Génesis 32

Jacob yéetel Esaue' cu nactáanticuba'ob

1Jacobe' tu ch'a'aj u beel, dze'edze'ec u ángelo'ob Ku túune' jóoko'ob u nactáanto'ob. 2Le ca j ila'abo'ob tumen Jacobe', leti'e' tu ya'alaj: Lela' u tzúucul u aj ba'atelo'ob Ku. Let o'olal tu dzaj u kaaba'int le cúuchilo' Mahanaim.#32.2 Mahanaim le t'aana' u káat u ya'al: u múuch'ul u cajnáalilo'ob ca'an, wa u ángelo'ob Ku.

3Jacobe' tu túuchi'itaj wa jay túul aj bisaj t'aano'ob tu caajil Seir, lela' u lu'umil Edom, u ti'al u dzáa u yojéelt Esaú u sucu'une' ba'ax kiin u kuchul, 4ca tu kuben t'antaj ti'ob le péectzila': A'ale'ex ti' Esaú in sucu'une': A wíidzin Jacobe' cu dzáicubáa tu ni' a wooc, cu túuxtic xan a'albil teech: Ti' buca'aj kiino' j cajlajen tu yotoch Labán, 5yaan teen wacaxo'ob, burro'ob, j tamano'ob, j palitzilo'ob yéetel x palitzilo'ob. Leti' le péectzil quin túuxtic ti' in dzuulila', quin dzíiboltic teech a wutzil óolal.

6Le ca j suunajo'ob le aj bisaj t'aano'obo' tu ya'alajo'ob ti' Jacob:

Bino'on c il Esaú a sucu'un, táan u t aal u kamech jach tu yoquil, yéet taal cuatro cientos máaco'ob.

7Le ca tu yu'ubaj Jacob le t'aana', tu sen ch'a'aj sajaquil ca tu sen tucultaj. Ca túun tu jóokesaj ca'a jaatz ti' le máaco'ob u yéet binelo', tu jatzláantaj xan le j tamano'ob, le wacaxo'ob bey le camello'obo'. 8Tumen tu tuclaj: wa cu taal Esaú u beet loob ti' jun jaatze', le u láak jun jaatzo' je'el u páajtal u yáalcabe'. 9Cu dzo'ocole', jo'op' u payalchi': Yuumtzil, u Kuech in nool Abraham yéetel u Kuech in taata Isaac, teech a'al teen ca suunaquen tin lu'umil yéetel ti' in láaktzilo'ob, ta wa'alaj xan teen; yaan u bin teen utzil: 10Ma' tin najmatic a wutzil mix a chuca'an óolal iquil ta wáantilaquen. Tene' tin ch'actaj u yáalcab ja'il le Jordano', mix jun láak ba'al tin bisaj chéen in xóolte', bejela'e' dzo'oc u kuchul yantal teen ca'a múuch' cajtalilo'ob. 11Beet teen utz, ma' a cha'ic in quíimil tu kab in sucu'un Esaú. Sajaquen ca taalac u beet teen loob yéetel ca u quíimes in watano'ob yéetel in paalal. 12Teche' jach sáasil a wa'almail yaan u bin teen utzil, in ch'i'ibal xane' yaan u sen ya'abtal je'el bix u p'ayachil u sa'am lu'umil le ka'anabo', ma' tu páajtal u xo'ocol.

13Ti' le áakabo' jacobe' j ween te'elo', ti' tuláacal ba'axo'ob yaan ti'e' tu yéeyaj siibalo'ob u ti'al Esaú u sucu'un: 14docientos x yuuco'ob, veinte j yuuco'ob, dos cientos x tamano'ob, veinte j tamano'ob, 15treinta x camello'ob táantic u síijsajo'obe' pa'ate' yéetel u mejenilo'ob, cuarenta x wacaxo'ob, diez j wacaxo'ob veinte x burraob, diez burro'ob. 16Cu dzo'ocole' tu kubaj ti' u palitzilo'ob jujun páayil u múuch'ulo'ob, ca tu ya'alaj ti'ob:

Máanene'ex táanil, ile'ex ma' u náadzal jun múuch' ti' u láak.

17Ti' le yáax tu túuxtajo', tu ya'alaj ti':

Le quéen u nactáan teech in sucu'un Esaue', le quéen u káatchi'it ti' teech máax a dzuulile', tu'ux ca bine'ex yéetel máax ti'altic le áalako'ob ca bisico', 18ca núuquic ti': Jun p'éel siibal a ti'al, in dzuulil Esaú, cu túuxtic teech Jacob a palitzil. U ti'al a wojéeltic, leti'e' tzay paach u taal ti' to'on.

19Bey xan tu ya'alajilac ti' le u ca'a túul tu túuxtajo', bey ti' u yóox túulo', ti' tuláacal máaxo'ob bisico'ob u múuch'ulo'ob le aalako'obo' tu ya'alaj ti'ob:

Le quéen a nactáante'ex Esaue' láaili' bey ca bin a wa'alique'ex ti'o', 20bey xan a'ale'ex ti': Jacob a aj meeyjule' tzaylan paach u taal ti' to'on.

Lela' tu beetaj Jacob tu yo'olal tu tucultilac: In ca'aj in jóoms u yóol u p'u'ujul yéetel le siibalo'ob quin yáax túuxtic ti'a', cu dzo'ocole' quin wilic tin wichil. Je'elajqui u yutzil kamiquene'. 21Bey túuno' le siibalo'obo' bisa'abo'ob táanil, leti'e' j p'áat u máans áakab tu'ux jelecbalo'.

Jacobe' cu muuklan muuk yéetel jun túul ángel

22Ti'li'e' áakabo' Jacobe' j líiki', tu cha'aj tu ca'a túulal u yatano'obe', tu ca'a túulal u x kooso'obe', yéetel u once paalale', ca tu beetaj u ch'actico'ob u beel u yáalcab ja'il Jaboc, 23pa'ate' yéetel tuláacal ba'ax yaan ca'ach ti'. 24Le ca j p'áat Jacob chéen tu juune', jun túul máac mukul muuknaj yéetel tac ca j sáaschaji'; 25ba'ale' le máaco' tu yilaj ma' tu páajtal u pa'ic u muuk Jacobe', ca tu loxaj tu'ux cu nupcubáa u baaquel u muuk yooc, ca j júuk le baac ti' Jacob ca'aliquil táan u mukul muuk yéetelo'. 26Le máac túuno' tu ya'alaj ti':

Cha'akabteni', tumen táan u bin u sáastal.

Ca tu núucaj Jacob:

Wa ma' ta qui' t'antiquene' ma' tin cha'akabtiquech.

27Le máaco' tu káat chi'itaj:

¿Bix a kaaba'?

Leti'e' tu núucaj:

In kaaba'e' Jacob.

28Le máac túuno' tu ya'alaj ti':

Ma' bíin a ca'a kaaba'int Jacobi'. Bejela'e' a kaaba'e' Israel,#32.28 Israel, le t'aana' u káat u ya'al: mukul muuknaj yéetel Ku. tumen teche' dzo'oc a mukul muuk yéetel Ku, yéetel wíinico'obe' dzo'oc a pa'a' muuk.

29Jacobe' káatchi'inaj ti':

Bejela'e' a'al teen bix a kaaba'.

Ba'ale' le máaco' tu núucaj ti':

¿Ba'ax u ti'al ca káatchi'itic in kaaba'?

Cu dzo'ocole' le máaco' tu qui' t'antaj te j cúuchilo'. 30Jacob túune' tu dzaj u kaaba'int le cúuchilo' Penuel,#32.30 Penuel, ich hebreo t'aane' u káat u ya'al: u táan yich Ku. tumen tu ya'alaj: Tin wilaj Ku queetlan ich; quex beyo' cuxa'anen tac walquila'.

31Táan ca'ach u ch'actic Penuel ca j tíip' kiin; ba'ale' tu yo'olal u baaquel u muuk yooque' istiquia' u xíimbal. 32Let o'olalo' tac bejela'e' u paalal Israele' ma' tu jaantico'ob le xiich' nupic u baaquel le u muuk ooco', tumen ti' j lo'ox Jacobi'.

Currently Selected:

Génesis 32: MAYADC

Highlight

Copy