Marko 14

Maria kamwitila Yesu narde

1Vizisigale siku mbili kuvika sikunghulu ya Pasaka na ya migate ilibule usasu, Watambika Wakulu na Wananzuma wazahila kumgoga kwa ubala giladi wamkome. 2Komu walonga, “Tanhu isikunghulu ibite, wanhu sikuweze kutenda kizagala!”

3Na heyo viyakalile Betania mngʼanda ya Simoni mwene Dikulu, kakala hana gamandiya; kamwizila mtwanzi mwene kichupa kizelu cha ubwe, kimemile mavuta ga maluwa gakemagwa Nardo, gaguligwe mhiya bwando, ganogile nghani; kaditula kija kichupa, kamwitila Yesu mditwi jake. 4Wayagwe wehilwa mmoyo walonga, “Wachoni ubananzi uno wa mavuta ganogile kamba vino? 5Kilumbo mavuta gano kamba gagulizwe, gahavikile silingi mizo midatu hebu kubanza aho, wagolelwe iwakiwa.” Avo wamfokela nghani yuja mtwanzi.

6Komu Yesu kalonga, “Mulekeni; vilihi vumumgela kinyanyagazi? kanhendela mbuli inogile. 7Kwa mzoko wakiwa munawo kumwenu mazuwa gose, na kamba muhalonda, modaha kuwasanghanila ganogile; bali niye sili namwe mazuwa gose. 8Kasanghana viyadahile; kasonga kubakaza lukuli lwangu mavuta gano, yautunduwile mkuzikwa. 9Ihoko nomulongelani, hohose muna ulumwengu wose, vonda usimulilwe Usenga Unogile, na dino diyatendile yuno mtwanzi, dosimulilwa giladi na heyo yagelegezwe.”

Yuda Iskariote

10Imala Yuda Iskariote yakalile miyawo waja umulongo umwe na wabili, kachola kwa Watambika Wakulu giladi yamgele Yesu mmakono mmwawo. 11Na hewo vuwagahulike wemozamoza, walagana nayo kumwingha mhiya; baho hayazahile ulegeho unogile yamulave.

Pasaka itunduwilwa

12Siku ya ichanduso ya ukuja migate ilibule usasu, wanhu vuwasikile nghondolo za Pasaka, wanahina wake wamuuza, “Kwahi kuulonda tukakutunduwilile goya, wije nghondolo ya Ipasaka?” 13Kawatuma wanahina wake wabili, kawalongela, “Gendeni mdiwambo, baho moitinghana na munhu yasolile nongo ya mazi, mkolelezeni! 14Muja muyokwingila, mulongeleni mwene ngʼanda, Mkulufunzi kokuuza, dili kwahi digati ja kukala niye, kileka ndiye nghondolo wa Pasaka hamonga na wanahina wangu? 15Baho mwenyecho komlagilani gati kulu dimalile kutunduwilwa goya; himo tusanghanileni!”

16Waja iwanahina wachola, wengila mdiwambo, wavona kamba viyawalongele, waitunduwila goya nghondolo wa Pasaka.

Mandiya ga ikilo ga kwihoza

17Viivikile ichungulo, keza hamonga na waja umulongo umwe na wabili. 18Vuwakalile woja, Yesu kalonga, “Ihoko nomulongelani, miyenu imonga yoja hamonga na niye, konihimbila.” 19Wandusa kunyunguwala na kumuuza imonga imonga, “Iyo nene?” 20Na heyo kawalongela, “Miyenu mwemwe umulongo umwe na wabili, yazanhike hamwe na niye mumkungu yuyo. 21Mwana wa Munhu kochola na nzila yake kamba viyandikilwe; bali yuja munhu igambile Mwanage Munhu kahimbilwa na heyo, gehile gomvika; munhu yuja vihawile goya kamba hisambi yaleligwe.”

22Vuwakalile woja, kausola mgate, kamtuniza Mulungu, kaumega kawagwelela yolonga, “Soleni, luno lulo lukuli lwangu.”

23Imala kasola kiya cha kungʼwela, kamtuniza Mulungu kawengha, wangʼwa wose himo. 24Kawalongela, “Uno uwo mulopa wangu wa Lagano ja Isambi, uvavanha kwa kilumbo cha wanhu bwando. 25Ihoko nomulongelani, lulawile vino hondaningʼwe kabili umujo wa mitongoni, kuvikila siku hiyo vondaningʼwe wa isambi muna Undewa wa Mulungu.”

Petro kagangamala kwigesa vihile

26Vuwamalile kwimba, walawa wachola kuli digongo ja michekele.

27Yesu kawalongela, “Mose mokikwala, kilumbo yandikwa, Nomsuna imchunga, nghondolo wopwililika. 28Bali nihaziga kuzuswa, nomulongolelani kuchola Galilea.”

29Baho Petro kamulongela, “Viyemela wose na waikwale, niye namduhu.” 30Yesu kamulongela, “Ihoko nokulongela, ikilo iino inzogolo tanhu hanakwika, na gweye kwiza kombela miyanza midatu.”

31Na heyo kagangamiza nghani kalonga, “Viyemela vihanyandama kukomigwa hamonga na gweye, honda nikubele ngʼo.” Na waja wose walonga vivo.

Nghondo ya Getsemane

32Vuwavikile hanhu hakemagwa Getisemane, kawalongela wanahina wake, “Kaleni hano, kikomo nihamala kupula.” 33Kamsola Petro, Yakobo na Yohana, kachola nawo, kasonga kwingilwa na kingudemo na kusangayagaya. 34Kawalongela, “Loho yangu yosaganhika nghani na manyulunyulu, isigale hadodo kudanganika; kaleni meso bahano!” 35Kakwenhuka hatali mhunde, kagwa mavindi, kapula, kamba vihadahika, gahavika higo, kipigiti hicho kimbite kutali. 36Kalonga, “Aba, Tata, gose godahika kumwako; avo kibitize kingʼwelo kino sekenikingʼwe; komu sekegasanghanwe gonigesa niye, bali goulonda gweye.” 37Viyezile kwa wanahina, kawavika wawasile utulo, kamulongela Petro, “Simoni gweye, kuwasa utulo? Hudahile kukala mangweda saa imonga iyeka? 38Kaleni meso na kupula, sukumwingile mkugezwa; iloho yolonda kwidikila, komu lukuli lunyeka.”

39Kachola lwekabili, kapula kuno yolonga malonga gagaja. 40Viyezile vivo, kawavika wawasile utulo, kilumbo meso gawo gakala kamvu kamvu, wahila kumwidika.

41Na viyezile mwanza wekadatu, kawalongela, “Muhalibasiliza kuwasa utulo, uudonhi uwalawe? Havikizwa; kipigiti kivika; loleni Mwana wa Munhu kogeligwa mmakono ga wabananzi. 42Gandamukeni tuchole; loleni mwene kunihimbila kabahano behi!” Yesu viyagogigwe na iwandumu 43Viyakalile yolonga, mhunde baho keza Yuda, imonga wawo waja umulongo umwe na wabili, hamonga na dale ja wanhu bwando wene misime na miwenguwengu, walawile kwa Watambika Wakulu, Wananzuma na Wavyele. 44Yuja mwene kumuhimbila kakala yawenghile utango yolonga, “Yo-nda nimnonele iyo yuyo, mgogeni mchole nayo, mumteganye nghani!”

45Na heyo viyavikile, mhunde kumkwenhukila kuno yolonga, “Rabi (Mkulufunzi)!” kamnonela. 46Baho wamgoga na makono gawo. 47Bali imonga wawo wemile baho, kasomola sime yake, kamtowa mtumwa wa Mtambika Mkulu na kumkanha digutwi.

48Yesu kedika kawalongela, “Mwiza na misime na miwenguwengu mgoge niye, kamba wanhu wogenda kugoga bokonyo. 49Mazuwa gose nghala namwe muja mdihekalu kuno nilangukiza, hamngogile; komu gano gasanghanwa giladi gandikwe gavikizwe.”

50Baho waja wakalile nayo wamuleka, wakimbila wose. 51Hakala na mmhale imonga, yuyo yekoleleze nayo, kakala yaigubike hakinena kitambala cha bafuta, na hewo wamgoga. 52Kakileka kitambala mmikono mmwawo, kakimbila ukulunge.

Yesu kataguswa haluhengo; usindi wa uvwisi

53Wamgala Yesu kwa mtambika mkulu, ako weilundiza wose watambika wakulu, wavyele na Wananzuma. 54Na heyo Petro kakala yomuwinza kutalitali, yomana kwingila kunzingo kwa Mtambika Mkulu, kakala hamonga na wambigalo, yokota moto. 55Bali Watambika Wakulu na Wavyele wose wa Luhengo wazahila usindi kumwake Yesu giladi wamkome, hawauwene. 56Kilumbo bwando wamsindila ga uvwizi, na usindi wawo haugondanye.

57Wayagwe walawilila wosindila ga utungulu, walonga, 58Tweye tuhulika viyalongile, “Niye noditula ngʼanda dino ja Mulungu dizengigwe na mikono, imalabaho nodizenga viyagwe kwa mazuwa madatu, na hijo honda dizengwe na mikono.” 59Hata hivo usindi wawo haugondanye.

60Baho Mtambika Mkulu vivo yenuke, keza hagatigati, kamuuza Yesu, kalonga, “Huidika mbuli, wano vuwokudununza?” 61Bali heyo kanyamala tulu, hamwidike mbuli; Mtambika Mkulu kamuuza kabili, kamulongela, “Tulongele, gweye gwegwe Kristo mwanage Magana Mtunilwa?” 62Yesu kalonga, “Iyo nene, na mweye momona Mwanage Munhu voyokala ukulume kwa Mhiko, kabili vondayeze uchana mmawingu ga kuulanga!” 63Baho Mtambika Mkulu yomana kuzidega nguwo zake, kalonga, “Iwasindi towalondela choni kabili? 64Muhulika viyombeza Mulungu; avo mokonaze?” Na hewo wose wamtagusa kamba imwandama yafe.

65Baho wayagwe wandusa kumtemela mizite, avija wamgubika ikihanga; wamsuna mikonde kuno womulongela, Tufambulile yalihi yakutowile? Na wemilizi wamsola, wamtowa makofi.

Petro viyambelile Yesu

66Na heyo Petro viyakalile hasi kunzingo, keza imonga wawo nokola wa kitwanzi wa Mtambika Mkulu. 67Viyamonile Petro yokota umoto, kamsungilila kalonga, “Viyemela na gweye kukala hamonga na yuja Yesu wa Nazareti!” 68Kabela kalonga, “Aka sivitanga, viyemela sigamanya goulonga.” Imalabaho kalawa kunze kunzingo. 69Yuja nokola wa ikitwanzi viyamonile chusa, kasonga kabili kuwalongela waja wemile haja, “Yuno na heyo kamumo mmwanza wawo!” 70Petro kabela vivija; kabili mhunde baho waja wemile haja wamulongela Petro, “Ona vija, na gweye kwa mmwanza wawo, kilumbo kokoneka kwa Mgalilea.” 71Baho hayasongile kwidumiliza na kwiduwila yolonga, “Simtangile munhu hiyo imulonga.” 72Mhunde nzogolo keka mwanza wekabili; baho Petro hayakumbukile dija dilonga, Yesu diyamulongele, Nzogolo yahali hanakwika miyanza mibili, na gweye kuziga ku-mbela miyanza midatu. Na viyawalanga, kasonga kulila mahozi.

Currently Selected:

Marko 14: ZAM75

Highlight

Copy