Marko 3
3
Munhu wa nkono gumile upijiwa ha Sabato
(Mt. 12.9-14; Lk. 6.6-11)
1Huna wingila hangi ngʼwibilingilo; na walali mo munhu ali na nkono gumile.
2Nabo bunola ulu alampije ha Sabato, babonele ho mhayo gwa kumula.
3Nanghwe ungʼwila munhu ali na nkono gumile giki, Imilaga hagati.
4Na ubawila giki, Igelile kwita ya wiza ha Sabato, nulu kwita ya bubi? kupija munhu nulu kubulaga? Aliyo boi buhumula.
5Nanghwe ubilalangija na bupelanu, apinihalile kulwa buganghanazu wa ngholo jabo, huna ungʼwila munhu uyo giki, Tamaga nkono gwako. Ugutama, na nkono gwakwe gubiza mpanga giti u gungi.
6Aho Bafarisayo bufuma, haho na haho bulomana na Baherode gitumo bakunyagaja.
Basatu bingi bupijiwa
(Mt. 12.15-21; Lk. 6.17-19)
7Aliyo Yesu winga ko uja hamo na bahemba bakwe ku nyanza, na buhi butale bunondela kufuma mu Galilaya, na mu Buyudaya,
8Na mu Yerusalemi, na mu Idumaya, na kufuma ku nkilo gwa Yordani, na kufuma mapande ga Turo na Sidoni, buhi butale; aho bali bigwa mihayo mitale iyo akwitaga, biza kuli Wei.
9Ubawila bahemba bakwe giki, lyato linindile kulwa nguno ya ibita, litizunshiteleja.
10Iki wali ubapija bingi; kushisha nose abo abali bali na mabulwile bungʼwibupa, bukoba kunkuumya.
11Na mioyo misoso aho yumona, yugwila ku butongi wakwe, yuhamuka, yuhaya giki, Bebe uli Ngʼwana wa Mulungu.
12Nanghwe uyilemeja no no no, itizungʼwelecha hape.
Yesu ubakoma batungʼwa
(Mt. 10.1-4; Lk. 6.12-16)
13Hunaho ulinha mu lugulu, ubitana kuli Wei abo walabatogilwe Ngʼwenekele, nabo biza kuli Wei.
14Ubatuula ho ikumi na babili kubiza hamo nanghwe, hangi giki, abatume kulomela.
15Na hangi babize na budula wa kupija bulwile bose, na kupeja masamva.
16Na ungʼwilika Simoni lina giki, Petro;
17Na Yakobo ngʼwana wa ngʼwa Zebedayo, na Yohana ngʼwana wa ngʼwawe wa Yakobo, nabo ubilika mina giki, Boanerge, makulu gaho giki, bana ba kuluma kwa mbula;
18Na Andrea, na Filipo, na Bartolomayo, na Matayo, na Tomaso, na Yakobo ngʼwana wa ngʼwa Alfayo, na Thadayo, na Simoni muna Kanani,
19Na Yuda Iskariota uyo wali ungʼwinha ko. Huna bali bingila mu numba:
20Na ibita libilinga hangi kushisha nose bali batudula nulu kulya migati.
21Na aho bakwe bigwa iyo, bufuma bandime; iki buhaya giki, Masala gakwe gangaya.
Kibi cha kunduka Moyo Ngʼwela
(Mt. 12.22-37; Lk. 11.14-23)
22Na bandiki abali butulumenha kufuma Yerusalemi buhaya giki, Ali na Beelzebuli; na hangi giki, Akupejaga masamva mu budula wa ntale wa masamva.
23Nanghwe ubitana kuli Wei, ubawila mu shigemenghejo giki, Shetani wadula kinahe kumpeja Shetani?
24Kangi butemi ulu wilekanya wenekele na wenekele, butemi wenubu butudula kwimila.
25Na numba ulu yilekanya yenekele na yenekele, numba yeniyo itudula kwimila.
26Na Shetani ulu wiyubukila ngʼwenekele na kwilekanya ngʼwenekele, atudula kwimila, aliyo ali na nghalilo.
27Ati ho munhu uyo wadula kwingila mu numba ya munhu wa nguzu, na kusonza shikolo shakwe, ulu atandije tame kuntunga uyo wa nguzu, hunaho akusonza numba yakwe.
28Nghana namuwila giki, Banhu balalekejiwa shibi shose na buduki bose ubo bakudukagulaga:
29Aliyo uyo ose akundukagulaga Moyo Ngʼwela atubona kulekejiwa welelo bose, aliyo wigelelilwe nsango gwa welelo na welelo:
30Iki bali buhaya giki, Ali na moyo gwa busoso.
Ba ngʼwawe bunkoba Yesu
(Mt. 12.46-50; Lk. 8.19-21)
31Hunaho biza nina na bana ba ngʼwawe; bimila hanze, butuma kuli Wei wa kungʼwitana.
32Na ibita lyali ligashije limpindije, nabo bungʼwila giki, Lolaga, u noko na bana ba ngʼwingʼwe bali hanze, balikukoba.
33Nanghwe ubashokeja, uhaya giki, Mayu ni nani nulu bana ba ngʼwiswe ni banani?
34Nanghwe ubilalangija abigashije bampindije, uhaya giki, Lolagi, Mayu na bana ba ngʼwiswe.
35Iki munhu ose uyo akwita iyo Mulungu atogilwe, ngʼwenuyo ali ngʼwana wa ngʼwiswe, na ilumbu lyane, na mayu.
Currently Selected:
Marko 3: SUK60
Highlight
Share
Copy
Want to have your highlights saved across all your devices? Sign up or sign in
New Testament in Sukuma © United Bible Societies, 1960.
