LUKA 6

1Kesambata limue, osimbu a kala loku pita vovapia, olondonge viaye via kalula isangu, yu va vi tukusa, loku vi lia. 2Puãi vamue va Fariseo va pula vati, Nye vu lingila eci ka ci tava oku ci linga kesambata? 3Yesu wa va kumbulula hati, Ka wa tangeli eci ca lingile Daviti eci a kala lonjala, eye lava va kala kumue laye, 4okuti wa iñila vonjo ya Suku, yu wa nyañula olombolo via tumbikiwa kuenje wa vi lia, loku vi ecavo kuava va kala laye, haivio ka vi tava okuti vi liwa, te lovitunda like? 5Kuenje eye wa popia lavo hati, Mõlomanu eye Ñala yesambata.

6Kesambata likuavo, eci a iñila vosunangonga kuenje wa longisa, mua kala omunu eka liaye liondio lia siõsia. 7Kuenje vakuavisonehua la va Fariseo vo lavulula nda o sakula kesambata okuti vo sangela eci vo pindika laco. 8Puãi eye wa kũlĩha ovisimilo viavo, oco wa popia lomunu wa kala leka lia siõsia, hati, Enju, ndo talame apa. Oco wa votoka, weya kovaso. 9Kuenje Yesu wa popia lavo hati, Ndu puli siti, Kesambata hẽ, ci tava oku linga ciwa ele, ele oku linga cĩvi, oku popela omuenyo ele, ele oku u nyõla? 10Kuenje wa pukukila vosi, yu wa popia laye hati, Olõla eka liove, kuenje wa ci linga; kuenje eka liaye lia ñuaima. 11Ovo puãi, onyeño ka va likuete, yu va livangula pokati eci va linga la Yesu.

12Koloneke viaco Yesu wa tunda, wa enda komunda oku ka likutilila, kuenje wa likutilila ku Suku uteke wosi. 13Eci kua ca wa pañinya oloñame viaye, kuenje wa nolapo ekui la vivali kuenje wa va tukula ovapostolo. 14Simono, u a luka Petulu, la Andereu manjaye, la Tiago, la Yoano, la Filipu, la Bartolomeu. 15Mateo kuenda Tomasi kuenda Tiago omõla a Alfeo, kuenda Simono wa tukuiwa Kambili, 16kuenda Yuda omõla a Tiago, la Yuda Isikariote u wa linga omakuli.

17Kuenje oku lokila kumue lavo, wa talama ketapi. Kua kala owiñi wa lua woloñame viaye, kuenda omanu va lua va tunda kuosi ko Yudea lo ko Yerusalãi kuenda konele yokalunga ko Turo lo ko Sidono, veya oku u yevelela loku sakuiwa ovovei avo. 18Lava va kuetiwe laspiritu a vĩha va sakuiwa. 19Oco owiñi wosi wa seteka oku u lamba kuenje wa sakula vosi omo kokuaye kua tunda unene.

20Kuenje, oku petuila ovaso aye kolondonge viaye, wa linga hati.

Ene vulosuke, wa sumũlũhi, momo usoma wa Suku wene.

21Ene vu kasi lonjala cilo, wa sumũlũhi, momo vu kuta. Lene vu lila cilo, wa sumũlũhi, momo vu yola.

22Eci omanu vo suvukili Mõlomanu, leci vo tundisi, loku vu sepula, leci va lavisa onduko yene loluhimo lũvi, oco wa sumũlũhi. 23Eteke va ci linga, sanjuki, somboyoki lonjolela, momo onima yene kilu yalua momo haico vaisiavo va linga lovaprofeto.

24Ene puãi alohuasi, ngongo yene, momo wa tambuli ale elembeleko liene.

25Lene wekuti cilo, ngongo yene, momo onjala yene.

Lene vu yola cilo, ngongo yene, momo vu lisiõsiõla noke loku lila.

26Lene vosi, eci omanu vosi vo sivayi, ngongo yene, momo haico vaisiavo va linga lovaprofeto vesanda.

27Ame puãi mopia lene vu yeva, siti Soli ovanyali vene. Lingi ciwa lava vo suvuki. 28Sumũlũisi ava vo siñali. Likutilili ava vo fũkilisi. 29Umue nda o ku veta onuku kolumbanjo, u pongoluila lukuavo. U o ku punda ocikutu cove, ku ko limile ombinja yove. 30Vosi va ku pinga va iha. U wa ku kukulula ovikuata viove, ku ko vi silihe vali. 31Ndeci vu yongola okuti oco omanu vo lingi ene, haico ene vu lingavo lavo.

32Nda vu sole ava vo soli esunga liene li panduiwa lelie? Omo ndaño vakuakandu va sole ava va va sole. 33Nda vu kuatisa ava vo kuatisi esunga liene li panduiwa lelie? Omo ndaño vakuakandu va kuatisavo ava va va kuatisa. 34Kuenje nda vu levalisa oko vu lavoka cimue, esunga liene li panduiwa lelie? Ndaño vakuakandu va levalisavo vakuakandu, ha va tiuwilua cavo. 35Ene puãi, soli ovanyali vene loku va linga ohenda. Levalisi, ha lokulavokako cimue, kuenje onima yene yi lua, kuenje vu linga omãla va Tõlo: momo eye ombokela vakualutakãi la vakuakandu. 36Lingi ohenda ndeci Isiene a lingainga ohenda.

37Ko ka veti veti evelo kuenje oco ka vu vetiwa evelo. Ko ka pisi kuenje oco ko pisiwi. Ecaeli kuenje weceliwi. 38Avavi, kuenje oco vo waveli. Onjongo ya sunguluka, haiyo ya kandelua, ya susuminyiwa, loku supoka, oyo va yi sukumuila vepunda liove. Momo onjongo vu yonga layo haiyo vo yongelivo.

39Wa va tela olusapo, hati, Nga omeke yi tẽla oku songuila omeke? Ka va fi he; vocitunyu, kavali kavo? 40Ondonge ka yi velipo okuti ulongisi wayo o sule, puãi wosi wa longisiwa ocili o linga ndulongisi waye. 41Nye o vanjela okacinene ka kasi viso liukuẽle puãi ku limbuka ohangalo yi kasi viso liove? 42O popia ndati lukuẽle huti, A ngandiange, linga hu fele okacinene ka kasi viso liove, osimbu ove muẽle ku lete ohangalo yi li viso liove? Okuambambe! handi upa ohangalo yi kasi viso liove oku o mola ciwa oku upa okacinene ka kasi viso liukuẽle.

43Momo la-umue uti uwa wima epako lĩvi; kuenda vali uti ũvi ka wimi epako liwa, 44momo uti luti u limbukiwila kepako liawo muẽle. Momo akuyu ka a yungiwa kolosongo pamue ayuva kasõsa. 45Omunu wa sunguluka, kukuasi uwa wutima waye upopako evi viwa, puãi omunu wa vĩha, kukuasi waye wa vĩha upopako evi via vĩha, momo eci ce yuka vutima haico omẽla u popia.

46Nye vu nukowaila hoti, A Ñala, a Ñala, osimbu ko lingi eci mopia? 47Wosi iya kokuange, kuenje, eci a yeva olondaka viange, o vi linga, ndu lekisi u a lisoka laye. 48Wa lisoka lomunu wa kala loku tunga onjo yaye. Wa fẽla eci ca longa. Wa sevetela ociseveto caye vohanda. Kuenje, eci kueya endunde, lia veta veta onjo yaco, puãi ka lia tẽlele oku yi senga momo ya tungiwila kohanda. 49Puãi u o vi yeva, kuenje ka vi lingi, wa soka lomunu wa tungila onjo yaye posi yaño, ociseveto lakamue. Eci endunde lia yi veta, haico onjo ya liwila, kuenje okuteka kuonjo yaco kua lua.

Currently Selected:

LUKA 6: EMB63

Highlight

Copy