YouVersion Logo
Search Icon

Pinali a Njou‐Mboro‐Pinali 4

4
1Da ko̱ Pierre kira Jean mi pane sana baï hi njoukouli, sacrificateurli da kabita temple tèn sadducéenli mi tèn guè mone kli. 2Mone kli mi hou mbi nyèta baï ko̱ klime to̱ko̱fèn hi njoukouli, ka sa, mboura tomnahoulkèli an wora houli ka bila Jésus. 3Da klime ba kli da bou kli voul‐jo̱bo̱ an guèlapélé mi taka da, baï ko̱ bèlaléou mi lé tou. 4Da njoukou hanali nyèta an wora kli on ko̱ la baïnjaka mi la bilaou, da klime mane njoukouli hèdi ténakè bongkè‐dioui.
5Da baï mi gui mahana ka on ko̱ pélé mi taka tou, zaworo klili da tangchidoli tèn njou‐to̱ko̱na bong guingnali mi ndoï bon gui pou Jérusalem, 6da Anne ko̱ ba zaworo sacrificateur da Caïphe da Jean, jing Alexandre tèn kli bon on ko̱ ba mèran zaworo a sacrificateur makaou ndourou. 7Da ko̱ klime ya Pierre kira Jean bi hanguèl kli, kli oui kli: Njèran ba fèn maléba ka bil ling a guè da ouime nding fèn aïn lé?
8Da Pierre mi mba ka Saint‐Esprit mi sa hi kli:
Oui zaworo a Juifli da tangchidoli a Israël, 9tokoré ouime foul jing na kassénaï toul bèla fèn on ko̱ mi nding jing njou‐jangma on, da mona njoukou on haï ka mboro hane, 10dadaon an oui bon tou on tèn njoukouli a Israël bon, ko̱ ba ka bil ling a Jésus‐Christ an pou Nazareth, kè on ko̱ ouime bara nè bi di‐croix, da Ouone mi tome nè an wora houli, ka bil ling aïn mi ko̱ njoukou aïn o an none baï bèl ka monè. 11Jésus on ba
Kone ko̱ oui njou‐zana‐voulouli mi pong,
Da kème tèn ba loukou kourou kone bètè voulou tou.
12Da yana‐baï‐toul tane ti bila njoukou aféké ya, baï ko̱ ling aféké an bo̱ko̱ nonkala tane tiya ko̱ hi an jéng an njoukouli ko̱ ma kou na.
13Da ko̱ klime ko̱ Pierre kira Jean mi sa ndo̱t, da kli toutou ko̱ kli tane ga ti ba njoukouli ko̱ tou takarata ya, da ba njoukouli ko̱ kaou bo̱on, laou kli mi sé siya, da klime toutou ka babaï, ko̱ klime kaou jing Jésus jinguèl tou. 14Da ko̱ klime ko̱ njoukou on ko̱ monè mi haï tou mi o jing kli, kli nza baï baï sanakè jing kli pélé. 15Da ko̱ klime sa bi njaka kli baï tèna sé kala an bil voul walabaï, kli bakèdakè jing hana, 16ka sa: Yé na nding ba fèn jing njoukou aïnli lé? Baï ko̱ klime nding ba loukou fèn to̱ko̱nakè ka babaï, da njoukouli bon on ko̱ bi an pou Jérusalem mi toutou on bon tou, da na ma njé njaka jing rou pélé. 17Da an baï aïn mi tane ti guèbambèl an wora njoukouli ba aféké ya, dadaon name koung guingna hi kli, baï an klime tane kaïn féré ka sa baï hi njoukouna mbéo ka ling aïn ya. 18Da klime di kli ka koung guingna hi kli, an klime tane sa baï maléba to̱ko̱ fèn ka ling a Jésus bo̱ko̱ mbéo ba aféké ya. 19Da Pierre kira Jean mi féré sa hi kli: Tokoré mi guédék an nona Ouone baï lana baï abaï ta a Ouone, oui wal baï aïn; 20baï fèn on ko̱ name ko̱ko̱ da lala dadaon name sa. 21Da ko̱ klime koung guingna hi kli ba aféké, kli kaïn féré yèng kli, baï ko̱ klime nza mborokè baï ko̱na barabaï toul kli pélé baï toula njoukouli, baï ko̱ njoukouli bon mi jone Ouone baï fèn on ko̱ klime nding. 22Baï njoukou on ko̱ monè mi haï ka fèn to̱ko̱nakè aïn, saka nè mi ta bongkè‐nèng tou.
23Da mono ko̱ klime yèng kli tou, kli sé guè mona dodok yine klili, da to̱ko̱ bong baï aïnli bon ko̱ loukou sacrificateurli da tangchidoli mi sa hi kli. 24Da ko̱ klime la baï aïn, kli bon mi bi mbo̱ko̱ kli guè siya jing laou mahana da hiou Ouone, ka sa: O! Nanjou, mome ko̱ mosso nonkala da koukoula da loukou‐mbi‐tome, tèn fènli bon on ko̱ na an bilkè, 25mo mini ko̱ sa jinguèl ka Saint‐Esprit bi njaka David baba na, njou‐bakara no:
Baïfèn da pime pouli mi nding zaou,
Da mèrèn njoukouli mi kèrè baï bo̱on lé?
26Nanjoukaouli a koukoula mi ourou siya ka o,
Da zaworoli mi ndoï jing hana tou,
Baï pongna Nanjou, da baï pongna Christ nè.
27Ka babaï, an bil pou aïn, kli pong tangna fofoto Goune no Jésus, kè on ko̱ mome same nè ka tang ambèl, Hèrode tèn Ponce Pilate kéng, da mèrèn pime pouli bon, tèn njou‐Israël mi ndoï jing hana, 28baï ndingna fèn on ko̱ ndo̱ko̱ da badinafèn no mi kèrè ka kome jinguèl an mi gui mahana ka on. 29Da kassénaï, Nanjou mo ko̱ koungna guingna akli, ka hi njèran hi njou‐bakara noli baï sana baïnjaka noli ndo̱t tane waou. 30Da mo ndara ndo̱ko̱ ka haï mona njoukouli, da nding fèn to̱ko̱nakèli tèn fèn sakamli mbo̱l ling a tangna fofoto Goune no Jésus.
31Da ko̱ klime hiou Ouone o̱tou, guèl on ko̱ klime ndoï jing hana an ndourou mi to̱, da kli bon mi mba ka Saint‐Esprit, da kli sa bong baïnjaka Ouone ndot tane waou.
32Da rokè njoukouli on ko̱ la bilaou mi kaou vo ka go̱ro̱ kli mbéo tèn laou kli mbéo bo̱l. Da njoukouna mbéo mi tane ga foul fal fèn nè ba amè fènè ya, da klime ndoï fèn kli kon toul hana ba akli bon. 33Da njou‐mboro‐pinali mi jing bassana njèran ka sa bongbaï toul tomnahoul a Nanjou Jésus, da loukou ndingna mbo̱l mi gui toul kli bon. 34Da baï an njoukou afékéli an woro kli mi tane ga nak jing fèna ya, kli bon on ko̱ jing sél kaou koukoula maléba voul klili, mi jo̱l ka fan mbori fèn on ko̱ klime jo̱l gourou, 35ka hi mbori on kon bo̱ka njou‐mboro‐pinali da klime wal mane njoukouli‐mbéo mbéo bon mahana ka on ko̱ mi nak njoukou.
36Da Joseph kè on ko̱ njou‐mboro‐pinali mi bi ling‐è ba Barnabas, ling on mi sa ba goune wara njoukou, Lévite ko̱ tèn an koua Chypre, 37kème jing sél kaou koukoula nè, da jo̱lè, ka fan mborikè gui, ka hi mbori on kon mbo̱ka njou‐mboro‐pinali.

Highlight

Share

Copy

None

Want to have your highlights saved across all your devices? Sign up or sign in