LUKA 20

1Eteke limue, eci Yesu a kala loku longisa omanu vonembele loku kunda ondaka yiwa, oco ovitunda vinene la vakuavisonehua lakulu veya kokuaye. 2Va popia laye vati, Tu sapuileko, omoko o lingainga layo ovina evi, ye? Lu wa ku iha omoko eyi, elie? 3Oco wa va kumbulula hati, Lame ndu pulivo epulilo. Sapuiliko. 4Epapatiso lia Yoano hẽ, liokilu ale, ele liomanu? 5Va livangula pokati vati, Nda tu kumbulula tuti, Liokilu, eye o tu pula hati, Nye ka wo taveleli? 6Puãi nda tu kumbulula tuti, Liomanu, omanu vosi va tu asa ovawe, momo vosi va soka vati, Yoano uprofeto. 7Oco va kumbulula vati, Oko ya tunda ka tuiko. 8Yesu wa popia lavo hati, Lamevo siu sapuili omoko ndinga layo ovina evi.

9Oco a fetika oku tela omanu olusapo olu, hati, Omunu umue wa tuika ocumbo cayuva, noke wa ci pindikisa kolongunja, kuenje wa enda vofeka yikuavo oku tumala osimbu. 10Oco, kuvo waco, wa tuma ukuenje kolongunja viaco okuti, kapako ocumbo cayuva vo wihako amue. Puãi olongunja via tipula, kuenje vio tiuwiya ño ovoko. 11Oco wa tuma vali ukuenje ukuavo. Eye layevo vo tipulavo, loku u fũkĩlisa, kuenje vo tiuwiyavo ovoko. 12Oco wa tuma vali watatu, eye vo tota olombole loku u wimba vusenge. 13Muẽleacumbo hati, Ndinga nye? Numa omõlange wa soliwa, mbi eye va sumbila. 14Puãi, eci olongunja vio mola, via livangula pokati, viti, U, eye kapiñala. Tu wipayi oco ocipiñalo ci linge cetu. 15Kuenje vo tundisa vocumbo, yu vo wipa. Oco hẽ, muẽleacumbo o linga nye lavo? 16Iya, o nyõla olongunja viaco kuenje eca ocumbo cayuva ku vaiñi. Eci va ci yeva va linga vati, Hacoko. 17Puãi eye, oku va vanja, wa popia lavo hati, Nda hacoko, ca lomboloka ndati eci ca sonehiwa citi,

Ewe lia inasi atungi,

olio lia lingiwa utue wevindi?

18U o kupukila kewe liaco o teka teka, puãi eci li kupukila umue liu keleketa ndoneketela.

19Vakuavisonehua lovitunda vinene, kola yaco haiyo, va sanda oku u kuata, momo va limbuka okuti ovo a tela olusapo luaco, puãi va kuatela omanu usumba. 20Oco vo lavulula, kuenje va tuma olondavululi oku liluvikiya ndomanu vocili, loku u nula londaka okuti vo weca komoko yonguluvulu kuenda kokutetulula kuayo. 21Vo pula vati, Olongisi, tu ci okuti eci o popia ca sunguluka, leci o longisa, cocili. Ku kuete ocame, puãi o longisa locili onjila ya Suku. 22Oco hẽ, ca sunguluka etu oku lambuila Kaisare ale, ele ka ca sungulukile? 23Eye puãi wa limbuka atutu avo kuenje wa popia lavo, hati, 24Ndekisi ocingangu cimue colombongo. Ociluvialuvia eci hẽ, locisonehua eci, celie? Kuenje va kumbulula vati, Ca Kaisare. 25Yu wa popia lavo, hati, Oco, evi via Kaisare vi eci ku Kaisare, levi via Suku vi eci ku Suku. 26Kuenje kovaso omanu ka va tẽlele oku u kuata leci a popia. Puãi va komoha ekumbululo liaye kuenje voha.

27Vamue va Sandukeo, haivo va longisa vati, Ka kuli epinduko, veya kokuaye. 28Kuenje vo pula vati, Olongisi, Mose wa tu sila ocisonehua citi, Nda ulume o fa kuenje o sia ukãi, puãi ka kuete omõla, oco manjaye o piñala ukãi waco oku tumbuluila huvaye ombuto. 29Oco kua kala vamanji epanduvali. Ukulu waco wa kuela ukãi, kuenje oku fa ka sile omõla, 30wa vali haico. 31Lu wa tatu wo kuela, haico epanduvali liavo vosi va fa, kuenje ka va sile omõla. 32Noke ukãi wa favo. 33Oco kepinduko hẽ, o linga ukãi welie? Momo epanduvali liaco liosi lio kuelele.

34Yesu wa va kumbulula hati, Omãla vomuenyo ulo va kuela kuenda va kuelaisua. 35Puãi ava va posokela oku mola omuenyo ukuavo kuenda epinduko ku vakuavilangu, ovo ka va kuela, ndaño oku kueliwa. 36Ka va tẽla oku fa vali, momo va lisoka lovangelo haivo omãla va Suku omo omãla vepinduko. 37Puãi kondaka yepinduko lia vakuavilangu, ndaño Mose wa lekisa okuti ondaka yaco yocili, eci, vesapulo liocisapa, a tukula Yehova okuti eye Suku ya Avirahama, haeye Suku ya Isake, haeye Suku ya Yakoba. 38Suku heyeko Suku yava va fa, te yava va kasi lomuenyo, momo vosi omuenyo eye vo kuetele. 39Vamue vakuavisonehua va kumbulula vati, Olongisi, wa popia ciwa. 40Kuenje lomue wa lukuta vali oku u pula cimue.

41Eye puãi wa va pula, hati, Va popia ndati vati, Kristu omõla a Daviti? 42Momo muẽle Daviti velivulu liolosamo wa popia hati,

Ñala wa popia la Ñala yange hati,

Tumala kondio yange,

43toke hu kapela ovanyali vove

ociliatelo colomãi viove.

44Omo Daviti o tukula Kristu hati, Ñala, oco hẽ, Kristu o linga ndati omõlaye?

45Eci omanu vosi va kala loku u yevelela, eye wa popia lolondonge viaye hati, 46Lunguki la vakuavisonehua. Va sole oku ñuala ñuala loku wala uwalo wa lepa. Va sole oku lamiwa vovitanda loku tumala kolomangu via velapo volosunangonga lo kolofesta. 47Va lia lia olonjo viovimbumba, kuenje, oku pipiya, va likutilila ovilañela. Episo liavo li piãla.

Currently Selected:

LUKA 20: EMB63

Highlight

Copy