Saint Luc 16

1Da Jésus ndé sa hi njou‐séna bongli kéng: Nguèra njoukou mbéo makaou ko̱ mi jing njou‐onatoul fèn nèli. Da kè la sana kita nè ba kè bo fèn nèli. 2Da kè di njou‐onatoul fènli, ka sa hi nè: Baï on bafèn ko̱ mème la guè toulo̱ lé. Mo foul fal fèn nili ko̱ mome otoulkè hi mi, baï ko̱ mo tane mapélékè baï onatoul fèn nili ba aféké ya. 3Da njou‐onatoul fènli mi kèrè ka go̱rè, ba yé mè nding ane dé, baï ko̱ nanjou ni ma yèng mi an pina onatoul fèn nèli lé? Njèran ni on baï ndingna fèn paï tane tiya, da chonron sé mi ta baï ndouna fèn. 4Mè toutou ko̱ mè ma nding koukoulion, an klime ya mi guè bil voul klili ko̱ kème yèng mi a pina onatoul fèn nèli tou. 5Da kè di njou‐ko̱dali a nanjou nè mbéo mbéo bon, da kè sa hi titili njoukou: Mo bi tona jing nanjou ni lo̱ko̱ ane dé? 6Da njou‐ko̱da on mi sa: Koda lé kèrèli nome té. Da njou‐onatoul fènli mi sa hi nè: Mo ya takarata ko̱da no ka komo ka dé bongkè‐dioui. 7Da afal on kè sa hi aféké: Da mo bi tona amo lo̱ko̱ ane dé? Da njou‐ko̱da on mi sa: Mèrèn mapa ma dodo té. Da njou‐onatoul fènli mi sa hi nè: Mo ya takarata ko̱da no ka komo ka dé bongkè‐difala‐saï. 8Da nanjou nè mi jone njou‐onatoul fènli ko̱ nding fèn maï maï, baï ko̱ kème nding fèn cho̱kna. Baï ko̱ an woro mèran njou‐koukoula aïnli, goundi a saka naï ba cho̱kna ta goundi a takanafèn.

9Da mè sa hi oui: Oui nza bako̱lali baï abaï fèn baï ko̱ mi jing ba nguèra vaïnafèn, mono on ko̱ fènli on mi nak oui, kli ma baï pamna oui an bil voulou kambèlè. 10Kè on ko̱ mi dik laou‐è jing goune fèn, yé kè ma ndé dik laou‐è jing loukou fèn kéng. Da kè on ko̱ vaïnfèn jing goune fèn, yé kè ma ndé vaïnfèn jing loukou fèn kéng. 11Mono on, tokoré ouime tane ga ndik laou baï jing nguèra vaïnafèn ya, yé guème ko̱ hi ba gba nguèra nèli hi oui, baï onatoulkè lé? 12Mono on, tokoré ouime tane ga ndik laou baï jing fèn a njoukou aféké ya, yé guème ko̱ hi ba dodok fèn baï hi oui lé? 13Njou‐bakara mbéo tane ma ba ndingna bakara hi njou‐to̱ko̱na fènli séré ya. Baï ko̱ kè ma yèng aïn mbéo ka sé hang a kènkè; maléba kè ma ba bako̱la jing aïn mbéo, da pong kènkè. Oui tane ga ma baï ndingna bakara hi Ouone da nguèra kéng ya.

14Da pharisienli ko̱ hang kli mi na toul mbori ta mi la fènli on, da kli saka nè. 15Da Jésus sa hi kli: Oui ba kli on ko̱ mi féré mone baï fèn baï an nona njoukouli ko̱ oui ba guédék, da Ouone mi toutou an bil go̱ro̱ baï; baï fèn on ko̱ njoukouli mi ji an ling kli mi ti an wora kli, fèn on ba békéfèn ko̱ mi honta an nona Ouone.

16Takarata guingna da prophèteli mana ti dambèl ko̱ Jean mi gui; da afal ka séssé o̱kèo̱ soko, kli sa mboura bèlabaï toul bilkaou a Ouone, da njoukouli bon mi ri sé guè bilkè ndo̱t. 17Da laïya baï an nonkala tèn koukoula mi ta, da goune déna a takarata guingna mi moungnourou.

18Njoukouna ko̱ mi yèng maïn nè ka é waïn aféké, kème nding maïn tou, da kè on ko̱ mi ya waïn hana ko̱ wa mi yèng nè tou, kè nding maïn jing nè.

19Jinguèl nguèra njoukou mbéo makaou. Kè bou bitibiti la da bèla la maïya. Da kè kaou ka jangnandaï, da laka mi nyèta guèbassoko. 20Da foïna njoukouna mbéo makaou ko̱ ling‐è ba Lazare. Da kli ya nè gui njaka mbora njou‐nguèra aïn. Monè mi na ba nongno bon, 21da kè ji sona mboutoukè ka mba ko̱ mi ta lé an toul table a nguèra njoukou kon koukoula; da nvali mi gui ka sala nongno nèli. 22Da baï mi gui mahana ka on ko̱ foïna njoukou on mi hou, angeli mi bi nè sé guè goudi a Abraham. Da nguèra njoukou on mi ndé hou kéng, da kli goro nè. 23Da guèl kaouna a houlkèli, kè to̱ko̱ssé ta, da kè bi nonè guè siya ka ko̱ Abraham dita, da Lazare makaou an goudi nè. 24Da kè wan njaka, ka sa: Baba Abraham, mo nding haïo hi mi, ka pi Lazare an kème bou njangnaran ndo̱kè bil mbi an mi jou kon léme séli an mi vo, baï ko̱ mème to̱ko̱ssé nyèta an bil léme sél hèlè aïn. 25Da Abraham mi sa: Goune ni, mo yangnaran ya, ko̱ mome pane yana a koukoula mo jing bèla fèn noli, da Lazare jing amè ba fèn ko̱ bèlya on. Da kassénaï go̱rè mi vo tou an guèl aïn, da mo kaou amo ba guèl to̱ko̱nassé. 26Da fèna mana ko̱ ta fèn aïnli bon ba loukou lo̱ko̱ hana ko̱ sèkèrèkè mi tane tiya, ko̱ mi na hanguèl na jing mo, da kli ko̱ mi ji baï oura an guèl aïn ka sé mono, kli tane mapélékè ya, da kli on ko̱ mi kaou an mboro mono soko, kli tane ma baï guina gui mona ya. 27Da nguèra njoukou mi sa: Mono on, mè sa jo̱jo̱ no, baba Abraham, mo pi Lazare an bil voula baba ni; 28baï ko̱ yine nili makaou dioui yo̱, an kème wara kli, baï an kli kéng mi ko̱ gui guèl to̱ko̱nassé aïn ya. 29Da Abraham mi féré sa: Kli on ko̱ mi kaou jing Moïse kira prophèteli; mapélékè an klime la kli. 30Da kè sa: Haï, baba Abraham, da tokoré njoukouna mbéo an wora houlkèli mi guè mone kli, yé kli ma hèkè békéfèn akli. 31Da Abraham mi sa hi nè: Da tokoré klime tane la Moïse kira prophèteli ya, yé kli ba lana kara kli tane tiya tokoré mbéo mi tome an wora houlkèli.

Currently Selected:

Saint Luc 16: KBN1947

Highlight

Copy