Lukas 17
17
Kas ampun orang yang sala sama kitong
17:1-6
1Yesus bicara sama De pu murid-murid,
“Pasti ada saja yang bisa umpan sampe orang mo bikin dosa. Tapi claka skali orang yang umpan itu! 2Lebi baik untuk de kalo orang ikat batu besar di de pu leher trus lempar de ke laut, daripada de bikin sampe satu dari orang-orang yang kecil ini bikin dosa. 3Jadi, kam harus hati-hati!
Kalo ko pu sodara bikin dosa, ko tegur dia. Kalo de rasa sala baru de tobat, ko trima dia. 4Kalo de bikin sala sama ko tuju kali#17:4 tuju kali ‒ Yesus pu maksud bukan cuma tuju kali saja tapi kas ampun ulang-ulang stiap kali. Itu sama deng di Matius 18:21-22, Yesus bilang 70 kali tuju sperti itu. dalam satu hari trus slalu datang minta maaf deng bilang sama ko, ‘Sa tobat dari sa pu sala,’ ko harus kas ampun dia.”
5Trus Yesus pu utusan dong bicara ke Yesus, “Tuhan, kas kuat tong pu percaya ka.”
6Yesus jawab, “Kalo kam pu percaya sperti biji yang paling kecil saja, kam bisa bilang sama pohon itu, ‘Ko pinda ke laut!’ Pasti pohon itu de ikut ko pu printa.”
Tugas budak
17:7-10
7Yesus bilang sama De pu murid-murid begini,
“Kalo satu orang dari kam ada yang pu budak. Budak itu, de pu kerja bikin kebun ato pigi jaga binatang piara. Waktu budak itu de pulang, tra mungkin kam bilang sama dia, ‘Mari tong makan sama-sama.’ 8Tra to! Yang ada tu kam nanti bilang sama budak itu, ‘Cepat ko kas siap sa makanan, ko pigi ganti pakean yang bagus trus ko siap smua, jaga sampe sa makan slesai baru ko bisa makan.’ 9Ada ka de dapa puji karna su kerja apa yang de musti bikin? Trada to! 10Begitu juga deng kam. Waktu su bikin smua yang musti kam bikin, kam bilang begini, ‘Kitong cuma budak, tong cuma bikin apa yang harus tong bikin.’ ”
Yesus De kas sembu spulu orang yang sakit kulit busuk
17:11-19
11Waktu lanjut ke Yerusalem, Yesus lewat jalan tenga, batas tenga daera Samaria deng daera Galilea. 12Begitu masuk kampung satu, disitu ada spulu orang yang sakit kulit busuk, dong ketemu Yesus. Dong bediri dari jau. 13Baru dong batariak deng kras, “Yesus, Guru, kasian kitong ka!”
14Yesus liat dong baru bilang, “Kam pigi sama imam-imam supaya dong priksa kalo kam su sembu.”#17:14 pigi sama imam-imam supaya dong priksa kalo kam su sembu ‒ Praturan agama kalo orang yang kena sakit ini tra bole masuk tempat ibada juga tra bole bergaul deng orang-orang sampe imam priksa kalo dong su sembu betul (Imamat 14:1-32). Begini waktu masi di tenga jalan spulu orang yang sakit kulit busuk ni dong smua sembu.
15-16Satu orang dari dong, de ni orang Samaria, de kembali puji-puji Allah deng suara kras karna de su liat kalo de sembu. Trus depan Yesus de tunduk sampe muka ke tana de bilang, “Bapa trima kasi.”
17Trus Yesus bilang ke orang, “Dong spulu orang yang tadi su sembu, mana dong sembilan itu? 18Knapa cuma de yang bukan orang Yahudi#17:18 de yang bukan orang Yahudi ‒ Orang Yahudi anggap orang Samaria orang tra baik karna dong turunan dari perkawinan yang Tuhan larang (orang Yahudi tra bole nika deng suku lain). yang mo kembali puji Allah?” 19Trus Yesus bilang orang itu, “Bangun deng pigi, karna ko percaya Saya, ko slamat.”
Waktu Allah jadi Raja
17:20-37
(Mat 24:23-28, 36-41)
20Orang-orang Farisi dong tanya sama Yesus kapan Allah pu Krajaan mo datang. Trus Yesus jawab dong begini, “Allah pu Krajaan tra mo datang deng tanda-tanda yang orang dong bisa liat. 21Deng begitu orang tra bisa bilang, ‘Coba kam liat De ada disini!’ ato ‘Coba liat De ada disana!’ Karna Allah pu Krajaan su mo datang di tenga kam smua.”#17:21 di tenga kam smua ‒ Bahasa Yunani juga bisa arti ʻdi dalam kam pu hati smua.ʼ
22Habis itu Yesus bilang sama De pu murid-murid dong,
“Nanti satu hari kam rindu mo liat hari yang Sa Anak Manusia datang kembali, tapi kam tra bisa. 23Trus nanti orang dong bilang sama kam, ‘Pigi liat De ada disana!’ ato ‘Mari liat De ada disini!’ Jang kam mo ikut pigi cari. 24Karna nanti waktu Sa Anak Manusia datang itu sperti kilat pica di langit, de pu cahaya tu dari ujung ke ujung sampe smua orang bisa liat. 25Tapi Sa musti kena banyak sengsara dulu trus dapa tolak dari orang-orang jaman ini.
26Waktu Sa Anak Manusia datang kembali, orang-orang pu hidup sama sperti Nuh pu jaman.#Kejadian 6:5-8 27Dong makan, minum, deng baku kawin, begitu trus sampe Nuh masuk dalam kapal besar, trus banjir besar datang tutup bumi sampe orang-orang smua mati tenggelam.#Kejadian 7:6-24 28Begitu juga waktu Lot pu jaman. Dong makan deng minum, dong pigi bli deng pigi jual, juga dong bikin kebun deng bikin ruma. 29Tapi waktu Lot deng de pu kluarga kluar dari Kota Sodom, hari itu api deng lahar panas turun dari langit trus kas hancur dong smua.#Kejadian 19:24-25 30Begitu suda yang jadi waktu Sa Anak Manusia nanti balik kembali.
31Sapa saja pas hari itu kalo de ada di atas ruma deng de pu barang-barang ada di dalam ruma, jang de masuk untuk ambil barang-barang. Trus orang yang ada di kebun, jang de mo kembali. 32Ingat to apa yang jadi sama Lot pu istri!#Kejadian 19:26 33Sapa saja yang usaha mo kas slamat de pu hidup, nanti de tra bisa hidup yang trada akir. Tapi orang yang kasi de pu hidup, de yang nanti slamat.#Matius 10:39; 16:25; Markus 8:35; Lukas 9:24; Yohanes 12:25 34Sa kastau kam, waktu malam itu ada dua orang di satu tempat tidur, yang satu dapa bawa trus yang satu dapa kas tinggal. 35Trus ada dua prempuan dong giling biji gandum, yang satu dapa bawa trus yang satu dapa kas tinggal. [36Dua orang dong kerja di kebun, satu dapa bawa trus yang satu lagi dapa kas tinggal.]”#17:36 Bagian yang ada dalam kurung ini trada di teks-teks bahasa Yunani yang paling lama, tapi ada di brapa teks Yunani stela yang paling lama itu.
37Yesus pu murid-murid dong tanya, “Tuhan dimana nanti itu jadi?”
Yesus jawab sama dong, “Dimana bangkai ada, disitu ada banyak burung bangkai yang kumpul.”
Currently Selected:
Lukas 17: MPapua
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
