Génesis 23

U quíimbal Sara yéetel u mu'ucul

1X Sarae' j cuxlaj ciento veinte yéetel siete ja'abo'ob, 2j quíim Quiriat-arba, lela' u nojoch caajil Hebrón tu lu'umil Canaán. Abrahame' okolnaj tu yo'olal quíimic x Sara ca tu búuquintaj u nookil okom búuquil tu yo'olal. 3Cu dzo'ocole' jóok te tu'ux tudzquinta'an u wíinclil x Sara ca j bin u ya'al ti' u hititailo'ob le cúuchilo':

4Quex táanxel lu'umilen ichile'exe', co'one'ex teen jun p'éel mucnal u ti'al in muquic in watan.

5Le j hititaobo' tu núucajo'ob ti':

6Nojoch máac, beet utz a wu'uyico'oni'. C ti'al to'one' teche' jun túulech u aj yéeyaj Ku. Muc a watan ti' le ma'alob mucnal ca tuclique', mix máac ichilo'on bíin u ya'al teech ma'il, u ti'al lelo'.

7Abraham túune' j wa'alaje', ca j chíin poolnaj tu táan le j hititaobo'. 8Ca tu ya'alaj:

Wa jach tu jaajil a káate'ex ca in muc in watan waye', beete'ex utz a t'ane'ex tin wo'olal yéetel Efrón u paal Zohar, 9u ti'al u conic teen u áactuunil Macpela, le yaan tu jáal u lu'umilo'obo'. Tene' je'el in bo'otic ti'e' tuláacal u tojol le áactuno', beyo' je'el u páajtal in ti'alintic jun p'éel mucnal way ti' le cúuchila'.

10Tu yo'olal ti' yan ichilo'ob Efrón hititae', tu ka'am núucaj ti' Abraham u ti'al ca páatac u yu'uba'al tumen tuláacal u yéet cajnáalilo'ob, bey xan tu yo'olal tuláacal le máaxo'ob cu máano'ob tu jool le caajo':

11Ma' in taataen le xéet' lu'umo' quin síic teech, tac xan le áactun yaan te j lu'umo'. Le in wéet caajalo'oba' je'el u páajtal u jaajcuntico'ob#23.11 Jaajcuntico'ob, bejela'e' jun p'éel nup t'aane cu jaajcunta'al ti' ju'un le úuch ca'acho' cu jaajcunta'al tumen le máaxo'ob ilico'ob wa le u'uyico'obo'. teen tin síaj teech. Muc a watan te'elo'.

12Ba'ale' Abrahame' tu ca chíin pooltaj u cajnáalilo'ob le cúuchilo' 13ca tu núucaj ti' Efrón tu táan tuláacalo'ob:

U beet utz u yu'ubiquen a tzicbe'enil. Quin káat óoltic teech ca a kam le taakina', u bo'olal le lu'umo' cu dzo'ocole' quin muquic in watan te'elo'.

14Efrón túune' tu núucaj ti':

15Ma' in taataen, u'uy ba'ax quin in wa'alej; le lu'umo' u tojole' cuatro cientos sac taakino'ob. Tu yo'olal le buca'aj u tojolo' ma' t bin ba'atel, bey túuno' muc a watani'.

16Abrahame' tu éejemtaj u bo'otic le buca'aj taakin tu káataj Efrón tu táan le hititaobo', ca tu níic bo'otaj yéetel sac taakin. 17Bey túuno' u lu'um Efrón yaan ca'ach tu lu'umil Macpela, tu lakin Mamre; tuláacal ba'ax yaan ca'ach te j lu'umo', le áactun yéetel tuláacal le pakalbi che'obo' 18j máan u ti'alint Abraham. Tuláacal lela' jaajcunta'ab tumen le j hititaob yéetel tumen le máaxo'ob j máano'ob tu jool u beel le caajo'.

19Cu dzo'ocol lela' Abrahame' tu mucaj x Sara tu áactunil u lu'umil Macpela tu lakin Mamre, le cúuchila' kaj óola'an xan bey Hebrone', ti' yaan tu lu'umil Canaane'. 20Bey p'áatic ti' le lu'um yéetel le áactun yaan ca'ach te'elo', le j co'on ti' tumen le j hititaob u ti'al mucnal.

Currently Selected:

Génesis 23: MAYADC

Highlight

Copy