Etumbelu 7
7
1Latuyalaka akatela Mose ati: Enda, lambukete uku Unyashungu le Farayo. Ku onanyo Arona ayuyala umvutshi aye. 2We ayutaka aui tshe wayumukutelaka, ku onanyo Arona ayoteketaka le Farayo, dia ndi nkimo asi Isariyele, dia vo ntumba uma lu kete yandi. 3Keli dimi layukikitsha utema a Farayo, ndu layufudia tulimbitelu tami la akambu ami wa mamba lu kete ya Edjibitu.#7:3 Etsh. 7:36. 4Farayo hunyukela, ku dimi layusimbula lunya lami ladiku dia Edjibitu, layutundja elui ami wʼantu, wudja ami ana wa Isariyele, uma lu kete ya Edjibitu la dumbwelu dia waki. 5Ku asi Edjibitu wayeya vati: Dimi keli Latuyalaka, lamʼayumusimbula lunya lami ndu lamʼayumutundja asi Isariyele uma lʼatei awo. 6Mose la Arona wakatshi osoku. Vo wakatshi uku akawatela Latuyalaka. 7Mose aki la deku akumi enanei, ku Arona akumi enanei la satu lamʼakawateketaka la Farayo.
Danga dia Arona
8Latuyalaka akatela Mose la Arona ati: 9Lamʼayunyutela Farayo ati: Nyutshi dikambu dimotshi dia mamba, we kuteli Arona wati: Ose danga diaye, udikadja la ntundu ka Farayo; ku dio diayuyala ului. 10Ku Mose la Arona wakatshu le Farayo, wakatutsha uku akawatela Latuyalaka. Arona akakadja danga diandi la ntundu ka Farayo la ekambi andi, ku dio diakakadimo ului. 11Farayo aketi akanga a yimba la akanga wʼaloho wa lʼEdjibitu, ku ndu vo wakayutsha aloho awo pupu. 12Vo tshe untu lʼuntu akakandja danga diandi, ku vo wakakadimo elui. Keli danga dia Arona diakamene alanga awo. 13Ku utema wa Farayo akakikitala. Ndi kumbukela Mose la Arona, uku akati Latuyalaka.
Sui dia Dikila
14Ku Latuyalaka akatela Mose ati: Utema a Farayo ambukikitala. Ndi ambutuna dia nkimo wudja one dia vo ntsho. 15Kumutsho le Farayo la pindju lamʼayundutumba utsha la lushi. Kutukungi lʼumamu wʼokedi. Kukimeli danga diatukadimoka ului lu lunya laye. 16Kutuwuteli wati: Latuyalaka, Unyashungu wʼasi Heberu, kuntumi le ye, dia nkutela ati: Ukimo wudja ami watshu, dia ntontemola lʼusui wa shenga. Ku enda, edja ndu kakiane we atambukela. 17Latuyalaka kata ati: Lu dikambu ne, mbayuyunimbitela wati: Dimi keli Latuyalaka. Enda, dimi lutsha nkomola danga diukimedimi lu lunya lami lu ashi wa Nile, ku ashi wayukadimo dikila.#7:17 Eny. 16:4. 18Nsi yatuyalaka lu Nile yayuvo, la ashi wa Nile wayuyala sulu. Asi Edjibitu wayuka wononyi dia no ashi ako. 19Latuyalaka akatela Mose ati: Uteli Arona wati: Osa danga diaye, usimbuli lunya laye ladiku diʼashi wʼasi Edjibitu: ekedi awo, tokoko tawo, eduwa awo, ndu nyanda yawo yʼashi, dia vo nkadimo dikila. Ku dikila diayuyala lu kete ya Edjibitu tshe: lu ehundi ndu lu mbaka.
20Mose la Arona wakatshi uku akawatela Latuyalaka. Arona akedia danga, akadikomola lu ashi wa Nile la ntundu ka Farayo la ekambi andi. Ku ashi tshe wa lu Nile wakakadimo dikila. 21Okone nsi ya lu Nile yakavu. Nile akayala sulu, ku asi Edjibitu kumbeya no ashi wa lu Nile ntu. Dikila diakayala lu kete tshe ya Edjibitu. 22Keli akanga wʼaloho wa lʼEdjibitu wakatshi aloho awo pupu, ku utema wa Farayo wakakikitala. Ndi kumbaukela, uku akati Latuyalaka. 23Farayo akasikiso, akatshu utsha lu luudu landi. Ndi kumbidja tukanyi tandi lu dikambu diako nduku yema. 24Asi Edjibitu tshe wakatshimi afuku lʼumamu a Nile dia ntana ashi wa no, ne dia vo kumbeya no ashi wa Nile.
Sui dia Ekole
25Nshi esambeli yaketi uma lamʼakakomola Latuyalaka ashi wa Nile.
Currently Selected:
Etumbelu 7: TLL
Highlight
Share
Copy
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
