Yohana 4
4
Mtwanzi wa Kisamaria kalagilwa mazi ga digunge
1Baho mndewa viyatangile, kumbe Mafariseo wahulika kamba Yesu kotenda wanahina bwando kubanza Yohana na kuwabatiza, – 2bali Yesu mwenyecho habatize wanhu, komu wanahina wake, – 3kauleka Uyuda kachola kubwela Galilea. 4Na heyo vimwandakana yabite hagati ya Samaria.
5Basi kavika kukiwambo cha Samaria kikemagwa Sikari, behibehi na umgunda wa Yakobo uyamwinghile mwanage Yusufu. 6Na hiko kukala na sima ja Yakobo; baho Yesu vija viyadonhile kilumbo cha umwanza wake, kakala hasi ha idisima; aho ikala ivikile saa sita.
7Keza pinga wa Kisamaria kudeha mazi. Na Yesu kamulongela, “Ningha mazi ningʼwe!” 8Kilumbo wanahina wake wakala wacholile kukiwambo kugula chakuja. 9Yuja ipinga Msamaria kamulongela, “Vilihi gweye Muyuda vuupula (mazi) kumwangu ungʼwe, na niye na mtwanzi wa Kisamaria?” (Kwa mzoko Wayuda hawaigondanyaga na Wasamaria.) 10Yesu kamulongela, “Kamba uhatangile zingaombwe da Mulungu na heyo yalihi yokulongela, Ninghe mazi ningʼwe, gweye uhampulile heyo, na heyo yahakugolele mazi ga ugima.” 11Yuja ipinga kamulongela, “Mndewa, kwa bule na kiya cha kudehela, na ikisima kigidikila nghani, avo kogapata kwahi higo gamazi ga ugima? Che! 12Gweye kwa mkulu kubanza tafa wetu Yakobo yatwinghile sima dino, na heyo mwenyecho kangʼwa na wanage wose na fugo zake?” 13Yesu kamwidika yolonga, “Yonda yangʼwe mazi gano kwiza kokona nghilu kabili. 14Maza yonda yangʼwe mazi gaja gonda nimwinghe niye, honda yone nghilu digunge na digunge, komu gano gonda nimgwelele niye, gogalamka nzokwe za mazi gobwinda mmwake na nghulumo muugima wa digunge.” 15Yuja mtwanzi kamulongela, “Mndewa, ninghe mazi higo, sikumbone nghilu, sikumbwele hano kudeha.”
Mpinga kalagilwa matozo, na vonda gasegezwe
16Yesu kamulongela, “Genda ukamkeme mkasano wako, wize nayo!” 17Yuja imtwanzi kedika kalonga, “Nabule mbigalo.” Yesu kamulongela, “Kulonga goya, nabule mbigalo. 18Kumbe kukala nawambigalo wanhano, na hiyo yuli nayo sambi, si mkasano wako; aho kulonga ya ihoko.” 19Imtwanzi kamulongela, “Mndewa, nokona kamba gweye kwa Mlaguzi. 20Tata zetu watambikila hadigongo didi, amweye molonga, kumbe hiko Yerusalemu baho hanhu hatwandakane tweye mnhambiko.” 21Yesu kamulongela, “Mamo unhogole, chokwiza kimilo, chonda kwiza wamtambikile Tata si kuna digongo dino ngʼo wala kuja Yerusalemu. 22Mweye motambikila vivo hamvitangile, atweye totambika vitumanyile, kilumbo uhonelo ulawa kwa Wayuda. 23Bali chokwiza kidami, vilema cha baha, waja wompula Mulungu muikweli, kwiza leka wompula Tata mloho na mwihoko; kwa mzoko Tata kowazahila wanhu wonda wampule vivo. 24Mulungu yuyo Loho, na hewo womtambikila viwandakana wamtambikile mloho na mwihoko.”
25Ija mtwanzi kamulongela, “Nivimanya kamba Mesiya kokwiza yokemigwa Kristo, na heyo vonda yeze kotugubulila viloto vyose.” 26Yesu kamulongela, “Iyo nene nilonga nagwe.”
Chakuja choyolonda Yesu, kimilo cha umulawo
27Mhunde baho wanahina wake wavika wakanganya, kilumbo kakala yolonga na mtwanzi; bali haduhu yalongile, “Kozahila choni?” hebu “Vilihi ulonga nayo?” 28Aija mtwanzi yomana kuileka inongo yake bahaja, kagenda kukiwambo kawalongela wanhu, 29“Izoni mulole munhu yandongele viloto vyose vinhendile, mmanye heyo iyo Kristo?” 30Basi walawa mkiwambo wamgendela.
31Na kuchugu wanahina wampembela wolonga, “Mkulufunzi, diya tanhu!” 32Kawalongela, “Niye ninacho chakuja hamkimanyile mweye.” 33Wanahina wakala woilongela wao kwa wao, “He! kuna munhu yamgalile mandiya?” 34Yesu kawalongela, “Chakuja changu icho kino, kugatenda manogelwa gake Yanhumile, haimambukize ikazi yake.
35Che, hamulongaga mweye, isigale miyezi minne kileka wize umulawo? Avino nomulongelani, Loleni mwinule meso genu, muyone imigunda viili mizelu ilonda kuhunigwa. 36Na heyo yohuna, kuno yobokela kitumetume, kolundiza ndigwa kuugima wa milongo na milongo, giladi yahandile yadenghelele hamonga na ija yohuna. 37Avo mina mbuli hiyo ilumba, Imonga yohanda, iyagwe yohuna. 38Niye nimtumileni kuhuna gaja hamgagaiye. Wayagwe waigaza, na mweye mwingile mmagazo gawo.”
39Kileka Wasamaria bwando wali mkiwambo kija wamtogola Yesu kwa kimu cha mtwanzi ija yamsindile yolonga, “Kandongela viloto vyose vinhendile.” 40Basi Wasamaria vuwamgendele, wampembela yakale kumwao, kakala hiko siku mbili.
41Na wanhu bwando nghani wamtogola kwa sosombi ja Longa jake. 42Wamulongela ija mtwanzi, “Vino sambi tweye tumtogola si kamba mumbuli zako gweye aka, kahi wenyego tuhulika, kabili tuvitanga kamba heyo magambo yuyo Muhonya iisi.”
Mlaguzi muiisi yake kabule nhogolwa; Akida wa Kapernaumu viyamtogole Yesu
43Mabaho siku mbili zija vizimalile, kasegela hiko kagenda Galilea. 44Kwa mzoko Yesu mwenyecho kesindila kamba Mlaguzi kabule nhogolwa muiisi yake mwenyecho. 45Avo viyavikile Galilea, Wagalilea wambokela goya kilumbo wazona zija zinhuko zose ziyatendile Yerusalemu mu sikunghulu, na hewo wakala waigendela sikunghulu.
46Imala kabwela viyagwe Kana ya Galilea kwayagalule mazi kugalamka ugimbi. 47Kukala na akida imonga Kapernaumu, heyo mwanage kakala mtamu. Aija viyahulike kamba Yesu kavika Galilea kulawa Uyuda, kamgendela kamuhembekeza yeze kumuhonya mwanage, kilumbo kakala behi na kudanganika. 48Yesu kamulongela, “Kamba hamuwene vinzonza na malolomboto, mweye hamtogolaga.” 49Yuja akida kamwidika, “Mndewa, izo mbwisa, mwanangu sikuyafe!” 50Yesu kamulongela, “Genda, mwanago mgima!” Munhu ija kadigoga longa dija diyamulongele Yesu, kagoga nzila kachola. 51Na yahali mnzila, kawatinghana nyakadala zake wampetela, “Mwanago mgima.” 52Na heyo kawauza, Saa nyingahi imwana viyahonile? Wamulongela, “Jana saa saba homa imulawa.” 53Baho ija tata kavitanga iyo saa ija Yesu iyamulongele, “Mwanago mgima.” Kamtogola hamonga na wose wali mngʼanda yake.
54Kino icho kilolomboto chekabili kiyatendile Yesu viyalawile Uyuda kwiza Galilea.
Currently Selected:
Yohana 4: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.
