Yohana 16

Yesu ukuhanga kuluhiwa kwa bazunya

1Mihayo yeniyi namuwilaga bingʼwe mutalizipamiwa.

2Balamupeja mu mabilingilo; chene ikanza likwizaga aho uyo ose umubulaga bingʼwe akwiganika giki, akuntumamilaga Mulungu.

3Bakungʼwitila yeniyi iki batamanile Baba nulu Nene.

4Aliyo namuwilaga yeniyi giki, aho ikanza lyenilo lilashikaga, ngʼwizukwe giki, Naali naamuwila mihayo yeniyi. Nali natamuwilile yeniyi kufuma kwandia, iki nali ho hamo ningʼwe.

5Aliyo haha naja kuli Uyo waantuma; hangi ati ho umo wa mu bingʼwe uyo wanibuja giki, Ujile hali?

6Aliyo iki namuwilaga yeniyi, bupina bokajaga ngholo yingʼwe.

Nimo gwa Moyo Ngʼwela ku ba mu si

7Aliyo namuwila ya nghana giki, Ikumubelela bingʼwe Nene ninge ho; iki ulu natinga ho Nene, Ngunani ataliza ku bingʼwe; aliyo ulu nuja Nene, nakuntuma ku bingʼwe.

8Nanghwe aho alizaga akubakanilija ba mu si ya shibi, na ya butungilija, na ya kulekanya nsango.

9Ya shibi, iki batunizunyaga Nene;

10Ya butungilija, iki naja kuli Baba, na bingʼwe mutunibona hangi;

11Ya kulekanya nsango, iki ntale wa si iyi nanghwe walekanyiwagwa nsango.

Nimo gwa Moyo Ngʼwela ku bazunya

12Natali ndi na mihayo mingi ya kumuwila, aliyo bingʼwe mutudula kuyiyumilija haha.

13Aliyo Ngʼwenuyo, Moyo Ngʼwela wa nghana aho wiza, akumutongela mu yose ya nghana; iki atalalungalunga yakwe ngʼwenekele; aliyo yose iyo akwigwa, i yene akulungalunga; hangi akumusombolela iyahaya kwiza.

14Ngʼwenuyo akunikuja Nene; iki akuyinja ho ku yane, hangi akumusombolela bingʼwe.

15Yose iyo Baba ali nayo, yene yane; kulwa mhayo uyo namuwila giki, akuyinja ho ku yane, hangi akumusombolela bingʼwe.

Yesu ukuhaya kucha, na kujuka kwakwe

16Kakanza kado ningʼwe mutunibona; na hangi kakanza kado ningʼwe mukunibona hangi; iki naja kuli Baba.

17Kulwa iyo bamo ba mu bahemba bakwe bilunjalunja giki, Mhayo uyu alituwila guli kinahe, giki, Kakanza kado ningʼwe mutunibona; na hangi kakanza kado ningʼwe mukunibona hangi? na giki, Iki naja kuli Baba?

18Kulwa mhayo uyu buhaya giki, Mhayo guli kinahe uyu alihaya giki, Kakanza kado? Tutamanile iyo ulungalunga.

19Yesu wali umana giki, batogilwe kumuja, nanghwe ubawila giki, Angu, bingʼwe ngʼwibugilija benekele na benekele ya mhayo uyu naguhayaga giki, Kakanza kado ningʼwe mutunibona; na hangi kakanza kado ningʼwe mukunibona hangi?

20Nghana, nghana, namuwila giki, Bingʼwe mukulila hangi mukulila nghungu; aliyo ba mu si bakuyega, bingʼwe mukupinihala, aliyo bupina wingʼwe bulagaluka kubiza buyegi.

21Nkima ulu alituula, ali na bupina, iki ikanza lyakwe lyashikaga; aliyo aho wamala kumyala ngʼwana, atizukwa hangi u buluhi, kulwa kuyegela giki, munhu wabyalagwa mu si.

22Na bingʼwe hambunyu muli nabo bupina nghana; aliyo nakumubona hangi, na ngholo yingʼwe ikuyega, hangi ati ho nulu umo wa kumutaja buyegi wingʼwe.

23Hangi mu lushiku lwenulo mutalanibuja mhayo gose. Nghana, nghana, namuwila giki, Yose iyo munombe Baba mu lina lyane, akungʼwinha bingʼwe.

24Kushisha lelo mutali kulomba mhayo nulu gumo mu lina lyane; lombagi ningʼwe mukwinhiwa, buyegi wingʼwe bubize bushikanu.

25Mihayo yeniyi nalungalungaga mu sumo; ikanza lukwizaga aho lyulungalunga hamo ningʼwe hangi mu sumo, aliyo nakumusombolela hape i ya ngʼwa Baba.

26Mu lushiku lwenulo mukulomba mu lina lyane, na Nene natumuwilaga giki, Nakumuja Baba kulwa nguno yingʼwe;

27Iki Baba ngʼwenekele amutogilwe, iki bingʼwe ngʼwaanitogwa, hangi ngʼwaazunya giki, Nene nafumile kuli Baba.

28Nene nafumile kuli Baba, hangi nizile mu si; hangi nabaleka ba mu si, naja kuli Baba.

29Bahemba bakwe bungʼwila giki, Lolaga, hambunyu ukulungalungaga hape, na utuhayaga lusumo nulu lumo.

30Hambunyu tulitegeleja giki, Bebe witegeleja mihayo yose, hangi uti na nguno munhu ose akubuje; kulwa mhayo uyo twazunya giki, Bebe ufumile kuli Mulungu.

31Yesu ubashokeja giki, Ngʼwazunya nghana hambunyu?

32Lolagi, ikanza likwizaga, chene na hambunyu lyashikaga, bingʼwe bose mukubalasanyiwa, buli munhu ose ku yakwe, na Nene mukunileka niyene; nahene nati niyene, iki Baba ali hamo na Nene.

33Mihayo yeniyi namu wilaga giki, muli Nene mubize na mhola. Mu si mukubiza na kuluhaluhiwa; aliyo timbyagi ngholo, Nene napyenaga si.

Currently Selected:

Yohana 16: SUK60

Highlight

Copy