. 13Ɔci ma dulɛn Eke, ɔci kacɛn bumɛ ji mokɛ, atɛn kwɔca.

14Ma nyingɛ wiɛrtɛn tɛ am a edɛn ti; ɔci am kicra ballɛ a ciɛlɔ parɛ. 15Yecu gɔkjɛ ma ti: Waŋ tiicɛ, gwɔlɛ nyamgɛ ma Paraci ti ɔci nyamgɛ ma Kerod ti. 16Ɔci eken tocɛ a tatɛ pokɛn, gɔkjɛn: Am ɔn bawɛ. 17Yecu gɔrcɛn jig eken, gɔkjɛn: Ɣɛke pukɛ ɔŋ, ɣogɛ? am ɣɛke bawɛ. Juɛl yowɛrnɛ bɛ, ɣɛke jithɛ bawɛ? 18Ɣɛke yumgɛn dil a dil? Nyingɛ ballɛ, gɔrcɛ bɛ? Ɔci nyingɛ wiɛrtɛn? 19Tɛ am kicra a intu wɛnɛ Ya tɛ ma a elp a intu, am a dulɛn ɔden lulɛn ma aŋɛ yitɛn? Ɔci ma gɔkjɛ: Ɔden a inyakɛn witkɛn ayo. 20Ɔci am kicra a intu witkɛn ayo wɛnɛn Ya tɛ ma a elp a ŋanɔ, yɛke limmɛ am dulɛn ma ɔden aŋɛ yitɛn? Ɔci eken gɔkjɛ Yecu ti: Ɔden a intu witkɛn ayo. 21Ɔci Eke gɔkjɛ ma ti: Ɣɛke jiɛtkɛ min bawɛ?

22Ɔci ma atɛn Betcaida. Ma ɛcɛn minɛ nyingɛ yolɛn, nyiwɛ Yecu ti aŋkɛ minɛ tabdɛ. 23Ɔci Yecu muŋɛ minɛ tɛ biŋɛ, lɔdɛ tɛ ban taŋɛ ti; ɔci tɛ nyan ulɛ Eke nyingɛ ti, ɔci nyingɛ bamdɛ tɛ biŋkɛ, tocɛ eke ti: Aginɛ ballɛ yowɛrtɛ? 24Minɛ gɔrcɛ nyalɔ, gɔkjɛn: Ya gɔrcɛ maban ballɛ ba jan atɛn a wun. 25Wontɛ Yecu tupcɛn minɛ nyingɛ ti; ɔci minɛ gɔrcɛn nɛ tɛyɛn, ɔci nyingɛ pwɔnɛ, aŋkɛ eke gɔrcɛn wakɛ nɛ pwɔdɛn. 26Ɔci minɛ atɛ ta Yecu ban ji, ɔci Yecu gɔkjɛn: Otɛ puwɛ, botɛ ban jinyɛ bɛ.

27Ɔci Yecu atɛ yakɛn makɛ mwuŋɛ Eke, tɛ bunkɛ Cijeray Pilipay: tɛ pɔy yumɛ ti Yecu tocɛ ma ti, gɔkjɛ: Ma gɔkjɛ Ya a minɛ? 28Eke myitkɛ ma, gɔkjɛn: I a Jɔn minɛ baptaijɛ: ɔci makɛ pokɛn gɔkjɛ, I a Ilaja; ɔci makɛ pokɛn gɔkjɛ, I a minɛ nebi parɛ. 29Yecu tocɛ eken ti: Dalɛ ɣɛke gɔkjɛ Ya a minɛ? Peter gɔkjɛ: I a Kitho. 30Yecu gɔkjɛ na minɛ a ciɛlɔ mitkɛ bɛ tɛ Eke a minɛ. 31Ɔci Yecu noŋdɛ lotɛ ma tɛ juɛl Tɔl Maban, aŋkɛ yanɛ tɛ wakɛ coŋɛn, ɔci kɛktɛn ta makɛ dwɔŋɛn yakɛn makɛ tolɛn, ma a gɔrcɛ wakɛ Juɔŋ a Tolɛn ti, yakɛn makɛ kijɛ wɛragɛ, ɔci Eke nhugdɛ, ɔci nɛ ninkɛ badɛ a dorgɔ jɔŋdɛ nyalɔ mokɛ. 32Yecu gɔkjɛ juɛl tɛ burɛ makɛ coŋɛn ti. Ɔci Peter yuokɛn tɛ juɛl a nɛnɛ, ɔci lupɛ Eke ti. 33Ɔci Yecu warɛ yalɛn, makɛ botɛn gwɔldɛn, gɔkjɛn Peter ti ɔŋ: I ɔgdɛ otɛ Ya ŋwoyɛ ti, Cetan: wakɛ Juɔŋ a Tolɛn ti a gwɔldɛ i bɛ, wakɛ maban ti gwɔldɛn. 34Yecu borcɛ makɛ coŋɛn ti yakɛn makɛ botɛn, ɔci gɔkjɛn eken ti: Kan minɛ toktɛ botɛ Ya, dalɛ eke kɛktɛ warɛ ekta, ɔci mugdɛ kakɛn eke, botɛn Ya. 35Kan minɛ ballɛ bwɔgɛ yuucɛ yum eke, yum daktɛn; ɔci kan minɛ ballɛ yum daktɛn tha yintɛ Ya ɔci daktɛn tha juɛl a pwɔdɛn, yum aŋkɛ yuɔdɛ kan. 36Kan minɛ muŋɛ wakɛ tɛra ji warɛda, ɔci yum dakyɛn, naŋkɛ eke a pwɔcɛn a ɔki? 37Minɛ yum dutɛn ti tɛ a wakɛ? 38Maban aca a makɛ tubɛn ɔci a makɛ nɔdkɛ; minɛ ballɛ yum bawɛ tɛ Ya, ɔci bawɛ tɛ juɛl Ya, tɛ ɣoŋ a bɛdɛn Tɔl Maban, yum Ekta bawɛ minɛ ti. Tɔl Maban ballɛ bɛyɛn yakɛn makɛ enjel bɔwɛn tɛ aginɛ pwɔn a pwɔn Wegen ti.

Currently Selected:

Juɛl a pwɔdɛn tɛ Mak 8: MFZ1947

Highlight

Copy