Mateo 24

Ubwelo wa Kristo wotangikaze

1Yesu kachola na zake, kalawa mdihekalu; wanahina zake wamgendela, giladi wamulagile zinzengelo za hekalu. 2Na heyo kedika kawalongela, “Hamgona gano gose? Kingongongo nomulongelani, hondadisigale hano dibwe hachana ya dibwe, dileke kubomolwa.”

3Avija viyakalile hadigongo ja mizeituni, wanahina zake wamgendela hamtimbeho walonga, “Tulongele manzonza higo gokwiza zuwaki; avo utango wake choni wa kubwela gweye, na wa ikimambukizo cha ulumwengu?”

4Yesu kedika kawalongela, “Teganyeni munhu sikuyamvwizileni! 5Kilumbo bwando wondaweze na tagwa jangu wolonga, Niye nene Kristo; hiwo wowazulunza wanhu bwando, 6Na mweye mohulika simulizi za nghondo, na nyongʼonyo za nghondo; teganyeni sikumgudemezwe, kilumbo higo hondagaleke kulawilila, bali acho ikimambukizo hakinavika. 7Ngholo zokwinukila ngholo ziigomba, na undewa wogomba na undewa; kokuwa nzala na mgudemo wa isi hanhu na hanhu. 8Ago gose kicho chandusilo cha usungu.” 9“Milongo hiyo mogogigwa mweye, mogazwa, na hewo womkomani; ilawa baho mokuwa wanhu wa kwihilwa na ngholo zose kihumbo cha tagwa jangu. 10Baho bwando vondawekwale, na hewo wokilava na kwiihila. 11Na walungu bwando wa ivwizi wolawilila na kuwavwizila bwando. 12Kilumbo cha zubwanduka matozo vivo kwinogela kohunguka. 13Komu mwene kwazaganya kuvikila ikimambukizo ayo yuyo yondayahone. 14Bali Usenga Unogile wa Undewa wopetigwa mulumwengu wose, uwe kihumo cha ngholo zose; aho baho kimambukizo chokwiza.”

Ubananzi wihile na usungu

15“Aho vondamuwone ubananzi wihile uja ulongigwe na mtula-Ndagu Danieli, wimile mwihekalu (na heyo yondayasome yavimanye!): 16Baho waja wali muisi ya Uyuda wakimbilile mvigongo! 17Na heyo yali uchana kukano, sikuyahumuluke kuvisola vinhu vili himo mngʼanda yake! 18Yali kumgunda sikuyabwele kuchugu kusola nguwo yake. 19Leka wojona wene zinda na hewo wokongheza zisiku hizo. 20Puleni Mulungu giladi nghimbililo zenu sikuziwe za milongo ya beho, bule siku ya Sabato! 21Kilumbo milongo hiyo yogalamka ya usungu bwando; haunalawilila usungu kamba hiwo kulawila haja haumbigwe ulumwengu mpaka sambi, kabili hondaulawilile ngʼo. 22Kamba siku hizo hazihunguzwe, munhu hata imonga hisambiyahone; bali kilumbo cha wasaguligwa siku za usungu zohunguzwa.

23Milongo hiyo munhu yahamulongelani, Lola Kristo kabahano bule kakuja, sikumumtogole! 24Kilumbo wolawilila wene kwitenda Kristo kivwizi, na walaguzi wa uvwizi, wotenda vilolomboto vikulu na mazingaombwe, giladi wawagize hata wasaguligwa, kamba vihadahika. 25Loleni nyandusa kulonga na kumzumani. 26Wahamulongelani, Ka hiko kuluwala, sukumulawe; Ka muno mgati, sukumtogole! 27Kilumbo kamba vija lumwemwe vululawaga ulawilo wa zuwa, lungʼala kuvika uswelo wa zuwa, vivo hivo vondayeze Mwana wa Munhu.

28Kilumbo hauli mtufi, baho mhungu wondawememeze.”

Kuziga kwa isi; mzungu wa mkuyu

29“Mhunde mgazo wa siku zija uhabita, zuwa dogeligwa ziza, mwezi hondaulave mulenge, nhondo zolagala kuulanga, na mhiko za kuulanga zogudema. 30Baho vondawoneke Utango wa Mwanage Munhu kuulanga; baho ngholo zose za mulumwengu vondaweyalale, womana kumona Mwana wa Munhu yokwiza uchana mmawingu ga kuulanga hamonga na mhiko na ungʼazi bwando. 31Na heyo kowagala malaika zake hamwenga na dizi kulu ja mhalati na hewo wowalundiza wasaguligwa wake wolawa mngwazo ne, kulawa umwambu uno wa ulanga kuvikila kimambukizo cha kuja.

32Ifunzeni mzungu muna dibiki ja nghuyu: tambi jake dihamala kuzuka na kukunguluka mijani, movitanga kamba kikomo cha ukuhuna chabehi. 33Na mweye vivo, mana mgona higo gose, mvimanye kamba kammabehi, mzinyivi. 34Ihoko nomulongelani, mlelo uno hondaumale, mpaka higo gose vondagavikizwe. 35Ulanga na isi zobita, bali ulonzi wangu haubita ngʼo.”

Mlelo siku za Noa ulekigwe

36“Komu haduhu munhu yovitanga siku hebu kipigiti hicho; wala malaika kuulanga wala Imwana, komu Tata yali yeka. 37Kilumbo kamba vija vizikalile siku za Noa, avo vondayeze Mwana wa Munhu. 38Kamba vija aiho hadinavika Disika dikulu, wanhu vuwakalile woja na kungʼwa, wosola na kusoligwa kuvikila siku ija Noa iyengile muna isafina. 39Wala hawasinhuke mpaka Sika dikulu diza, diwasola wose, vivo vondaviwe umbwelo wa Mwanage Munhu. 40Milongo hiyo wanhu wabili wahawa kumgunda, imonga kobokelwa, imonga kolekigwa. 41Watwanzi wabili wahawa wotwanga, imonga kobokelwa, imonga kolekigwa.”

Kaleni meso hosehose

42“Avo kaleni meso, kilumbo hamvitanga siku ilihi yondayeza Mndewa wenu! 43Ditangeni longa dino, kamba mwene ngʼanda yaimanyile inyizilo, mbavi yondayezile, yahakalile meso, na isambi yaileke ngʼanda yake ituligwe. 44Kileka hivo na mweye imeni goya, kilumbo Mwanage Munhu kokwiza ikikomo chumuleka ukugesa.

45Avo nyakadala yanogile mwene zifiyuko yuyo yalihi? Yuyo ija, mndewa wake yamwikile kwimiliza ngʼanda yake na kuwengha wanhu mandiya kikomo chawo. 46Kamota nyakadala hiyo, mndewa wake yaheza yamvike yosanghana hivo. 47Ihoko nomulongelani, komwika muukulu wa vinhu vyake vyose. 48Bali nyakadala yuja yehile, mana yolonga mmoyo mmwake, Mndewa wangu kokawa. 49Yanduse kuwatowa nyakadala wayage nakuja na kungʼwa hamonga na wakoligwa. 50Mndewa wa nyakadala hiyo kokwiza siku iyoleka kugelegeza, na ikikomo hakitangile. 51Komkanha nyenza mbili na kumwingha kibendu chake hamonga na wazenzeleganye, baho hondaiwe ndilo na kugegeda meno.”

Currently Selected:

Mateo 24: ZAM75

Highlight

Copy