Génesis 42

U binbalo'ob Egipto u sucu'uno'ob José

1Le ca tu yojéeltaj Jacob yaan trigo Egiptoe', tu ya'alaj ti' u paalal: ¿Ba'ax ca beetique'ex beya', chéen culucbale'ex a paclan ilaba'ex te'elo'? 2Dzo'oc u ya'ala'al teen yaan bin trigo Egipto. Xeene'exi' mane'ex trigo c ti'alte, u ti'al ca páatac c cuxtal.

3Diez ti' u sucu'uno'ob Josee' j bino'ob Egipto u mano'ob trigo; 4Ba'ale' Jacobe' ma' tu cha'aj u bin Benjamín u yíidzin Josei', tu yo'olal tu tucultaj; je'el u yúuchul ba'al kaas ti'e'. 5U paalal Israele' j bino'ob pa'ate' yéetel u láak máaco'ob cu bino'ob xan ca'ach j maan, tumen ti' tuláacal u lu'umil Canaán yaan ca'ach wi'ijil.

6Josee' leti' ca'ach u jalachil u lu'umil Egipto, leti' xan conic trigo ti' le máaco'ob cu taalbalo'ob tuláacal tu'uxo'ob. Le ca j kucho'ob u sucu'uno'ob tu táane' noclajo'ob j lu'um tu táan. 7Le ca tu yilaj José u sucu'uno'obe' tu kaj óoltaj leti'ob; ba'ale' tu beetaj bey ma' u kaj óoltajo'obe', ca tu téec káatchi'itaj ti'ob:

Te'exe', ¿tu'ux a taale'ex?

Leti'obe' tu núucajo'ob: Ti' c taalbal Canaane' j taalo'on c maan trigo.

8Quex tumen tu kaj óoltaj José u sucu'uno'obe', leti'obe' ma' tu kaj óoltajo'ob wa leti'i'. 9José túune' ka'aj ti' le wayako'ob yanchaj ti' tu yo'olalo'obe', ca tu ya'alaj ti'ob:

Te'exe' j ch'uuque'ex. Chéen taale'ex a wile'ex tu'ux yaan cúuchilo'ob ma' ma'alob cananta'ano'ob ti' le caajo'oba'.

10Leti'obe' tu núucajo'ob: Ma', nojoch máac, to'on a palitzilo'one' j taalo'on u ti'al c man trigo. 11Tuláacalo'one' u paalalo'on jun túul taata, to'one' utzil máaco'on mix jun téen máanaco'on j ch'úuc.

12Josee' tu ca'a a'alaj ti'ob: Ma' jaaji'. Te'exe' j taale'ex a wile'ex tu'ux ma' ma'alob cananta'an le caajo'oba'.

13Ba'ale' leti'obe' tu núucajo'ob:

Le a palitzilo'oba' doce láaktzilo'on, jun túuli'ili' c taata, ti' cajacbalo'on Canaane'. U t'uupil c íidzine' j p'áat yéetel c taata, le u láak jun túulo' mina'an t éetel bejela'e'.

14Josee' tu babal a'alaj ti'ob: Je'el bix tin wa'aljilaque'. Te'exe' j ch'úuqe'ex, 15yéetel le ba'ax dzo'oc a wa'alique'exa' binelca'aj c il wa jaaj. Tu kaaba' faraón quin jalach t'antic: ma' bíin jóokoque'ex waye' wa ma' tu taal a wíidzine'ex. 16Xi'ic jun túul ti' te'ex u ti'al taasic, le u chuca'ano'obo' kala'ano'ob cu binelo'ob j p'áatal. Binel c il wa jaaj ba'ax ca wa'alique'exo'; wa ma' jaaje', te'exe' chéen ch'úuqe'ex. ¡Quin jalach t'aan tu kaaba' faraón!

17J ka'alo'ob óox p'éel kiin tumen José, 18ba'ale' tu yóox p'éel kiine' tu ya'alaj ti'ob:

Yaan teen u sajbe'entzil Ku, beete'ex jun p'éel ba'al u ti'al ma' a quíimile'ex: 19wa tu jaajil utzil máaque'exe' p'ate'ex jun túul ichile'ex te j kalabo', le u chucáane'exo' xeene'ex a bise'ex le trigo u ti'al u jaant a láaktzile'ex. 20Le quéen suunaque'exe ca taasique'ex a wíidzine'ex, je'el c ilic wa jaaj ba'ax ta wa'alaje'exo', wa ma'e' yaan a quíimile'ex.

Leti'obe' tu éejemtajo'ob. 21Leti'obe' tu ya'alajo'ob tu baatzilo'ob: Jach tu jaajile', jach kaas j bisajbáa yéetel c íidzin, ma' t óoltaj c u'uy u káat óolali', mix t ch'a'aj óotzilil ti'i', quex tumen t ilaj u yaj óolal. Let o'olale' taal to'on le yaj óolala'.

22Ca j núuca'ab tumen Rubén:

Tene' tin wa'alaj te'ex ma' a beetique'ex loob ti' le j xi'ipalo'; ba'ale' ma' ta wu'uyaje'ex in t'aani', bejela'a' túune' yaan c cuchic u si'ipilil quíimic.

23Leti'obe' ma' tu yojéeltajo'ob wa Josee' táan u na'atic ba'ax cu ya'alico'obi', tumen leti'e' j t'aanaj yéetelo'ob tu chi' jun túul aj waskesaj t'aan. 24Josee' tu tzelajulbáa ti'obe' ca jo'op' u yokol. Le ca j suunaj tu'ux yano'obe' leti'e' j páatji u t'aan yéetelo'ob; tu jun páaycuntaj Simeón, tu yicho'ob tu beetaj u ka'axal. 25Cu dzo'ocole' tu beetaj ca chu'upuc u costal yéetel trigo, tu ya'alaj xan ca su'utuc ti'ob u taakin tu jujun túulil, ca dza'abac ichil u costal, ca dza'abac xan janal u tzéenticuba'ob te j bejo'. Bey beeta'abico'. 26Leti'ob tune' tu dzajo'ob le trigo yóokol le burro'ob ca j bino'ob.

27Le ca j kucho'ob tu'ux cu bino'ob u máansajo'ob áakabe' jun túul ti'obe' tu wach'aj u costal u ti'al u dzáic u janal yaalak burroe', ca tu yilaj ti' yaan u taakin tu jool u costale'. 28Ca túun tu ya'alaj ti' u láaktzilo'ob:

¡Ile'ex, su'ut teen in taakin; je'el yaan ichil in cuucha'!

Tuláacalo'ob sen ja'ak yóolo'ob, j quiquilnajo'ob ichil u sajaquilo'obe' tu paaclan a'alajo'ob:

¿Ba'ax dzo'oc u beetic to'on Ku beya'?

29Le ca j kucho'ob tu lu'umil Canaane', tu tzicbaltajo'ob ti' Jacob u taataob tuláacal ba'axo'ob j úuch ti'ob, ca tu ya'alajo'ob ti':

30Le máac méektáantic le u lu'umil Egiptoo' jach dzíic tu t'aanajilaco'on, tu tacaj c pool, j bino'on bin c ch'úuct u caajalo'ob. 31Ba'ale' to'one' t a'alaj ti' ma'; to'one' utzil máaco'on, mix jun téen c beetmaj c ch'úuquil. 32To'on xane' doce'on ti' c taata, láaj láaktzilo'on, t a'alaj ti' xan jun túul ichilo'one' j sa'ati, u chichanile' j p'áat ta wéetel Canaán. 33Leti' túune' tu ya'alaj to'on: In ca'aj in wil wa jaaj utzil máaque'ex. P'áatac tin wicnal jun túul ichile'exi', xeene'ex a bise'ex jun p'íit trigo u ti'al a láaktzile'ex, 34chéen ba'ale' yaan a taasique'ex teen u j t'uupil a wíidzine'ex. Beyo' je'el u páajtal in wojéeltic wa utzil máaque'exe', ma' j ch'úuque'exi'; je'el in cha'akabtic xan le a láake'exo', te'exe' je'el u páajtal a máane'ex je'el tu'uxac a káate'ex te j lu'umo'oba'.

35Le ca tu wach'ajo'ob u cucho'obe' tu yilajo'ob tu jujun túulil u mejen to'il u taakin, tuláacalo'ob ja'ak yóolo'ob tac u taataob. 36Jacob túune' tu ya'alaj: Te'exe' táan a p'atiquene'ex j ma' paalil. Josee' mina'an t éetel mix xan Simeón; bejela'e' bin a ca'aje'ex a toque'ex teen xan Benjamín. Man tadz ti' teen cu lúubul le kaaso'.

37Rubén túune' tu ya'alaj ti' u taata:

P'at in canantic Benjamín, teen quin in sut teech. Wa ma' tin sutaj teche' cu páajtal a quíimsic tu ca'a túulal in paalal.

38Ba'ale', Jacobe' tu núucaj: In j xibil paale' ma' bíin xi'ic ta wéetele'exi'. José u sucu'une' dzo'oc u quíimil, chéen p'aatal teen in j t'uup. Wa cu yúuchul ba'al kaas ti' te j bejo', ba'ax bíin a beet te'ex, te'ex ca bin a cuche'ex u si'ipilil; wa ca kuchuc quíimile' le óotzil nuxiba' yaayaj tuucul cu bin quíimsic.

Currently Selected:

Génesis 42: MAYADC

Highlight

Copy