Génesis 26

Ba'ax o'olal binic Isaac tu caajil Gerar

1Ti' le kiino'obo' jach mina'anchaj ba'ax jaanta'al ti' tuláacal le lu'umo', je'el bix le yanchaj ti' le kiino'ob cuxa'an ca'ach Abrahame'. Let o'olalo' Isaaque' j yanchaj u bin Gerar tu'ux caja'an ca'ach Abimelec u ajawil u caajil filistia. 2Te'elo' Yuumtzile' j chíicpaje' ca tu ya'alaj ti': Ma' a bin Egipto, p'áaten le tu'ux quin in wa'al teche', 3tene' ti' yanen ta wéetel, yaan xan in qui' t'antiquech, tumen ti' teech yéetel ti' a ch'i'ilancab bíin in dzáa tuláacal le lu'umo'oba'. Beyo' quin dzo'ocbesic in séeb chi' ti' Abraham a taata. 4Bíin in beet u ya'abtal a ch'i'ilancab je'el bix ya'abil le eeko'ob te j ca'ano', yaan xan in dzáic ti'ob tuláacal le lu'umo'oba'. U láak ba'ale', ti' a ch'i'ibal bíin in qui' t'ant tuláacal u múuch' caajilo'ob le lu'uma', 5tu yo'olal tu táan óoltaj Abraham ba'ax tin wa'alaj ti'e', in tzolbe'en t'aano'ob, in túuchi' t'aano'ob, in wa'almaj t'aano'ob yéetel in ca'anbesajo'ob.

6Isaac túune' j p'áat Gerar, 7Le ca j káat chi'ita'ab ti' tumen u j cajnáalilo'ob le cúuchil tu yo'olal x Rebecae', Isaaque' tu ya'alaj u yíidzin. Tu yo'olal u sen qui'ichpamile', Isaaque' tu tuclaj je'el u quíimsa'al tu yo'olal leti'e' tumen u j xiibilo'ob le cúuchilo'.

8Cu dzo'ocol u máan kiino'ob p'áatac te'elo'. Abimeleque' wa'alacbal ca'ach tu yicnal u calom iikil u yotoche', tu yilaj Isaaque', táan báaytic x Rebeca u yatan. 9Ca tu túuchi'itaj t'anbil ca tu ya'alaj ti':

A watan bacáan, ¿bey wa ma'? ¿Ba'ax teen ta wa'alaj a wíidzin? Isaaque' tu núucaj: tumen tin tuuculaj je'el in quiimnsa'al tu yo'olale'.

10Ba'ale' Abimeleque' tu ya'alaj ti':

¿Ba'ax teen ta beetaj le ba'ala'? Wa máax ichil le caaj ca táabac j chiltal ca'ach x yéetel a watane', dzo'oc ca'ach a beetic c si'ipile'.

11Abimelec túune' tu kuben t'antaj ti' tuláacal le caajo': je'el máaxac ca u chi'ichnaccunt le máac wa ca u chi'ichnaccunt u yatane' cu xot kinta'al u cuxtal.

12Ti' le ja'abo' Isaaque' pakalnaj te j cúuchilo', tu yo'olal qui' t'antabic tumen Yuumtzile' jach ma'alobchaj u jooch. 13Sen ayikalchaji, j kuch xan yantal ya'ab ba'alo'ob ti'. 14Tu yo'olal sen ya'abchajic u j tamano'ob, u wacaxo'ob yéetel u palitzilo'obe' le filisteobo' j chu'upo'ob yéetel sawinajil. 15Le ca'ach cuxa'anili' Abraham u taatae', u palitzilo'ob Abrahame' tu potajo'ob ch'e'eno'ob; ba'ale' le j filisteobo' tu but' lu'umtajo'ob. 16Cu dzo'ocole' Abimeleque' tu ya'alaj ti' Isaac:

Tzelabáa waye' tumen dzo'oc a asab ayikaltal ti' to'on.

17Isaaque' j bin tu táax kóom lu'umilo'ob Gerar, j p'áat cajtal te'elo'. 18Ca tu ja'adzaj le ch'e'eno'ob jola'ano'ob tumen u taata ca'aliquil cuxa'ane', leti'e' j bu'ut'o'ob ca'ach tumen le j filisteob cu dzo'ocol u quíimile', le kaaba'ob dzaab ti' tumen u taatae' le ca j dzaab ti'ob. 19Jun p'éel kiine' u palitzilo'ob Isaaque' táan ca'ach u jolico'ob jun p'éel ch'e'en te j táax kóom lu'umo' ca tu nactáantajo'ob jun p'éel sayab. 20Ba'ale' le j cananeob cu canatico'ob ca'ach le j tamano'ob tu táax kóom lu'umil Geraro', ba'atelnajo'ob yéetel le j cananeob cu táan óoltico'ob u j tamano'ob ca'ach Isaac tu yo'olal cu ya'alico'ob ca'ache' le ja'o' u ti'alo'ob. Tu yo'olal lelo' Isaaque' tu dzaj u kaaba'int le ch'e'eno' Ba'atel, Tumen ba'atelnajo'ob tu yo'olal. 21Cu dzo'ocole' u palitzilo'obe' tu jolajo'ob u láak ch'e'en, tu yo'olal lelo' suunajo'ob j ba'atel, Isaaque' tu dzaj u kaaba'int le ch'e'eno' P'eclantáanbal.

22Isaaque' tu náachcuntubáa te'elo', ca tu jolaj u láak ch'e'en, tu yo'olal ma' j ba'atelnajo'ob tu ca tene' tu dzaj u kaaba'int: cóochquinajil tumen tu ya'alaj: Bejela'e', Yuumtzile' dzo'oc u cóochquintic u cúuchil tu'ux bíin in caxant in cuxtal, dzo'oc xan u ayikalcuntiquen.

23Isaaque' j luk te'elo' ca j bin Berseba.#26.23 Berseba, le t'aana' u kaaba' jun p'éel ch'e'en u káat u ya'ale' Cóochquinaj yéetel lela' Isaaque' tu yóoltaj u ya'al Kue' tu cóochquintaj in lu'umilo'ob. 24Ti' le áakabo' chíicpaj Yuumtzil ca tu ya'alaj ti':

Teen u Junab Ku Abraham a taata.

Ta wéetel yanen ma' ch'a'ic sajaquil.

Tu yo'olal Abraham in palitzile'

yaan in qui' t'antiquech, yaan xan in ya'abcuntic a ch'i'ibal.

25Isaac túune' tu beetaj jun p'éel u multuunil kultaj te'elo', ca tu ch'a'a chi'itaj u kaaba' Yuumtzil. J p'áat cajtal te j cúuchilo', u palitzilo'obe' tu jolajo'ob jun p'éel ch'e'en.

Isaac yéetel Abimeleque' tu beetajo'ob jun p'éel nup t'aan

26Jun p'éel kiine' j kuch Abimelec ti' u taalbal Gerare' u ti'al ca t'aanac yéetel Isaac. J láakinta'ab tumen Ahuzat u aj bisajbáa, yéetel Ficol u náacomil u aj ba'atelo'ob. 27Isaaque' tu ya'alaj ti'ob:

Bey te'ex ta tojol ch'iintajene'ex tumen ta p'ectajene'exo' ¿Ba'ax u biilal ca taale'ex a wilene'ex? 28Leti'obe' tu núucajo'ob ti':

Dzo'oc ilic ti' yaan Yuumtzil ta wéetele', let o'olale' dzo'oc c tucultic c a'alic teech ca a beet jun p'éel nup t'aan t éetel. Je'el bix le nup t'aana': 29teche' ma' bíin a beet to'on mix jun p'éel kaasi', tumen u jaajile' to'one' ma' c chi'ichnaccunt techi'. Ba'ale' to'one' c iliquech yéetel utzil, cu dzo'ocole' t a'alaj teech ca lukquech t icnal yéetel qui'imac óolal, bejela'a' túune' Yuumtzile' táan u qui' t'antiquech.

30Isaac tuune' tu beetaj ti'ob jun p'éel nojoch kiinbesaj, leti'ob xane' jaano'ob yéetel ukulnajo'ob. 31Tu ja'atzcabil u láak kiine' j líiko'obe' ca jalach t'aanajo'ob tu baatzilo'ob. Cu dzo'ocole' ca j luko'ob tu yicnal bey aj bisajba'obe', Isaaque' tu ya'alaj ca xi'ic utzil ti'ob.

32Láili' ti' le kiino', u palitzilo'ob Isaaque' tu taasajo'ob u péectzilil dzo'oc u kuchulo'ob tac tu ja'il le ch'e'en cu jolico'obo'. 33Isaaque' tu dzaj u kaaba'int le ch'e'eno' Seba.#26.33 Seba ich hebreo t'aane' u káat u ya'al Jalach t'aan. Tu yo'olal lelo' le caajo' cu kaaba'intic Berseba tac bejla'e'.

34Le ca tu chucaj cuarenta u ja'abilo'ob Esaue' j dzo'oc u beel yéetel Judit u x ch'upul paal Beeri j hititail. Dzo'oc xan u beel yéetel Basemat u x ch'upul paal Elón u láak j ititail. 35Le ca'a túul co'olelo'oba' tu beetajo'ob u káajtal u kuuxtalo'ob Isaac yéetel x Rebeca.

Currently Selected:

Génesis 26: MAYADC

Highlight

Copy