Luka 11

Langulizo ja kumpula Mulungu

1Viyakalile hanhu yopula, kamala; baho mwanahina wake imonga kamulongela, “Mndewa, tulangukize na tweye kupula kamba vija Yohana viyawalangukize wanahina wake.”

2Kawalongela, “Kamba muhatambika longeni: Tata, Tagwa jako dingʼale, Undewa wako wize! 3Utugwelele lelo mandiya getu! 4Utusegezele matozo getu, kamba na tweye vutuwasegezela watutozele. Kabili sukuutugele mkugezwa!”

5Kawalongela, “Yalihi mmwanza wenu yali na mbwiga, yamgendele ikilo kikulu na kumulongela, Mbwiga wangu, nghopesha migate midatu! 6Kilumbo mbwiga wangu kavika kumwangu, kalawa na mwanza, na niye nabule kinhu cha kumgolela yaje. 7Na ija wa mngʼanda kamwidika kalonga, Sukungaduse kilumbo mulango ufungigwa, na tweye tuwasa mvisazi, niye na wanangu wose, sidaha kwinuka nikwinghe. 8Nomulongelani, Viyemela hadaha kwinuka yamwinghe kwa mzoko yuyo mbwiga wake, komu vija viyali bule kinyala kagangamiza yopula, kokwinuka yamwinghe gaja gayalondile.

9Na niye nowalongela, Puleni, na mweye mogwelelwa; zahileni, na mweye movona; tendeni hodi, na movugulilwa. 10Kilumbo munhu yopula kogwelelwa, na ija yozahila kovona, na heyo yotenda hodi kovugulilwa. 11Kwa mzoko tata yalihi kumwenu kamba mwanage yahampula mgate, yamwinghe dibwe, hebu yahampula somba, yamwinghe zoka? 12Hebu yahampula finga, yamwinghe inge? 13Viyemela mweye mna imizoyo ihile, mvitanga kuwengha wanenu vinhu vinogile, che, havibanza Tata Yali Kuulanga kuwagwelela Loho Yangʼalile waja wompula?”

Kwa kulava mizuka Yesu kamuhuma Beelzebuli

14Na heyo kakala yolava mzuka bubuwi; avija umzuka vuumulawile yuja bubuwi, kandusa kulonga; wanhu wakanganya. 15Wayagwe walonga, “Kolava mizuka kwa mhiko za Beelzebuli, Mkulu wa mizuka.” 16Wayagwe wamgeza wolonda yatende kilolomboto kilawa kuulanga. 17Aheyo kazitanga ngelegeza zao kawalongela, “Kamba undewa uhawa na magomba wenyego kwa wenyego, honda ukale, hebu ngʼanda kwa ngʼanda, hondaime. 18Yahawa Mwenembago na heyo koifutula mwenyecho, avo undewa wake wokwimaze? – kilumbo mweye monilonga kamba niye nolava mizuka kwa mhiko za Mwenembago. 19Avo kamba niye nihalava mizuka kwa mhiko za Mwenembago, che, awo wanenu woilava na nani? avo kwiza wawo wonda wamuhumeni. 20Komu niye nihalava mizuka kwa chanda cha Mulungu, kumbe undewa wa Mulungu umvikilani.

21Ihawa munhu mwene nguvu yefungile mizele yake, yokwimiliza ngʼanda yake, vinhu vyake vyose vitelela. 22Komu munhu mwene nguvu yabanzile heyo yahamgendela yamuhume, komboka mizele yake yose, ija yatamanile, na kugola gaja gayambokile. 23Munhu kamba hawile hamonga na niye, ayo yuyo kibidu changu; kabili munhu kamba halundize hamonga na niye, ayo kopwililisa. 24Mzuka mchapalisi mana umulawa munhu, wobita hanhu hali bule mazi, wozahila hanhu ha kuhumulila, hahapatile; kwiza kolonga, nobwela kungʼanda yangu kundawile! 25Avija viyezile, kaivika ifagiligwa ihambigwa. 26Mhunde kagenda kasola wayage hamonga na hiyo mizuka saba ihile kubanza heyo mwenyecho; na hewo wokwingila wokala mumo, avo munhu hiyo hakimambukizo kokuwa mtamu nghani kubanza haja haichanduso.”

Wamota iwo wene mbuli za Mulungu

27Viyakalile yolonga higo, mtwanzi imonga muja muumtinghano katowa lugelegele kalonga, “Imota inda ikulelile, na matombo gaonghile!” 28Komu heyo kalonga, “Ihoko wamota waja wotegeleza mbuli za Mulungu na kuzigoga!”

Utango wa Yona na Salomo

29Wanhu bwando vuwammemele kasonga kulonga, “Mulelo uno mulelo wihile, wozahila kilolomboto, bali honda lulagusilwe kilolomboto komu kilolomboto kija cha Yona. 30Kwa mzoko kamba vija Yona viyakalile unzonza hameso ga wanhu wa Ninawi, avo vivo vondayawe Mwanage Munhu kwa mulelo uno. 31Mtawala mtwanzi yalawile Sheba kokwima wima siku ya ikitala hamonga na wanhu wa lukolo luno, na heyo kowatagusa kamba wana matozo, kilumbo heyo keza yolawa nyenza za isi yategeleze fiyuko za Salomo, na hano kabaha mkulu kubanza Salomo. 32Wanhu wa Ninawi wokwima wima siku ya ikitala hamonga na lukolo luno, wowatagusa kamba luna matozo, kilumbo hewo waleka gehile wavumila gayalongile Yona; na hano kabaha mkulu kubanza Yona.

Taa ya lukuli

33Haduhu munhu yobwinha taa, yaike hakifiso hebu hasi ya kigelo, bali koika uchana hamulango, kwa mzoko waja okwingila walole hazelu. 34Taa ya lukuli dijo disiso; kamba siso jako dihangʼala, lukuli lwako lose longʼala; kamba siso jako dihabanangika, na lukuli lwako lokona ziza. 35Avo teganya umulangaza uli mumo mgati mmwako, sikuugalamke ziza! 36Avo kamba umulangaza uhenela mulukuli lwako lose, haduhu honda hakale ziza, lukuli lwako lose lokala hazelu kamba vija taa viyakaga, kuno ilawa lumwemwe.”

Mojona mweye wazenzeleganye

37Viyakalile yolonga, Fariseo imonga kamgomela kumwake, yaje chakuja; na heyo kakala hameza. 38Ayuja Fariseo vija viyamuwene Yesu yoja hananawa tanhu, kakanganya.

39Mndewa kamulongela, “Amweye Mafariseo mosunha kunze vikasi na mikungu, komu mgati mmema ubokonyi na wiho. 40Mwa wabozi! ayuja yaviumbile vya kunze iyo nani, bule haviumbile vya mgati navyo? 41Avo vija vili mgati vigoleleni wakiwa, mhunde viya vyenu vyose vyongʼala. 42Komu mojona mweye Mafariseo, kilumbo molava fungu da kumi ja bwasi, nhunguja na mboga zose, bali haja hana ikitala na unozi wa Mulungu mobita wima; gano mwandakana kugasanghana, wala ago sukumgaleke!

43Mojona mweye Mafariseo, kilumbo mulondaga kukala kuulongozi mzingʼanda za nhambiko, kabili kwilamusa na wanhu mna gamagulilo. 44Mojona mweye, kilumbo mgalamka makabuli hagonekaga; kamba wanhu wahabita uchana, wabule mzoko nago.”

45Munhu imonga wa Wana-Nhaguso kamwidika kamulongela, “Mkulufunzi, ago goulonga kutudununza na tweye!”

46Kalonga, “Na mweye Wananzuma mojona na mweye, kilumbo muwadikwaga wanhu mizigo migaga, na mweye wenyego hamwikwasaga mizigo hiyo hebu kwa chanda chenu kimonga. 47Mojona mweye, kilumbo mogazenga mapanga ga Walaguzi, na tata zenu iwo wawo wawakomile! 48Avo mokisindila na kutogola wenyecho, tata zenu vuwatendile; kilumbo hewo wakoma, na mweye mozengela mapanga. 49Kilumbo hicho nghungwi za Mulungu zilonga, Lola nowagala kumwao walaguzi na watumigwa; wayagwe wowakoma, wayagwe wowawinga. 50Giladi mulelo uno ulihe mulopa wose wa Walaguzi witike lulawile chanduso, ulumwengu vuumbigwe, kusongela mulopa wa Abeli kuvikila mulopa wa Zakariya yuja yakomigwe hagati ya meza ya Mulungu na ngʼanda ya Mulungu; avo nomulongelani, Mulelo uno woziliha.

52Mojona mweye Wana-Nzuma, kilumbo mulusola lufungulo lwa fiyuko; wenyego hamwingila, na waja wolonda kwingila mowakimila.”

53Viyalawile muja, Wananzuma na Mafariseo wasonga kumuuzauza vihile, kuno womdwanza na mbuli bwando; 54wamgeza, kuno wogesa kugoga ulonzi wihile wonda ulawe mmulomo mmwake.

Currently Selected:

Luka 11: ZAM75

Highlight

Copy