OVILINGA 1

1A Teofilo, velivulu liatete nda lombolola ovina viosi Yesu a fetika oku linga loku longisa, 2toke keteke a tambuiwa kilu. Osimbu ka tambuiwile kilu, oku popia ondaka Espiritu o wiha, wosika ovapostolo vaye vana a nola. 3Kovaso yotokua yaye wa limolehisa kokuavo lomuenyo akui akuãla koloneke. Wa limolehisa okuti ka tatãliwa kuenje wa popia lavo ovina viusoma wa Suku. 4Eci a kala loku lia kumue lavo oco wa vosika hati, Ko ka tundi ko Yerusalãi, puãi talameli ohuminyo ya Isia yina wa yevi kokuange. 5Momo Yoano wa papataisa lovava, puãi ene, kovaso yoloneke vimue ño, vu papatisiwa le Espiritu Sandu.

6Oco, eci va liongolola vo pula vati, A Ñala, cilo he, o tumbulula usoma wa Isareli ale? 7Yu wa popia lavo hati, Haceneko oku kũlĩha oloneke, pamue ovovo, Tate a tukula locipango caye. 8Puãi, eci Espiritu Sandu o wili, oco vu kuata unene, kuenje vu linga olombangi viange vo Yerusalãi, lo vo Yudea yosi, lo vo Samária, kuenda toke kasulilo okilu lieve. 9Eci a popia ovina evi, osimbu va kala loku vanja, oco wa yeluiwa, kuenje elende lio tikuila kovaso avo. 10Osimbu va kala loku tulukila kilu eci a enda, alume vavali vava, va wala uwalo u yela. 11Va linga vati, Alume va Galilea, nye vu tãilili oku vanja vilu? Yesu u wopiwa pokati kene, yu wa yeluiwa kilu, ndeci wo moli oku enda kilu, haico eya vali.

12Oku tunda komunda ya tukuiwa yo Oliveira, haiyo yi kasi ocipepi la Yerusalãi, ca soka ndetulo liesambata, oco va tiukila ko Yerusalãi. 13Eci va iñilamo va londa kosapalalo oko va singa. Ava va kalamo vava, Petulu la Yoano la Tiago la Andereu, Filipu la Tomasi, Bartolomeu la Mateo, Tiago omõla a Alfeo, la Simono Kambili, kuenda Yuda omõla a Tiago. 14Ava vosi va likapela oku pandakaisa lolohutililo, kumue lakãi, kuenda Maria ina ya Yesu, la vamanjaye.

15Owiñi waco wa tẽla ocita kakui avali komanu. Koloneke viaco Petulu wa votoka pokati koloñame, kuenje wa linga hati, 16Ene a vamanji, ocisonehua cina condaka ya popia ale Espiritu Sandu lomẽla wa Daviti, haiyo ya tukula Yuda una wa songuila ava va kuata Yesu, ka ci tava okuti ka ci lingiwa. 17Momo eye wa tendiwile kumue letu kuenje wa kaile lonepa yaye yupange u. 18Ulume waco wa landele usenge lolombongo a tambuila ekandu liaye, noke etimba liaye lia lenda toke imo lia toka pokati, kuenje ovãla aye a puluka. 19Eci ca yevala komanu vosi va tunga vo Yerusalãi, kuenje va tukula usenge waco kelimi liavo vati, Akeldama, ca lomboloka Usengewosonde. 20Momo velivulu liolosamo mua sonehiwa hati,

Ocilombo caye ci linge epile.

Lomue ka ka tungemo.

Mua sonehiwavo hati,

Umue wiñi a tambule omangu yaye.

21Oco, ca sesamela okuti, umue kalume va kala kala kumue letu osimbu yosi Ñala Yesu a kala loku ñuala ñuala pokati ketu, 22oku fetikila kepapatiso lia Yoano toke keteke opiwa pokati ketu, oco ca sesamela umue wavo oku kala letu ha imbi uvangi wepinduko liaye. 23Yu va tukula vavali, Yosefe wa tukuiwa Barsamba, onduko yaye yikuavo Justo, kuenda Matiya. 24Kuenje, oku likutilila va linga vati, A Ñala, ove wa kũlĩha ovitima viomanu vosi, pomanu ava vavali, tu lekise u wa nolapo 25oku piñala komangu yupange u, haiwo wupostolo, una Yuda a tokoka ha endi koliavo. 26Kuenje va va sekula, yu ca veta Matiya. Oco eye wa tendiwa kumue lekui liovapostolo kupostolo.

Currently Selected:

OVILINGA 1: EMB63

Highlight

Copy