EFETIKILO 14

1Koloneke via Amirafele, osoma ya Sinare, la Arioke, osoma ya Elasare, la Ketolomeri, osoma ya Elami, kuenda Tidale, osoma yolofeka, 2olosoma viaco via liyaka la Bera, osoma ya Sodoma, la Birisia, osoma ya Gomora, la Sinava, osoma ya Adema, la Semevere, osoma ya Sevomi, kuenda osoma ya Bela ndokuti Soyara. 3Avandeti vosi va likongela kocimbota ca Sidimi, ndokuti kociva comongua. 4Ekui lianyamo kanyamo avali va vumba Ketolomeri, unyamo wekui latatu oco va linga usuanji. 5Kunyamo wekui lakuãla Ketolomeri weya lolosoma via litokeka laye; wa kundula va Kefayi vo Asitatore-Karinayimi, la va Susimi vo Hama lava Yemi ketapi lia Kiritami, 6la va Hori komunda yavo ko Seire toke ketumba lia Parane li kasi kekalasoko. 7Oco va tiukila ko Simbata ndokuti Kadesi; va kundula ofeka yosi ya va Amaleke kuenda va Amori, vana va tunga ko Hacecone-tamare. 8Kuenje kueya osoma ya Sodoma, losoma ya Gomora, losoma ya Adema, losoma ya Sevomi kuenda osoma ya Bela, ndokuti Soyara, oku liyaka lavo vocimbota ca Sidimi, 9okuti oku liyaka la Ketolomeri, osoma ya Elami, la Tidale, osoma yolofeka, la Amirafele, osoma ya Sinare, kuenda Arioke, osoma ya Elasare, okuti olosoma vikuãla vi yaka lolosoma vitãlo. 10Kocimbota ca Sidimi kua kala oviva via lua viekokoto, kuenje osimbu osoma ya Sodoma losoma ya Gomora va tila, vamue va kupukilamo; ava va sialapo va tilila kolomunda. 11Oco va punda ovikuata viosi via va Sodoma la va Gomora, lovilia viavo viosi va enda lavio. 12La Lote, ocimumba ca Avirama, u wa tungile ko Sodoma, vo kuatavo lovikuata viaye, kuenje va enda.

13Umue wa puluka, weya wa ci sapula ku Avirama u Heveru, eci a tumãla ketumba lia Mamire u Amori, manja a Esikole keunda a Anere, momo vakuacisoko la Avirama. 14Eye Avirama wa yeva okuti ocimumba caye ca kuatiwa yu wa tunda lovita vitatu kekui lecelãla viakuenje vakuepata liaye haivo va pakisiwa, kuenje wa va landula toke ko Dani. 15Oko, pokati kuteke, wa tepisila olohoka viakuenje vaye, kuenje wa va lupuisa, wa va yoluisa toke ko Hoka, ko Norte ya Damasko. 16Oco ovikuata viosi wa tiuka lavio kuenda Lote ocimumba caye wa tiukavo laye, lovikuata viaye, lakãi, lomanu.

17Eci Avirama a tiuka koku kundula Ketolomeri lolosoma via kala laye, oco osoma ya Sodoma yeya oku ñualehela laye vocimbota ca Siawe, ndokuti ocimbota cosoma. 18Kuenda Melikicedeke, osoma ya Saleme, ya nena ombolo lovinyu; eye ocitunda ca Suku Fũ. 19Yu wo sumũluisa hati, Avirama a sumũluisue la Suku Fũ,

Usovoli wilu losi;

20Suku Fũ a sivayiwe

momo wa eca anyali vove peka liove.

Kuenje Avirama wa wiha onepa yekui yovina viosi. 21Soma ya Sodoma wa popia la Avirama, hati, Va nyihe lika omanu; ovikuata kala lavio ove muẽle. 22Avirama wa kumbulula Soma va Sodoma hati, Nda lisila la Yehova Suku Fũ, Usovoli wilu losi, 23siti, Si tambula cimue cove, ndaño elinya limosi, ndaño olunjita, sanga ove o linga huti, Avirama ame ndo muisa ukuasi. 24Si tambula cimue te eci ca lia akuenje vange, Anere la Esikole la Mamire; puãi vana vaile lame, ovo va tambule olonepa viavo.

Currently Selected:

EFETIKILO 14: EMB63

Highlight

Copy