LUCAS 24

U ca'a púut cuxtal Jesús

(Mt 28.1-10; Mr 16.1-8; Jn 20.1-10)

1Tu yáax kiinil le semanao' le co'olelo'obo' j suunajo'ob te j mucnalo', táan u píikil, táan u bisico'ob le qui'iboc xíiwo'ob tu nu'ucbeso'obe'; yaan u láak co'olelo'ob j bino'ob xan yéetelo'ob. 2Le ca j kuhco'obe' tu yilo'ob mina'an tu cúuchile' le tuunich macmajil ca'ach le mucnalo'. 3Ca j ooco'obi', ba'ale' ma' tu yilajo'ob u wíinclil Yuum Jesusi'. 4Sa'at u yóolo'ob tu yo'olal lela', tu yilajo'ob túun ca'a túul xiibo'ob táan u léembal u búuco'ob wa'alacbalo'ob tu yicnalo'ob. 5Ba'ale' tumen chinlajo'ob tac lu'um yéetel sajaquilile', j a'ala'ab ti'ob tumen le xiibo'obo': ¿Ba'axten ca caxtique'ex ichil quimeno'ob máax cuxa'an? 6Mina'an waye', tumen dzo'oc u ca'a púut cuxtal. Ka'ajac te'ex ba'ax tu ya'alaj te'ex ca'aliquil ti' yaan Galileae', 7táan u ya'alique' u Paal Máaque' yaan u ku'ubul tu kab keban máaco'ob, yaan u químsa'al ti' cruz, ba'ale' tu yóox p'éel kiine' yaan u ca'a púut cuxtal.

8Ka'aj túun ti'ob ba'ax u ya'almaj Jesús. 9Cu dzo'ocol túun u lukbalo'ob te j mucnalo', tu tzicbaltajo'ob tuláacal lela' ti' le once aj canbalo'obo' bey xan ti' le u láako'obo'. 10María Magdalena, Juana, María u maama Jacobo yéetel u láak co'olelo'ob leti'ob bis le péectzil ti' le aj canbalo'obo'. 11Ba'ale' le aj canbalo'obo' tu yu'ubajo'ob bey chocojo'olal le ba'ax tu ya'alaj le co'olelo'obo', le o'olale' ma' tu yocsaj óolto'obi'.

12Ba'ale' Pedroe' jóoke' ca j bin áalcabil tac te mucnalo'. Le ca j paacatnaj ichile' tu yilaj le sac nook dza'an jun tzéelo', ca j bin tu yotoch jaka'an yóol tu yo'olal le ba'ax dzo'oc u yúuchulo'.

Tu bejil Emaus

(Mr 16.12-13)

13Ti' le kiino' ca'a túul le aj canbalo'obo' táan u bino'ob tu caajil Emaús, míin óox lúub tu caajil Jerusalén. 14Táan u tzicbaltico'ob tuláacal le ba'ax dzo'oc u yúuchulo'. 15Ca'aliquil táan u tzicbaltico'ob yéetel táan u t'anal t'aano'obe', Jesuse' tu nadzubáa tu yicnalo'obe' ca jo'op' u xíimbal yéetelo'ob. 16Ba'ale' quex tu yilajo'obe' yaan ba'ax beetic ma' u kaj óoltico'ob máaxi'. 17Ca túun j káata'ab ti'ob tumen Jesús: ¿Ba'ax ca t'anal t'antique'ex ca'aliquil táan a xíimbale'ex te j beja'? ¿Ba'axten jach luba'an a wóole'ex?

18Cleofas, jun túul ti'obe' tu núucaj ti': ¿Chéen wa teech ichil le u'ulabo'ob ma' a wojel ba'ax dzo'oc u yúuchul Jerusalén ti' le kiino'oba'?

19Jesuse' tu ya'alaj ti'ob: ¿Ba'ax dzo'oc u yúuchul? Ca tu núucajo'ob ti': Le ba'ax j úuch ti' Jesús Nazaretilo', jun túul aj bóobat nojoch u páajtalil tu táan Ku yéetel tu táan tuláacal máaco'ob ti' ba'ax cu beetic yéetel ti' ba'ax cu ya'alic. 20J ku'ub tumen u nojchilo'ob le aj kiino'obo' yéetel tumen c jalach wíinico'ob u ti'al ca xot kinta'ac ti' quíimil yéetel u ti'al ca si'inic ti' cruz. 21To'one' t tucultaje' leti' le máax cun toquic ca'ach u caajil Israel. Bejela'e' tu yóokol tuláacal lela' dzo'oc óox p'éel kiin úuchuc le ba'alo'oba'. 22Quex tumen dze'edzec co'olelo'ob ichilo'one' dzo'oc u ja'asico'ob c óol, tumen j bino'ob táan u taal u sáastal te j mucnalo', 23ba'ale' tumen ma' tu yilajo'ob u wíinclile' j taalo'ob u tzicbalt to'one' chíicpaj ti'ob ángelo'ob táan u ya'alico'obe' cuxa'an Jesús. 24Cu dzo'ocole' dze'edzec ti' to'one' j bino'ob te j mucnalo' ca tu yilajo'ob bey je'el bix tu ya'aljilac le co'olelo'obo', ba'ale' ma' tu yilajo'ob Jesusi'.

25Ca túun j a'ala'ab ti'ob tumen Jesús: ¡Jach mina'an wa a na'ate'ex, buca'aj dzo'oc u xáantal a wocsaj óoltique'ex tuláacal ba'ax a'ala'an tumen le aj bóobato'obo'! 26¿Ma' wa unaj ca u mukyajt le Cristoo' tuláacal le ba'alo'oba' ma'ili' nojbe'encunsa'aque'?

27Ca túun jo'op' u tzolic ti'ob le ba'ax cu ya'alic tuláacal le Quili'ich Dzíibo'ob tu yo'olal leti'o', cáaj yéetel u dzíibo'ob Moisés ca tu dzo'ocsaj yéetel u dzíibo'ob tuláacal le aj bóobato'obo'.

28Le ca j kucho'ob te j caaj tu'ux cu bino'obo', Jesuse' tu beetaj bey yaan u bin u xíimbale'. 29Ba'ale' leti'obe' tu sen káat óoltajo'ob ti' ca p'áatac, táan u ya'alico'ob: P'áaten t éeteel, tumen táan u bin kiin yéetel ta'aytac u yáakabtal. Ca túun j ooc Jesús p'áatal yéetelo'ob. 30Le ca j culaj janal yéetelo'obe', tu ch'a'aj le waajo', tu dzáaj nib óolal, tu xet'aje' ca tu dzáaj ti'ob. 31Ti' le súutuco' sáasilchaj u yicho'obe' ca tu kaj óoltajo'ob, ba'ale' leti'e' j sa'at tu táan yicho'ob. 32Ca tu ya'alajo'ob tu baatzilo'ob: ¿Ma' wa jaj bey jun p'éel káak j t'a'ab ti' c pucsi'ikal le ca j t'aanaj t éetel te j bejo', ca'aliquil táan u tzolic to'on le Quili'ich Dzíibo'obo'?

33Tu séeblaquil líiko'ob túune' ca j suunajo'ob Jerusalén, tu'ux tu yilajo'ob much'ucbal le once aj canbalo'obo' bey xan le u láako'ob yano'ob yéetelo'obo'. 34Lelo'oba' tu ya'alajo'ob ti'ob: Tu jaajil dzo'oc u ca'a púut cuxtal Yuumtzil, dzo'oc u chíicpajal ti' Simón.

35Leti'ob túune' tu tzicbaltajo'ob ba'ax j úuch ti'ob te j bejo', bix úuchic u kaj óoltico'ob Jesús le ca tu xet'aj le waajo'.

Jesús cu chíicpajal ti' le aj canbalo'obo'

(Mt 28.16-20; Mr 16.14-18; Jn 20.19-23)

36Ca'aliquil táan u t'aano'ob tu yo'olal le ba'alo'oba', Jesuse' j chíicpaj chúumuc ti'ob, táan u ya'alic: Jéedzel ti' te'ex.

37Leti'obe' ja'ak u yóolo'ob yéetel sen sajacchajo'ob ca tu tucultajo'obe' táan u yilico'ob jun túul pixan.

38Ba'ale' ca j a'ala'ab ti'ob tumen Jesús: ¿Ba'axten jaka'an a wóole'ex? ¿Ba'axten yaan ca'a p'éel óolal ta pucsi'ikale'ex? 39Ile'ex in kabo'ob yéetel in wooco'ob. Jach tu jaajil teen. Machene'exi' yéetel pactene'exi', tumen jun túul pixane' mina'an u bakel mix u baaquel je'el bix a wilique'ex yaan ti' tena'.

40Le ca tu ya'alaj lela' tu ye'esaj u kabo'ob yéetel u yooco'ob ti'ob. 41Ba'ale' tumen leti'obe' láili' ma' táan u yocsaj óoltico'ob, tu yo'olal u sen qui'imac óolalo'ob yéetel u jaka'anil yóolo'obe', ca j a'ala'ab ti'ob tumen Jesús: ¿Yaan wa ba'al jaantbil waye'?

42Ca túun dza'ab jun xéet' ka'abil cay ti', bey xan jun p'íit caab. 43Leti'e' tu ch'a'aje' ca tu jaantaj tu táano'ob.

44Cu dzo'ocole' ca tu ya'alaj ti'ob: Le ba'ax j úuch tena' leti' le ba'ax tin wa'alaj te'ex ca'aliquil yanen ca'ach ta wéetele'exe': kaabéet u dzo'ocbesa'al tuláacal ba'ax dzíiba'an tin wo'olal tu ya'almaj t'aan Moisés, tu dzíibo'ob le aj bóobato'obo' yéetel ti' le Salmo'obo'.

45Ca túun tu je'aj u tuuculo'ob u ti'al u na'atico'ob le Quili'ich Dzíibo'obo'. 46Ca tu ya'alaj ti'ob: Bey dzíiba'anil, le Cristoo' kaabéet u mukyaj, ba'ale' tu yóox p'éel kiine' yaan u ca'a púut cuxtal ichil le quimeno'obo'; 47tu kaaba' xan bíin úuchuc tze'ec ti' tuláacal caajo'ob, lela' Jerusalén cun chúucpajal. Yaan u ya'ala'al ti'obe' unaj u kexic u tuuculo'ob u ti'al ca sa'atsa'ac u kebano'ob. 48Te'ex can jajcuntic le ba'alo'oba'. 49Ile'ex tene' bíin in túuxt ta wóokole'ex le ba'ax u ya'almaj in Taatae', ba'ale' p'áatene'ex way tu caajil Jerusalén tac quéen a kame'ex le páajtalil ca'an u taalo'.

Jesús cu bin j ca'an

(Mr 16.19-20)

50Ca túun j bisa'abo'ob tumen Jesús tac Betania, ca tu líiksaj u kabo'obe' ca tu qui'iqui' t'antajo'ob. 51Ca'aliquil táan u qui'iqui' t'antico'obe', tu jun páaycunsubáa ti'obe' ca j bisa'ab ca'an. 52Leti'obe', cu dzo'ocol u kultico'obe', suunajo'ob Jerusalén, jach qui'imac u yóolo'ob. 53Ti' yano'ob kulnaj mantadze', táan u qui'iqui' t'antico'ob Yuum Ku. Amén.

Currently Selected:

LUCAS 24: MAYADC

Highlight

Copy