Etumbelu 5

Mose la Arona la Ntundu ka Farayo

1Lʼokongo diku, Mose la Arona wakatshu le Farayo, wakatuwutela vati: Latuyalaka, Unyashungu wa Isariyele, kata ati: Ukimo wudja ami watshu, keli watuyali la lushi la wuki lʼusui wa shenga dikambu diami. 2Ku Farayo akawambula ati: Akona eli Latuyalaka, ukukimi nkitanyia diui diandi la nkimo asi Isariyele dia vo ntsho? Dimi haleyi Latuyalaka, dikambu dikina, halukimo asi Isariyele dia vo ntsho. 3Ku vo wakûkaluya diui vati: Unyashungu wʼasi Heberu akasangana la su. Shu tambukosengasenga shati: Utukimo tutshu lokendo la nshi shatu lʼusui wa shenga, tutulambuli Latuyalaka, Unyashungu asu, elambu, ne dia ndi atukutudiaka la elandu kana la yombo. 4Keli khumʼekanga ka Edjibitu akawambula ati: Mose la Arona, okoko wana walanganyu minya antu ane uma lʼelimu awo? Nyukaluli lʼelimu anyu. 5Farayo akati ati: Enda, wudja one waya efula kakiane lu kete, ku nyu nyambuwasha mumuya lʼelimu awo. 6Lushi lako, Farayo akadjangela ewandji wʼulimu wa wudja la asikawo waki tupita ati: 7Tanyushaki wudja nengese dia vo ntsha atafadi, uku nshi ya ntundu. Nyuwaete watshoki dia ntuyayangelaka nengese. 8Keli nyutetemali mbalomba efula kʼatafadi uku akawabulaka nshi ya ntundu, tanyukitshakitshaki nduku yema, ne dia vo mbidjaseka udjasedjase. Diako mbalelawo vati: Tutshu, tutulambuli Unyashungu asu elambu. 9Nyahanyiya apami ane elimu dia vo nkambaka, watukudja tukanyi tawo lu aui wa kashi aso.

10Ku ewandji wʼulimu la tupita ta wudja wakatumbi, wakayutela wudja vati: Farayo kata ati: Handjuwasha nengese ntu. 11Nyutshoki nyame, nyutuyayangelaki nengese lene ukukinyu yitana, keli ulimu anyu hawukitakita nduku yema. 12Ku wudja uku wakadiangana lu kete tshe ya Edjibitu la ntuhikula atshina wa nengese lu dihuli dia nengese. 13Ewandji wʼelimu wakahinyiaka vati: Nyukutsha ulimu anyu, ulimu anyu wa la lushi la lushi, uku akanyakutshaka lamʼakinyu la nengese. 14Ewandji wʼelimu wa Farayo wakakomola ndu asi Isariyele wakawadji tupita; wakawambula vati: Okoko wana wakinyu kunkutsha efula kʼatafadi wa lui ndu wʼelo, uku akanyakutshaka la ntundu?

15Tupita tʼasi Isariyele wakayi, wakayulelela Farayo vati: Ukundi ambuyutshela ekambi aye okone? 16Hawuyukimo nengese le ekambi aye. Keli vo ntotelaka vati: Nyubuli atafadi! Ulungi, vo ntokomolaka ndu shu ekambi aye! Keli munga keko le antu aye vame. 17Keli ndi akakaluya diui ati: Nyu nyeko lu mbidjase udjasedjase! Nyu nyeko lu mbidjase udjasedjase! Diako mbatanyu nyati: Tutshu, tutulambuli Latuyalaka elambu. 18Nyutshu kakiane, nyutukambi ulimu. Nduku lolengese layukimwama le nyu, keli dieli la nyu dia nkutsha efula kʼatafadi pupu. 19Tupita tʼasi Isariyele wakenyi vati: Wambuyala lu shoko, lamʼakawati vati: Tanyukitshakitshaki efula kʼatafadi anyu wa la lushi la lushi nduku yema. 20Lamʼakawamo uma la le Farayo, vo wakatani Mose la Arona wakunga lu mbuka. 21Vo wakatela Mose la Arona vati: Latuyalaka anyendi, asambuli dikambu ne! ne dia nyu nyambutete atunyi lu ashu wa Farayo ndu wa ekambi andi; nyambakimiya tombo dia vo ntudiaka.

Daka dia Unyashungu le Mose la Arona

22Mose akakalula le Latuyalaka, akati ati: Khumemi li, ukundi ambuyutshela wudja one kolo okone? Dikambu kuna diakayatumi? 23Uma lamʼakamatshu le Farayo dia nteketa la ndi lu lukumbu laye, ndi ambutshela wudja one kolo, keli we kuntshungula wudja aye nduku yema.

Currently Selected:

Etumbelu 5: TLL

Highlight

Copy