Etumbelu 9

Sui le Dungalunga

1Ku Latuyalaka akatela Mose ati: Utshu le Farayo. Utuwuteli wati: Latuyalaka, Unyashungu wʼasi Heberu, kata ati: Ukimo wudja ami, watshu dia ntontemola. 2Ne dia naka we ayutuna mbakimo dia vo ntsho, ayakimela, 3ulungi, lunya la Latuyalaka layuyala ladiku dia dungalunga diaye dieli lʼusui.: falasa, punda, kamelo, ngombe la ekoko. Lonyoi la mamba layuyala le dio. 4Keli Latuyalaka ayutshikitanya dungalunga diʼasi Isariyele la dungalunga diʼasi Edjibitu. Nduku elungalunga otoi kayuvo uma lʼatei wa dungalunga diʼasi Isariyele. 5Latuyalaka akashikike etena; akati ati: Lui, Latuyalaka ayutsha dikambu so lu kete nye. 6Ku la wedi a pindju, Latuyalaka akatshi dikambu diako. Dungalunga tshe diʼasi Edjibitu diakavu, keli nduku nyama otoi kakavu lʼatei a dungalunga diʼasi Isariyele. 7Farayo akatumi dikendji, enda, ndi kuntana nduku nyama kakavwi lʼatei a dungalunga diʼasi Isariyele. Keli utema wa Farayo akakikitala. Ndi kumbetawo nkimo wudja one dia vo ntsho.

Sui dia Atshutshu

8Latuyalaka akatela Mose la Arona ati: Nyuludia anya anyu la utuku wʼuma lʼatsbuka. Mose afumbuli utuku ako utsha lʼulungu la ntundu ka Farayo. 9Vo wayudiangana lu lopepe, wayukumba kete tshe ya Edjibitu. Ku vo wayutunga atshutshu lu alimba wʼantu ndu wa nyama lu kete ya Edjibitu tshe. Atshutshu ako wayuyala puta lamʼayuwutundo. 10Ku vo wakose utuku wʼuma lʼatshuka, wakatemala la ntundu ka Farayo. Mose akufumbula utsha lʼulungu, ku vo wakayala atshutshu lu alimba wʼantu ndu wa nyama. Atshutshu ako wakayala puta lamʼakawatundo.#9:10 Eny. 16:2. 11Akanga wʼaloho kumbeya memala la ntundu ka Mose, ne dia atshutshu waki le akanga wʼaloho ndu le asi Edjibitu tshe. 12Keli Latuyalaka akakikitsha utema a Farayo, ku ndi kumbaukela, uku akatela Latuyalaka Mose.

Sui dia Ngimbi ka Mboko

13Ku Latuyalaka akatela Mose ati: Keto kʼolomo la pindju, kutemali la ntundu ka Farayo. Kuwuteli wati: Latuyalaka, Unyashungu wʼasi Heberu, kata ati: Ukimo wudja ami, watshu dia ntontemola. 14Etena kene kayumutuma asui ami tshe lʼutema aye, lʼekambi aye, ndu le wudja aye; dia we mbeya wati: Nduku ledimi la mi la kete tshe. 15Utunduyala dimi lakasimbula lunya lami dia nkudiaka, we la wudja aye la lonyoi, tshiki we akashisho uma la kete. 16Keli dimi lakakutshiki la lumu dia nkenya wulu ami, la dia lukumbu lami nyangana lu kete tshe.#9:16 Rom. 9:17. 17Ku we ntetemalaka ndjambiya dia nsuya wudja ami, we hetawo mbakimo dia vo ntsho. 18Ulungi, lu etena uku kene lui, dimi layolosha ngimbi ka wulu ka mboko, wuhu wahatalokaka nduku lushi lʼEdjibitu edja ndu kakiane. 19Okone usamanya kakiane, utumi antu dia ntosa dungalunga la diango diaye tshe lʼusui. Naka antu kana nyama hawuyi esadi, wayutanema lʼusui lamʼayolo ngimbi ka mboko, vo wayuvo. 20Ku uma lʼatei wʼekambi wa Farayo, wane wakukaka diui dia Latuyalaka woma, wakotshiya ekambi awo la dungalunga diawo lu mvudu. 21Keli waku waki kumbetawo diui dia Latuyalaka, wakatshiki ekambi awo la dungalunga diawo lʼusui.

22Ku Latuyalaka akatela Mose ati: Edia lunya laye utsha lʼulungu dia ngimbi ka mboko ndwela antu, nyama la tumbatumba tshe dia lʼusui lu kete ya Edjibitu. 23Ku Mose akedia danga diandi utsha lʼulungu, ku Latuyalaka akatumi akhungula la ngimbi ka mboko, ndu angadimu wa ndjadi wakakukanela la kete. Osoku mbakalosha Latuyalaka ngimbi ka mboko lu kete ya Edjibitu. 24Angadimu wa ndjadi wakasohana kame la ngimbi ka mboko.#9:24 Eny. 8:7; 16:21. Okone ngimbi kakatekoya wulu wuhu wahatalokaka lu kete ya Edjibitu tshe umaka etatelu kakawayala wudja. 25Ngimbi ka mboko akakomola diango tshe dia lʼusui, antu ndu nyama lu kete ya Edjibitu. To kakakomola tumbatumba tshe, ndu kakokola etamba tshe wa lʼusui. 26Tshikima lu kete ya Ngoshena, lene akadjashi asi Isariyele, kakito kondo.

27Ku Farayo akatumi dikendji dia nteta Mose la Arona. Ndi akawatela ati: Dimi lakatshi kolo etena kene. Latuyalaka keli kanga ololo, dimi la wudja ami mbeli akanga wa kolo. 28Olombe Latuyalaka, ne dia akhungula a wulu ane la ngimbi ka mboko wambukuka. Dimi lambetawo nyu ntsho, nyu hanyutshikala ntu. 29Ku Mose akûkaluya diui ati: Lamʼayumutuma uma lʼusumba one, dimi layedia anya ami utsha le Latuyalaka, ku akhungula wayushila, la ngimbi ka mboko kayuhimbo; dia we mbeya wati: Latuyalaka kukanga kete tshe. 30Keli dimi mbeyaka nti: Uku le ye, we la ekambi aye, nyatuki Latuyalaka, Unyashungu, woma. 31Akungi la asami wakalana, ne dia asami wakombola washa, la akungi waki la alembo. 32Keli epunga la waanya kunana, ne dia vo kumbula esadi. 33Okone Mose akamo laka Farayo. Lamʼakandatumbi uma lʼusumba, ndi akedia anya andi utsha le Latuyalaka. Ku akhungula la mvula ndu mboko wakashili; mvula kondo ntu la kete. 34Keli lamʼakenyi Farayo ati: Mvula, mboko la akhungula wambushila, ndi akatetemala ntsha kolo. Ndi akakikitsha utema andi, ndi la ekambi andi. 35Utema wa Farayo akakikitala; ndi kunkimo asi Isariyele dia vo ntsho, uku akati Latuyalaka uma lʼunyo wa Mose.

Currently Selected:

Etumbelu 9: TLL

Highlight

Copy