Luka 16

Matɔ tɛ siɔ wa batangɔ nwa

1Yezo apa hɛ̃ ava lo ya: “Mbanga kɔli kɔi mɛ wa nwa ndo na wa batangɔ nwa tɛ lo da. Ko azi aga ndo apa hɛ̃ wa nwa ko ya, wa batangɔ nwa tɛ lo ndogbɛ̃ nwa tɛ lo. 2La wa nwa ko aili wa batangɔ nwa tɛ lo, apa hɛ̃ lo ya: ‘Mbi ma tɛnɛ na ili mɔ. La mbi na mbɛti mɛ mɔ su na faranga mɛ mɔ lua, na omɛ mɔ vɔ̃ na ye, ta sanga ma, tɛ mɔ na batangɔ nwa tɛ mbi awe.’ 3Wa batangɔ nwa ko atɛnɛ ka ya bɛ lo ya: ‘Gbia tɛ mbi na hãngɔ mbi na lɛ kwa tɛ mbi. Wa ye mɛ mbi na lingɔ nɛ? Ta mbi na nguru ti lingɔ kwa ti yaka ma. Mbi na ntangɔ kamɛnɛ so yɔngɔ ndo na ti azi. 4Aa! Mbi hĩnga ye mɛ mbi lengbi ti lingɔ, wa na ngoi ko la alia mbi na lɛ kwa tɛ mbi ko, azi ayamba mbi ka ndo tɛ la.’ 5La lo ili awa sende tɛ gbia tɛ lo kɔi kɔi zu aga ka tɛ lo. Lo hũnda zo ti uzu ya: ‘Mɔ na sende tɛ gbia tɛ mbi kɛ̃?’ 6Lo gbinya hɛ̃ lo ya: ‘Tuku ti kpɔ̃ ngbangbo kɔi.’ Wa batangɔ nwa agbinya hɛ̃ lo ya: ‘Ba mbɛti ti sende tɛ mɔ lo mɛ. Du tise hiɔ, ko mɔ su ka lɛ ni ya, tuku ti kpɔ̃ sui kɔ̃.’ 7So pɛni, lo pa hɛ̃ omɛ ndɛ̃ ya: ‘Wa mɔ, sende tɛ mɔ kɛ̃?’ Lo gbinya hɛ̃ lo ya: ‘Saki ti le tɛ mɛ ili ni la ble ngbangbo kɔ̃.’ Wa batangɔ nwa apa hɛ̃ lo ya: ‘Ba mbɛti ti sende tɛ mɔ lo mɛ. Su ka lɛ ni ya, saki ti ble ngbangbo siɔ.’ 8La gbia agonda wa batangɔ nwa mɛ lo wa poroso, na lo mɛ ya, wa batangɔ nwa tɛ lo ali ye ni na kɔdɛ. Ta sanga ma, azi ti lɛ sese ndoli ye tɛrɛ afɔ̃ la na kɔdɛ aɔ azi mɛ ndodɔ nɔ na ya vuru ndo.” 9La Yezo apa nga hɛ̃ la ya: “Mbi pa tɛ mbi hɛ̃ ĩ ya, nwa ti lɛ sese ndohanda azi ya ala li siɔ ye, ko ale ĩ lɛ ni na songo na tɛrɛ afɔ̃ ĩ, wa na lá ko la ta ĩ lua ni ma ko, ayamba ĩ ka kɔdɔrɔ ti kaka. 10Zo ko la ndoli kwa mɛ yakere na seni ko, lo lengbi nga ti lingɔ kwa mɛ kotani na seni. Wa zo ko la ta ndoli kwa mɛ yakere na seni ma ko, ta lo lengbi nga ti lingɔ kwa mɛ kotani na seni ma. 11Se ta ĩ li nwa ti lɛ sese na seni ma ko, ta zo ahɛ̃ ĩ gbanda bɛta nwa ya ĩ bata ma. 12Se ta ĩ li ye tɛ zo mɛ ndɛ̃ na seni ma ko, ta zo mɛ gbanda ahɛ̃ ĩ ye tɛ ĩ nvɛni da ma. 13“Ta wa kwa kɔi alengbi ti lingɔ kwa hɛ̃ agbia se ma. Se lo li so ko, bɛ lo akɛ̃ kɔi, ko bɛ lo aye omɛ ndɛ̃, lo ma nyɔ kɔi, ko lo samana na omɛ ndɛ̃. Ta ĩ lengbi ti lingɔ kwa hɛ̃ Nzapa, ko ĩ li nga kwa na lo ti luangɔ nwa ma.”

Yezo apa alo ndɛ̃ ndɛ̃ ndɛ̃

(Mat. 11.12-13; 5.31-32; Mar. 10.11-12)

14Afarizeo ndoma ndo tɛnɛ mɛ Yezo ndotɛnɛ zu, ko ala ndoe ndo lo, ta sanga ma, ala du azi mɛ aye faranga ma wo ma. 15Yezo apa hɛ̃ la ya: “ĩ du azi mɛ ĩ ndomu tɛrɛ ĩ na lɛ azi ya, ĩ abɛta azi, kanda Nzapa ahĩnga alo mɛ ka ya bɛ ĩ. Ta sanga ma, ye ko la azi ndomu ka lɛ la ngbondoni ko, Nzapa ndomu ni ka le lo gɛgɛrɛ.

16“Ndia tɛ Mɔizɛ na ambɛti tɛ awa pangɔ nyɔ Nzapa afa ndo azi na lege tɛ Nzapa ngbĩi, asi na ngoi tɛ Yoanɛ wa hɛ̃ngɔ batisimɔ. Ato na ngoi ko ndo ko, andopa ndo Nzɔ̃ Pa ti lo Lɛngɔ Gbia tɛ Nzapa, ko zo kɔi kɔi ndoli ndo kpengbani ya, ni si ka Kɔdɔrɔ Gbia tɛ Nzapa. 17Ndozu na sese awe gbanda, kanda ta aweza gbanda tɛnɛ kɔi ti ya ndia ma.

18“Kɔli zu ko la azia ya lo, adu na wali mɛ ndɛ̃ ko, kɔli ni ko ati kɔmbɛ. Kɔli ko nga la adu na wali mɛ kɔ lo atoma lo ko, kɔli ni ko ati nga kɔmbɛ.”

Matɔ tɛ wa nwa na Lazaro

19Yezo ato matɔ hɛ̃ la ya: “Mbanga kɔli kɔi ndo wa nwa, lo ndoyu ndo akpɔ̃ bɔngɔ ti kota ngere. Lá kɔi kɔi, lo ndodu ndo nzɔ̃ni, lo ndotɛ ndo anzɔ̃nzɔ̃ tɛ. 20Kanda mbanga kɔli kɔi tɛ lo ndo wa yɛlɛ, ili lo la Lazaro. Tɛrɛ lo kwɛ zu ndo gi na kã poto poto, ko lo ndose ndo so nyɔ da tɛ wa nwa ni ko. 21Lo ndoye ndo ya, ni tɛ ambumbu tɛ ko la andolo ka ndo mɛsa tɛ wa nwa, andosa tise. Ko ambo ndoga ndo asũsũ lɛ kã tɛ lo. 22Ngoi mɛ lo ĩ kpi ko, aangelo aga amu lo, agwe na lo akpã ka gunda Abrahama ka yayu. So pɛni, wa nwa ko akpi nga, ko ahɔ lo. 23Lo ĩ si ka ndo mɛ awa kwáni ndodu da ko, lo hũ pɛnɔ ma wo ma. Lo ĩ ya lɛ lo ko, lo hũ Abrahama ka yɔngɔrɔni, na Lazaro so gunda lo. 24La wa nwa ko ade kɔngɔ ya: ‘Baba Abrahama, ma vundu tɛ mbi. To Lazaro lo do ngu na li ti lo, ko lo ga lo do na menga mbi. Ta sanga ma, mbi ndohũ pɛnɔ ma wo ma ge ya wá olo mɛ.’ 25Abrahama agbinya hɛ̃ lo ya: ‘Nyi mbi, da bɛ mɔ na ye mɛ ndo mɔ lua ma wo ma, na ngoi mɛ ndo mɔ dɛ lɛ mɔ ngɛ̃. Ko tɛ Lazaro ko, lo hũ ndo tɛ lo pɛnɔ sĩ. Na olo mɛ ko, bɛ Lazaro azu, ko mɔ ndohũ tɛ mɔ pɛnɔ. 26Lo mɛ ndɛ̃ nga lo mɛ: kota du mɛ lipi lipi akangbi popo tɛ e na ĩ. Na lo ni ko, ta zo alengbi ti longɔ ge tɛ e, nɔngɔ ka tɛ ĩ ma. Ta zo alengbi nga ti longɔ ka tɛ ĩ, gangɔ ge tɛ e ma.’ 27-28Wa nwa apa hɛ̃ Abrahama ya: ‘Baba, mbi na ayata mbi ti kɔli okɔ̃ ka nda se wa tɛ to mbi, wa to Lazaro, lo nɔ lo tisa la, so ala ga nga ge na ya ndo ti pɛnɔ olo mɛ mbi da.’ 29Abrahama agbinya hɛ̃ lo ya: ‘Ndia tɛ Mɔizɛ, na tɛnɛ tɛ awa pangɔ nyɔ Nzapa la kai ndotisa ayata mɔ. Ale ala tɔndɔ bo ni!’ 30Wa nwa apa hɛ̃ Abrahama ya: ‘Baba Abrahama, ta oko alengbi nga ma. Kanda se zo alo ge tɛ e awa kwáni anɔ ata la, wa se mɛ ala gbinya bɛ la la.’ 31La Abrahama apa hɛ̃ lo ya: ‘Se ta ala tɔndɔ ndia tɛ Mɔizɛ na tɛnɛ tɛ awa pangɔ nyɔ Nzapa ma ko, bɛ se mbanga wa kwáni aso atɛnɛ tɛnɛ hɛ̃ la ko, ta ala na yengɔ lo ni ma!’ ”

Currently Selected:

Luka 16: NGB87

Highlight

Copy