Pinali a Njou‐Mboro‐Pinali 2

1Da ko̱ name Pentecôte mi tèn tou, kli bon mi ndoï an guèl mbéo. 2Da koukoulion tiri baï mi ti gui ka nonkala, mahana ka loukou koukouna on ko̱ mi kou mingta, da mba bil voul on ko̱ klime kaou ndourou. 3Njaka baïli mahana ka léme sél hèlè mi tèn gui mone kli, da wal kon toul kli bon. 4Da kli bon mi mba ka Saint‐Esprit, da tissaon baï sana ka njaka baïli toutoul toutoul, mahana ko̱ Saint‐Esprit fènè mi hi kli baï sanakè.

5Da an bil pou Jérusalem Juifli makaou ndourou soko, njoukouli on ko̱ mi pèng bong njaka Ouone, ko̱ mèran pime pou klili toutoul toutoul bon an bo̱ko̱ nonkala. 6Da ko̱ klime la tiri baï aïnli ko̱ ti, ro̱kè njoukouli mi ndé gui, da kli kaou yéléme, baï ko̱ njoukouli mbéo mbéo bon mi la ko̱ klime sa ka njaka baïli toutoul toutoul, ka dodok njaka baï klili. 7Da laou kli bon mi sé siya da go̱ro̱ kli mi dou, da kli sa: Oui ko̱, njoukou aïnli ko̱ sa baï, tane ti ba njoukouli an guèl Galilée mini ya lé? 8Da ami, fème na la mane na mbéo mbéo bon ka dodok njaka baï na on ko̱ name tèn rou, an njaka kli lé? 9Partheli, Mèdeli, Elamiteli, da kli on ko̱ bi an guèl Mésopotamie, an guèl Judée, an guèl Cappadoce, an guèl Pont, an guèl Asie, 10an guèl Phrygie, an guèl Pamphylie, an guèl Égypte, da an bilkaou an guèl Libye ndo̱ko̱ pou an guèl Cyrène, da kli on ko̱ gui ka pou Rome, Juifli da kli on ko̱ féré tèn ba Juifli. 11Crétoili da Arabeli, ani da name la ko̱ klime sa ba dodok njaka baï nali, baï sana toul njèran pina a Ouone on lé? 12Da laou kli bon mi sé siya da kli kèrè falkè pélé, ka sa jing hana: Fèn aïn ba fèn lé? 13Da hanali mi gaï, ka sa: Njoukou aïnli mi mba ka féké vin.

14Da Pierre mi ourou siya ka o jing botoulè‐mbéo on ka wan njaka guè siya, ka sa hi kli, ka sa:

Oui njoïli an guèl Judée, da tèn oui njoukouli on bon ko̱ bi an pou Jérusalem, dadaon an ouime tou baï aïn, oui voro soukou baï ka la baïnjaka ni da! 15Njoukou aïnli tane ga ti ba houl vone, mahana ko̱ ouime kèrè ya, baï ko̱ l’heure mi mane saï bo̱l kassénaï. 16Da on ba baï on ko̱ mi sa jinguèl ka mboro njaka prophète Joël:

17Ouone mi sa: Ka sèkèrè name, ba yé mè mèn Esprit ni kon toul naïn‐mone bon;

Da goune wonron baïli tèn goune waïn baïli ma to̱ko̱ bong njaka Ouone,

Da bala goune baïli ma ko̱ fèn mahana ka lo̱la,

Da hona njoukou baïli ma lo̱l nyèta.

18Babaï, ka name o̱kèo̱, yé mè mèn Esprit ni kon toula njou‐bakara nili, da waïn bakara nili; da kli ma to̱ko̱ bong njaka Ouone.

19Da mè ma nding fèn sakamli guè siya an nonkala, da fèn to̱ko̱nakèli guè siya an koukouli,

Ka séme, da hèlè, da douna soussoukou;

20Séssé ma komo féré tèn ba yirikè,

Da féou ma komo féré tèn ba séme,

Ambèl guina a name Nanjou.

Loukou name on ma tèn jing jonafèn.

21Da ndé on kéng, njoukouna ko̱ mi di ling a Nanjou ma kou.

22Oui njoïli an Israël, oui la baïnjaka aïnli! Jésus an pou Nazareth, njoukou aïn ko̱ gui ka Ouone ko̱ kème to̱ko̱ nè bi kala an none baï, ka mboro njèran pinali da fèn sakamli tèn fèn to̱ko̱nakèli on ko̱ Ouone mi nding ka mboro nè an woro baï mahana ka on ko̱ oui fèn baï mi ndé toutou kéng. 23Kè on ko̱ ka mboro badinafèn pouta bi da tounafèn ka kome a Ouone mi hi, da ouime bara nè bi di‐croix, ka i nè ka ndo̱ka njoukouli on ko̱ sél guingna. 24Da Ouone mi tome nè, da sél sal houl guèfal tou, baï ko̱ houl mi tane njèrèn baï gnèran nè ya. 25Baï ko̱ David mi sa baï toulè:

Mè ko̱ Nanjou an bo̱ko̱ noni guèbassoko,

Baï ko̱ kème o mboro wonron ndo̱ko̱ ni, baï an mème tane lang ya.

26Mono on go̱ro̱ ni jangndaï, da léme séli mi wal nyèta;

Tongna on naïn‐moni fèni mi ndé oli kéng,

27Baï ko̱ mo ba yèngna laou ni an guèl kaouna houli tane tiya,

Da mo ba yèngna Njou‐tangna fofoto no an kème ko̱ poumna tane tiya.

28Mo to̱ko̱ an mème tou mboro yana,

Yé mo ma kou mi mba ka wala an mono.

29Njoukouli yindi, mè ma baï sana toula titili tangko David bon hi oui, kè hou da kli goro nè da palè mi ndé na jing na bo̱l tèn kassénaï. 30Mono on, baï ko̱ kè ba prophète, da kème toutou ko̱ Ouone mi bi gonjaka hi nè ka serment, yé kè ma hi njoukou mbéo ka mèrèn nè, baï kaouna toul kangala njaka bara nè, 31baï ko̱ kème ko̱ baï on, da sa baï toul tomnahoul a Christ, on ko̱ sa ba yèngna nè an guèl kaouna houli tane tiya, da naïn‐monè ba ko̱na poumna tane tiya. 32Jésus aïn ko̱ Ouone mi tome nè tou; da na bon ba njou‐sana bongbaï on. 33Mono on, Ouone mi bi ling‐è ti guè siya an mboro wonron ndo̱kè, da kème ya bina gonjaka baï Saint‐Esprit an mona Baba fènè, da kè mèn on mahana ko̱ ouime ko̱ da la. 34Baï ko̱ David mi tane ga hé sé guè nonkala ya, da kè fènè mi sa on:

Nanjou fènè mi sa hi Nanjou ni:

Mo kaou an mboro wonron ndo̱ko̱ ni,

35Bo̱l tèn ko̱ mème nding bakèo̱ noli tèn ba fèn ndana ka bo̱ko̱.

36Mono on, an oui njoukouli bon an voula Israël mi toutou ka babaï, ko̱ Ouone mi hi Jésus aïn ko̱ ouime bara nè bi di‐croix tèn ba Nanjou da Christ.

37Da ko̱ klime la baï on go̱ro̱ kli mi ji baï haouna da klime sa hi Pierre da gara njou‐mboro‐pinali on: Njoukouli yindi, yé na nding ba fèn lé?

38Da Pierre mi sa hi kli: Oui hèkè békéfèn abaï, da oui mbéo mbéo bon mi ya baptême ka bil ling a Jésus‐Christ baï jingna yèngna bi mboro békéfèn abaïli; da yé oui ma ya toul ndo̱ko̱ Saint‐Esprit. 39Baï bina gonjaka on ba baï toul baï, tèn goune baïli, da baï an njoukouli bon on ko̱ mi kaou dita, yé njoukouli bon on kéng ko̱ Nanjou Ouone na ma di kli. 40Da kème sa bongbaï toul baïnjaka nyèta, da kème wara kli, ka sa: Oui yèng an Ouone mi kou oui an wora mèran njoukou aïnli ko̱ mi sé maï maï.

41Da kli on ko̱ ya baïnjakè, kli ya baptême; ka name o̱kèo̱, ro̱ko̱na laou an njoukouli on ko̱ mi taïnkon jing kli hèdi ténakè‐bongkè‐saï.

42Da kli pane laïnabi pèngna to̱ko̱nafèn a njou‐mboro‐pinali da kaou vo jing hana mbéo baï haouna mapa da hiouna Ouone. 43Da waou mi ba kli mane mbéo mbéo bon, da njou‐mboro‐pinali mi nding fèn sakamli tèn fèn to̱ko̱nakèli nyèta. 44Da njoukouli bon on ko̱ mi la bilaou, kli ndoï an mbé guèl mbéo, da klime ndoï fèn aklili bon kon toul hana ba akli mbéo. 45Kli jo̱l sél kaou aklili tèn fèn aklili bon, da wal fènli jing hana hi njoukouli mbéo mbéo bon, mahana ka on ko̱ mi nak njoukou. 46Da klime gali gui guè bil temple name bon, ka pane laïnabi ka laou mabahana, ka haouna mapa an bil voul klili, klime son laka jing hana ka wala, tèn kaouna vo ka go̱ro̱ mbéo bo̱l, 47kli jone Ouone ta, da njoukouli bon ko̱ kli bèl mone kli ta. Da Nanjou mi kon njou‐afékéli on ko̱ kou tou toul kli name bon.

Currently Selected:

Pinali a Njou‐Mboro‐Pinali 2: KBN1947

Highlight

Copy