Juɛl a pwɔdɛn tɛ Mak 11

1TƐ eken bɛnɛ tɛ Jerucalem cwɔkɛn, tɛ Betpajɛ ɔci Betani, tɛ pom Ɔliba, Eke cwonɛn makɛ botɛ Eke ti ayo, 2ɔci gɔkjɛn eken ti: Ɔgdɛ otɛ pɔy edɛ ma ban aŋan: ɔci tɛ ban toka ti, tɔra tɔlɛ ballɛ wiɛnɛ, tɔra tamɛ minɛ ɣoŋgɛti bɛ; tɔra pwɔŋnɛ ɔci oodɛ. 3Ɔci kan minɛ gɔkjɛn ɣɛke ti: Ɣɛke noŋdɛ ɔŋ, ɣogɛ? gɔkjɛ, Ciagɔn Tolɛn bwɔgɛ tɔra nɛnɛ; ɔci aca nɛntɛ tɔra dɔwɛ wɛni. 4Ɔci eken atɛn, ɔci tɔra yowɛrnɛn wiɛnɛ pɔy ji ɣon toka ti; ɔci tɔra pwɔŋɛn eken. 5Ɔci makɛ yɔdɛ ban ju gɔkjɛn eken ti: Ɣɛke noŋɛ a wakɛ, pɔŋnɛ tɔra ɔŋ? 6Ɔci eken gɔkjɛn ba juɛl gwɔŋɛn Yecu: aŋkɛ ma daldɛ, eken odɛn. 7Ɔci eken ɛcɛn tɔra Yecu ti, ɔci buruŋɛn eken dwɔccɛn lon ŋwoyɛ ti; ɔci Yecu tapcɛn tɔran ti. 8Ɔci buruŋɛn dwɔnnɛn ma a coŋɛn pɔy jinyɛ ti; ɔci jan aamkɛ lɛktɛ ma ɔci dwɔnnɛn pɔy ji. 9Ɔci makɛ atɛ Yecu nyamɔ ti, yakɛn makɛ botɛn Eke ŋwoyɛ ti, yaadɛ: Ocanna; dalɛ noŋkɛ pwɔdɛn tɛ Minɛ bɛnɛ tɛ yintɛ Ciagɔn Tolɛn: 10dalɛ noŋkɛ pwɔdɛn tɛ Kɛn a bɛyɛn, Kɛn Dabid we ɔn: Ocanna tɛ nyalɔ.

11Ɔci Yecu bɛnɛn Jerucalem, kacɛ tempal ji; ɔci tɛ non gwɔldɛ Eke wakɛnda Eke kacɛn burɛ, atɛn Betani yakɛn makɛ inyakɛn witkɛn ayo, ɣoŋ waŋ ballɛ lucɛn inyu.

12Tɛ lidɔ, tɛ wun a bɛdɛn ta Betani, Yecu amɛ konyɛ. 13Ɔci gɔrcɛn jan a kɔban ballɛ loncɛn ɔntɔ, aamkɛ ballɛ, Eke bɛnɛ, aŋkɛ lirtɛ aginɛ tɔlgɛn: ɔci tɛ Eke bɛnɛ jan ti, tɔlgɛn bawɛ, aamkɛ ballɛ pokɛn; non a jienɛ min bawɛ. 14Ɔci Yecu gɔkjɛn jan ti: Dalɛ na minɛ omɛ tɔlgɛn ɣoŋgɛti bɛ tɛ tɛra badɛ. Ɔci makɛ botɛn tiŋɛn.

15Ɔci eken bɛnɛ tɛ Jerucalem: ɔci Yecu kacɛn tempal ji, ɔci makɛ noŋɛ wɛrtɛ ɔci makɛ noŋɛ wiɛltɛ tɛ tempal jinyɛ ti yɛptɛn Eke ɔntɔ; ɔci aŋgen dwɔccɛ ma diɛn aŋkɛ dutɛ bilkɛ yɛptɛn ɔntɔ, ɔci aŋgen ma bobgɛ wiɛldɛ cocɛn, yɛmɛn ɔntɔ daŋkɛn. 16Eke yuokɛn tɛ minɛ a ciɛlɔ kɛrtɛn wakɛ tɛ tempal ji. 17Yecu lotɛ, ɔci gɔkjɛn eken ti: Juɛl a kienɛ ballɛ a ɔŋ, ba? Ɣon Ya ma bortɛ ɣon a muortɛ Juɔŋ a Tolɛn ti, ɣon a gwɔltɛ makɛ ban warɛda? ɔci ɣɛke noŋkɛ ɣon aŋkɛ ɣon agdɛ ɣon a makɛ ɛyɛ. 18Ɔci makɛ tolɛn, makɛ gɔrcɛ wakɛ Juɔŋ a Tolɛn ti, ɔci makɛ kijɛ wɛragɛ tiŋɛn, ɔci lirtɛ non a nhogdɛ Yecu: ma bwɔyɛ Eke, makɛ punɛn a coŋɛn tɛ juɛl a laltɛn Eke.

19Ɣoŋkɛnda tɛ ɣoŋ waŋ lucɛn inyu Yecu atɛn burɛ.

20Ɔci tɛ lidɔ eken atɛn a wun, gɔrcɛn jan kɔba yhinɛn dokɛ ta bɛkɛ ti. 21Ɔci Peter, waŋ tiinɛ, gɔkjɛn Yecu ti: Rabbi, gwɔlɛ; kɔba dharŋɛn I yhinɛn dokɛ. 22Yecu dɔkɛ jig gɔkjɛn: Jithɛ Juɔŋ a Tolɛn ti. 23Ya gɔkjɛn ɣɛke ti a warɛ, minɛda gɔktɛ pom a nɛnti, dalɛ i dɔdɛ nyalɔ ɔci yɛpcɛn thul ji; ɔci jithɛ jig a gwɔŋɛn a naŋkɛ kan; ballɛ noŋdɛ ta eke. 24Aŋkɛ Ya gɔkjɛn ta ɣɛke ti: Tɛ ɣoŋ i cɔktɛ Juɔŋ a Tolɛn ti tɛ aginɛ tagdɛ i, jithɛ wakɛ mwugdɛ, aŋkɛ wakɛ ballɛ i ti. 25Ɔci tɛ ɣoŋ ɣɛke yɔdɛn muortɛn Juɔŋ a Tolɛn ti, yumgɛn pwɔktɛn ma ti, ɔci nɔjɛ ballɛ ɣɛke ti ta minɛ, wiektɛn ɔntɔ; aŋkɛ We ɣɛke, Minɛ ciyɛ nyalɔ, nɔjɛ ɣɛke wiektɛn ɔntɔ daakɛn.

27Ɔci eken bɛnɛ Jerucalem mokɛ: ɔci tɛ Yecu atɛn a wun tempal ji, makɛ gɔrcɛ wakɛ Juɔŋ a Tolɛn ti bɛnɛ Eke ti, yakɛn makɛ kijɛ wɛragɛ, yakɛn makɛ dwɔŋɛn; 28ɔci eken gɔkjɛn Yecu ti: I noŋɛ wakɛ ɔŋ tɛ juɛl minɛ? minɛ gɔkjɛ I noŋɛ wakɛ ɔŋ? 29Ɔci Yecu gɔkjɛn eken ti: Ya tocɛ ɣɛke ti tɛ juɛl a ciɛlɔ, ɔci mitkɛ Ya, aŋkɛ Ya mitɛ ɣɛke tɛ juɛl a wakɛ a nɛnɛ naŋɛ Ya. 30Baptaijɛ naŋɛn Jɔn, bɛnɛ ta nyalɔ, walɛ bɛnɛ ta maban? mitkɛ Ya. 31Ɔci ma pukɛ juɛl pokɛn, gɔkjɛn pokɛn: Kan ɔn gɔktɔn, ta nyalɔ; Eke gɔktɛ daakɛn, wontɛ ɣɛke jithɛ minɛ ti bɛ, ɣogɛ? 32Ɔci kan ɔn gɔktɔn, ta maban—eken bwɔyɛ makɛ coŋɛn: aŋkɛ ma gɔktɛ a coŋɛn Jɔn a nebi. 33Ɔci eken dɔkɛ jig ɔci gɔkjɛn Yecu ti: Nhijɔn ɔn bɛ. Ɔci Yecu gɔkjɛn eken ti: Dalɛ Ya mitkɛ ɣɛke bɛ, tɛ juɛl minɛ gɔkjɛ Ya noŋdɛ wakɛ nɛnɛ.

Currently Selected:

Juɛl a pwɔdɛn tɛ Mak 11: MFZ1947

Highlight

Copy