Génesis 35

Yuum Kue' cu qui'iquit't'antic Jacob

1Kue' tu ya'alaj ti' Jacob: Líikesabáa, xeen j cajtal Betel. Te j cúuchilo' beet jun p'éel u multuunil kultaj ti' le Ku chíicpaj teech ca'aliquil táan ca'ach a wáalcab ti' a sucu'un Esaú. 2Jacob túune' tu ya'alaj ti' u láaktzilo'ob yéetel ti' tuláacal le máaxo'ob láakintico':

Pule'ex le beetbil kuob yaan ichile'exo', ichquilnene'ex, kex xan a nooke'ex. 3Co'one'ex séeba'an Betel, tumen in ca'aj in beet jun p'éel u multuunil kultaj ti' u tzicbe'enil Ku máax j áanten le ca j mukyajnajene', tu láakintajen xan tuláacal tu'ux j máanen.

4Leti'ob túune' tu kubajo'ob ti' Jacob tuláacal le beetbil kuob tac xan le tuupo'ob yaan ca'ach tu xiquino'obe', Jacobe' tu láaj mucaj tu chuun jun cúul béec yaan ca'ach tu lu'umil Siquem. 5Le ca jóoko'obe', Kue' tu beetaj u sen sajactal tuláacal u taatailo'ob le caajo'obo', tu yo'olal lelo' ma' ch'a'apachta'ab u paalal Jacobi'.

6Jacob yéetel le máaxo'ob láakintico' j kucho'ob tu caajil Luz, jun p'éel nojoch caaj cu kaaba'intic xan Betel yaan tu lu'umil canaán. 7Tu beetaj jun p'éel u multuunil kultaj, ca tu dzaj u kaaba'int le cúuchilo' El-Betel, tumen chíicpaj Ku ti' te'elo' ca'aliquil táan u yáalcab ti' u sucu'un, 8ti' xan j quíim x Débora le co'olel canant x Raquele', ca j mu'uc yáanal jun cúul béec, naadz Betel. Jacobe' tu dzaj u kaaba'int le cúuchilo': u béequil okol.

9Ca'aliquil táan u suut Jacob Padan-arame' Kue' chíicpaj ti' tu ca'a téen ca 10tu qui' t'antaj beya':

Teche' Jacob ca kaaba'intic,

ba'ale' bejela'e' ma' bey ca j bin t'anbilo';

Israel a kaaba' bejela'e'.

Cu dzo'ocol u ke'exel u kaaba' tumen Kue', 11j a'ala'ab ti':

tene' u Junab Kuilen tuláacal páajtalil;

yanac ya'ab a paalal, bey xan yanac ya'ab ch'i'ilancab,

ti' teech bíin jóokoc jun múuch' caajo'ob, yéetel ya'abcach caajo'ob

ichil xan a ch'i'ibale' bíin yanac ajawo'ob.

12Le lu'um tin dzaj ti' Abraham yéetel ti' Isaaque',

quin dzáic xan ti' teech,

pachal ti' teche' bíin in dzáa xan ti' a ch'i'ibalo'ob.

13Le ca j luk Ku ti' le cúuchil tu'ux t'aanaj ca'ach yéetel Jacobo', 14Jacobe', tu ch'a'aj jun p'éel tuuniche', ca tu wa'alcunsaj, j p'at bey jun p'éel ocom túune', te tu'ux t'aanaj Kuo'; cu dzo'ocole' tu wecaj aceite yéetel vinoe', u ti'al u jun páaycuntic, 15ca tu dzaj u kaaba'int Betel le cúuchilo'.

Bix úuchic u quíimil x Raquel

16Cu dzo'ocole' j kucho'ob Betel; ma' jach náach yanilo'ob ti' Efratae', ca j yanchaj u chan paal x Raquel, talam úuchic u síijsaj. 17Tu jach talamile' le x aalantzilo' tu ya'alaj ti': Ma' ch'a'ic sajaquil dzo'oc a síijsic jun túul chan j xi'ipal. 18Ba'ale' leti'e' ta'itac ca'ach u quíimil, ichil u x chakéetile' tu ya'alaj: Benoni, u kaaba' le chan paalo', quex beyo', u taata le chan paalo'; Benjamín tu dzajilac u kaaba'inte.

19Bey úuchic u quíimil x Raquel, ca j mu'uc tu bejil Efrata, bejela'e' cu kaaba'intic Belén. 20Jacobe' tu líiksaj jun p'éel pak yóokol u mucnal u ti'al u ka'ajsa'al, le u pakil ka'ajsajilo' tac bejela'e' cu chíicultic u mucnal x Raquel.

21Israele' j túul xíimbalnaj tac tu witzil najil Edar. 22Ca'aliquil ti' caja'an Israel te j cúuchilo', Rubene' j chilaj yéetel Bilha, u x keech u taata. Le ca tu yojéeltaj Jacobe', sen j p'u'uji.

U paalal Jacob

(1 Cr 2.1-2)

U paalal Jacobe' chucpaj doce. 23Ti' x Leae' j yanchaj: Rubén u sucu'untzilil, Simeón, Leví, Judá, Isacar yéetel Sabulón 24Le j yanchajo'ob ti' yéetel x Raquele': José yéetel Benjamín. 25Le j yanchajo'ob ti' yéetel x Bilha u x koos x Raquele', Dan yéetel Neftalí, 26Le j yanchajo'ob ti' yéetel x Zilpa u x koos Leae', Gad yéetel Aser. Lelo'oba' u paalal Jacob j síijo'ob tu lu'umil Padan-aram.

U quíimbal Isaac

27Jacobe' j bin u xíimbalt Isaac u taata tu caajil Mamre, jun p'éel nojoch caaj cu kaaba'intic xan Arba wa Hebrón, u cúuchilil tu'ux cajlajo'ob ca'ach Abraham yéetel Isaac. 28Isaaque' yaan ca'ach ciento ochenta ja'abo'ob ti' ca j quíimi. 29J bin u nupubáa yéetel u yúuchben ch'i'ibalo'ob cu dzo'ocol u sen ch'íijil, j mu'uc tumen Esaú yéetel Jacob u paalal.

Currently Selected:

Génesis 35: MAYADC

Highlight

Copy