YOANO 8

1Yesu puãi wa enda komunda yo Oliveira. 2Omele ociteketeke weya vali konembele. Omanu vosi veya kokuaye, yu wa tumala, wa va longisa. 3Kuenje vakuavisonehua la va Fariseo veya kokuaye lukãi umue wa kuatiwa kupuepue, kuenje va talamisa ukãi vokati kowiñi. 4Yu va popia laye vati, Olongisi, ukãi u wa kuatiwa oku linga upuepue. 5Vovihandeleko, Mose wa tu handeleka oku sosola lovawe ava va linga ndundeti. Ove huti nye? 6Eci va ci popela oku u seteka oco va mole cimue coku u pindika laco. Yesu puãi oku petama wa soneha posi lomuine waye. 7Eci va tongeka oku u pula, eye wa petuka kuenje wa popia lavo hati, U pokati kene ka kasi lekandu a liange oku u nyuñila ewe. 8Oco wa petama vali, yu wa soneha vali posi lomuine. 9Kuenje ovo, eci va ci yeva, va tundapo umue, umue, oku fetika lakulu vaco toke vosi va puapo, kuenje Yesu wa siala lika liaye kumue lukãi. 10Oco Yesu wa petuka, yu wo pula hati, Okãi, ava va ku pindika va kasi pi? Lomue wa ku pisa? 11Eye hati, A Ñala, lomue. Yesu wa popia laye hati, Ndaño ame, si ku pisa. Kuende, ku ka linge vali ekandu.

12Yesu wa popia vali lavo hati, Ame ndicinyi coluali. U o ñuama ka endela vali vowelema, puãi o kala locinyi comuenyo. 13Oco va Fariseo va popia laye vati, O limbila uvangi ove muẽle, uvangi o limbila puãi hawociliko. 14Yesu wa va kumbulula hati, Ndaño ndi limbila uvangi ame muẽle, haimo uvangi ndi limbila wocili, momo oku nunda njiko, kuenda oku ngenda, ene puãi ka wa kũlĩhili ndaño koku nunda, pamue koku ngenda. 15Ene vu tetulula leci ci moleha liso, ame si tetuluila umue. 16Haimo, nda netulula, okutetulula kuange kuocili, momo si tetulula lika wange, puãi ame lu wa numa tu tetuluila pamuamue. 17Vovihandeleko viene mua sonehiwa okuti uvangi womanu vavali owo wocili. 18Ame ndi limbila uvangi, kuenda Isia wa numa o njimbilavo uvangi. 19Oco vo pula, vati, So o kasi pi? Yesu wa kumbulula hati, Ka wa ñulĩhili ame, ndaño Tate ka wo kũlĩhili. Nda wa ñulĩhili ame, nda wa kũlĩhivo Tate. 20Olondaka evi wa vi popela vohondo yoku seleka olombongo eci a longisa vonembele, puãi lomue wo kuata, omo ola yaye ka yeyile handi.

21Oco wa popia vali lavo hati, Ame ngenda, kuenje vu sanda, puãi vu fa lakandu ene. Oko ngenda ko tẽla oku pitilako. 22Oco va Yudea va pula vati, O lipa eye muele, omo a popia hati, Oko ngenda ko tẽla oku pitilako? 23Kuenje eye wa popia lavo hati, Ene wakuaposi, ame ndukuakilu. Ene wakualuali lulo, ame siukualuali luloko. 24Ndo sapuili ale siti, Vu fa lakandu ene, momo vu fa muẽle lakandu ene nda ko ci kolela okuti ame ame muẽle. 25Oco vo pula vati, Ove elie? Yesu wa va kumbulula hati, Ame muẽle una ndo sapuili tunde kefetikilo. 26Ndu kueteli ovina via lua vioku vangula loku tetulula, puãi u wa numa wocili, oco sapula koluali eci nda yeva kokuaye. 27Ka va limbukile okuti wa va tukuila Isia. 28Oco Yesu wa popia lavo hati, Eci vu tulika Mõlomanu oco vu limbuka okuti ame, ame muẽle, kuenda okuti si lingi cimue locipango cange, puãi mopia ovina evi ndomo Isia a ndongisa. 29Kuenje u wa numa o kasi lame, ka sile lika liange, momo ndingainga ño-o ovina viu sanjuisa. 30Eci a popia ovina evi va lua vo kolela.

31Oco Yesu wa popia la va Yudea vo kolela, hati, Nda vu pandikisa oku pokola kolondaka viange, vulondonge viange ocili, 32kuenje vu kũlĩha ocili, kuenda ocili cu yovola. 33Vo kumbulula vati, Tumbuto ya Avirahama, kuenje ka tua la linga apika vomunu. O popia ndati huti, Vu yovoka?

34Yesu wa va kumbulula hati, Ocili, ocili, mopia lene siti, Wosi o linga ekandu eye upika wekandu. 35Upika ka kala hũ vonjo, te omõla eye o kala ño-o hũ vonjo. 36Oco nda Mõla u yovola vu yovoka cocili. 37Ndi ci okuti vumbuto ya Avirahama, haimo vu sanda oku njipa, momo ondaka yange ka yi sui vitima viene. 38Ame mopia ovina nda muila ku Tate, lene vu linga ovina wa yevi ku isiene.

39Vo kumbulula vati, Isietu Avirahama. Yesu wa popia lavo hati, Nda wa kaili omãla va Avirahama nda vu lingainga ovilinga via avirahama. 40Cilo puãi vu sanda oku njipa, ame ndimunu nda popia lene ocili nda yeva ku Suku. Hacoko ca lingile Avirahama. 41Ene vu linga ovilinga via isiene. Va popia laye vati, Hatumãla voku lumbulako. Tu kuete Isietu umuamue, Suku. 42Yesu wa popia lavo hati, Nda Suku wa kaile Isiene, nda ame wa soli, momo nda tunda ku Suku. Sieyile locipango cange, puãi eye wa numa. 43Eci ñasi loku popia, nye ka cu lombolokeli? Momo ka vu tẽla oku yeva ondaka yange. 44Wa tundi ku isiene eliapu, oco vu yonguila oku linga ocipango ca isiene. Eye omondi tunde kefetikilo, haeye ka la sumbila ocili momo vokati kaye ka muli ale ocili. Eci a popia uhembi o popia caye muẽle, momo eye ohembi, haeye isia yuhembi. 45Puãi omo mopia ocili ene ka vu ñolela. 46Pokati kene helie o misila ekandu? Nda mopia ocili, nye ko ñoleleli? 47U o tiamela ku Suku eye o yeva yeva olondaka via Suku. Ene ka vu vi yeva yeva omo ka vu tiamela ku Suku.

48Va Yudea vo kumbulula vati, Ka tua popele ocili eci tua popia tuti, Ove vu Samária, haive o kuetiwe locilulu? 49Yesu wa kumbulula hati, Si kuetiwe locilũlu, puãi sumbila Tate, ene puãi ame ka vu sumbila. 50Haimo lumue, si lisandela ulamba. Kuli ale U o kasi loku u sandela, kuenje eye o linga onganji. 51Ndu sapuili siti, Ocili, ocili, omunu nda o pandikisa loku pokola kondaka yange, ka moli okufa. 52Va Yudea va popia laye vati, Kaliye tua limbuka okuti o kuetiwe locilũlu. Avirahama wa fa, kuenda ovaprofeto, haimo o popia huti, Omunu nda o pokola kondaka yange ka moli okufa. 53Ove nga wa velapo okuti isietu Avirahama wa fa o sule? Ovaprofeto lavovo va fa! Ove nga wa sima okuti ove elie? 54Yesu wa kumbulula hati, Nda ndi limuisa ame muẽle ulamba, ulamba waco holambako. Tate, una vu tukula hoti, Eye Suku yetu, eye o muisa ulamba. 55Puãi ka wo kũlĩhili, ame Puãi ndo kũlĩha. Nda nda popia siti, Sio kũlĩhile nda ndihembi ndene. Puãi ndo kũlĩha, kuenje mokola kondaka yaye. 56Kukululu yene Avirahama wa yolela omo a lavoka oku mola eteke liange. Wa li mola, kuenje wa li sanjukila. 57Oco va Yudea va Popia laye vati, Kua tẽlele handi akui atãlo kanyamo. Wa mola ndati Avirahama? 58Yesu wa popia lavo hati, Ndu sapuili siti, Ocili, ocili, osimbu Avirahama ka citiwile, ame, ame u. 59Oco va nyañula ovawe oku u sosola, Yesu puãi wa salama kuenje wa tunda vonembele.

Currently Selected:

YOANO 8: EMB63

Highlight

Copy