Etatelu 8

1Unyashungu akuho Noa, nyama tshe, la dungalunga tshe diaki kame la ndi lu watu a luudu. Okone Unyashungu akapepia lopepe la kete, ku ashi wakakitakita. 2Teko diʼohongo la adidishi wa lʼulungu wakadihama, ndu mvula kaki lu ndo uma lʼulungu kakahimbo. 3Ashi wakatatela mumo la nyongomela yema yema lu kete. Ku lʼokongo a nshi lukama la akumi atanu, ashi wakakitakita. 4Okone lu lushi la dikumi lʼesambeli la ngondo kʼesambeli, watu wakayemala lʼatei wʼekungu wʼArarata. 5Ashi wakatakolamelaka nkitakita edja ndu lu ngondo ka dikumi. Ku lu lushi la ntundu la ngondo kako, ete wʼekungu wakenama.

6Lamʼaketi nshi akumi anei, Noa akadihula didishi diakandatshiki lu watu a luudu wakandatshi. 7Ku ndi akatumi dingwangwa. Dio diakatafumbofumboka lu leke la leke edja ndu lamʼakumi ashi la kete. 8Ku ndi akayutuma ndu enga dia ntenda kana ashi wambuma ladiku dia kete. 9Enga kako kuntana hyuli ya nkitsha ekulu, ne dia ashi waki ladiku dia kete tshe. Okone to kakakalula le Noa lu watu. Ku ndi akasimbula lunya, akakiose, akakiotshiya lasuki la ndi lu watu. 10Ndi akakungi nshi esambeli ntu, ku ndi ndjutuma enga etena ka hendi lʼandja a watu. 11Enga kakakalula le ndi la dikolo. Ku to kakayi la dikatshi diakahahwama uma lʼutamba a mbeli lʼolomo ato. Diako mbakeyi Noa ati: Ashi wambuma la kete. 12Okone ndi akamuyukunga nshi esambeli kina, ku ndi ndjutuma enga etena ka satu. Keli etena kako to kunkalula le ndi ntu.

13Okone lushi la ntundu la ngondo ka ntundu ka lu eleku ka kama shamalu la otoi, ashi wakumi uma la kete. Noa akakumbula ote a watu a luudu. Ku ndi akenyi ati: Kete yambuma. 14Lushi la akumi ahendi lʼesambeli la ngondo ka hendi, kete yakumi tu. 15Unyashungu akatela Noa ati: 16Nyutumbi uma lu watu, we, wadeye, la anʼaye wʼapami, ndu wadi wa anʼaye. 17Utundja ndu nyama tshe yeli la lumu: fudu, dungalunga, ndu diango tshe diayakutula la kete. Kawutani, kawufulaneli, kawukukaneli la kete tshe. 18Ku Noa akatumbi uma lu watu, ndi la anʼandi wʼapami, la wadendi, la wadi wa anʼandi. 19Ndu nyama tshe, diango tshe diayakutula, fudu tshe, ndu diango diatokendakendaka la kete, diakatumbi uku wehu adio.

20Noa akatshela Latuyalaka ediakelu. Ku ndi akose nyama motshi uma lʼatei a nyama tshe yeli ololo nde, ndu fudu motshi lʼatei a fudu tshe yeli ololo nde, akayilambula lʼediakelu. 21Lamʼakuki Latuyalaka upumu wʼololo wʼulambu, ndiakati lʼutema andi ati: Dimi handjudja kete mananu ntu dikambu dia kolo kʼuntu. Mete, tukanyi tʼutema wʼuntu mbatuyalaka kolo umaka nshi yandi ya dikenda. Dimi handjulanya diango tshe dieli la lumu ntu uku akamatshi. 22Lamʼayutshikalaka kete, akambu ane hawushilaki pundju: diunelu la dinela, tshitshi la luhaladi, owo la diye, ndu yanyi la utshu.

Currently Selected:

Etatelu 8: TLL

Highlight

Copy