Yoanɛ 1

Yezo lo Tɛnɛ tɛ Nzapa

1Uzu ti Nzapa lingɔ sese ko, Tɛnɛ ndo da gã, Tɛnɛ na Nzapa ndodu ndo ndoni kɔi, Tɛnɛ ndo la Nzapa. 2Uzu ti tongɔ nda ye zu ko, Tɛnɛ na Nzapa ndodu ndo ndoni kɔi. 3Nzapa ali ndo aye zu na lege ti Tɛnɛ, ko ye mɛ ta Nzapa ali na lege ti Tɛnɛ ma ko, ta ye ni da ma. 4Tɛnɛ ni ko la ndohɛ̃ beta du hɛ̃ azi, ko beta du ni adu nga ma lá mɛ ndovuru na ndo hɛ̃ azi. 5Ndo ni avuru ngbɛ̃ na ya mbingo, ko ta mbingo avĩ ni ma.

6Nzapa ato ndo wa pangɔ kwa tɛ lo mɛ ili lo la Yoanɛ. 7Yoanɛ aga ndo so kambisangɔ nda lo tɛ wa vurungɔ na ndo. Lo ga ndo so pangɔ lo tɛ wa vurungɔ na ndo hɛ̃ azi zu, wadila ala ye lo tɛ wa vurungɔ na ndo ni. 8Ta Yoanɛ nvɛni ndo la wa vurungɔ na ndo ma, kanda lo tɛ lo ndo zo mɛ aga so kambisangɔ nda lo tɛ wa vurungɔ na ndo. 9Wa vurungɔ na ndo mɛ ndo aga ge lɛ sese, avuru na ndo hɛ̃ azi zu ko, bo lo kɔi la beta wa vurungɔ na ndo.

10Tɛnɛ aga ndo ge lɛ sese. Nzapa ali ndo sese na lege ti Tɛnɛ, kanda ta azi ti lɛ sese ahĩnga ndo Tɛnɛ ma. 11Tɛnɛ aga ndo ka tɛ azi tɛ lo nvɛni, ko ta azi tɛ lo ayamba ndo lo ma. 12Kanda ambanga ayamba ndo lo, aye nga ndo lo tɛ lo, la lo hɛ̃ la nguru ya, ala ti aya Nzapa. 13Ta ala ti aya Nzapa nga ma se mɛ azi ndodu na gwɛ̃ wali, wa ala dú nyi ma. Kanda Nzapa nvɛni la To la.

14Tɛnɛ ni amu ndo tɛrɛ zo, lo ndodu ndo so popo tɛ e. Lo na nzɔ̃ bɛ ma wo ma, ko lo fa nga e na beta lo tɛ Nzapa zu. E hũ ndo ndima tɛ lo mɛ ndo To lo Nzapa ahɛ̃ lo, na lo mɛ ya, lo ngbongi Nyi. 15Yoanɛ apa ndo lo tɛ lo na kɔngɔ ya: “Lo ndo la mbi ndopa lo tɛ lo ya, lo na gangɔ pɛko mbi, kanda lo ɔ mbi na nguru, ta sanga ma, lo ndo uzu da gã na ngoi mɛ ta adɛ adú mbi ma.”

16Lo li ndo nzɔ̃ bɛ hɛ̃ e zu, lo sunu ndo nga e ndoni ndoni. 17Nzapa alu ndo ndia hɛ̃ e ti ndo Mɔizɛ, kanda e lua nzɔ̃ bɛ tɛ lo, na beta lo tɛ lo ti ndo Nyi lo Yezo Kristo. 18Ta zo kɔi ahũ Nzapa ma. Kanda ngbongi Nyi lo mɛ lo nvɛni nga Nzapa, lo ndodu ka tɛ To lo Nzapa, la afa e na To lo Nzapa.

Lo tɛ Yoanɛ wa hɛngɔ batisimɔ

(Mat. 3.1-12; Mar. 1.1-8; Luk. 3.1-18)

19Mbanga lá kɔi, agbia tɛ Ayuda mɛ ndodu ka Yeruzalɛmɛ amu awa lungɔ Nzapa na ye, nga na awa kwa ti ya da Nzapa, ato la na kwa ya, ala nɔ, ahũnda Yoanɛ na ndo. La ala nɔ, ahũnda Yoanɛ ya: “Mɔ na?” 20Yoanɛ agbinya tɛnɛ hiɔ hɛ̃ la, lo pa yango na gbɛlɛ la zu ya: “Ta mbi Mɛsia ma.” 21Awa nɔngɔ kwa ĩ ma so ko, ala hũnda lo ya: “Wa mɔ na? Mɔ Elia?” La Yoanɛ agbinya hɛ̃ la ya: “Ipɔ, ta mbi Elia ma.” Ala hũnda lo ya: “Mɔ la wa pangɔ nyɔ Nzapa mɛ ndo e ma ya, lo na gangɔ?” Yoanɛ agbinya hɛ̃ la ya: “Ipɔ.” 22La ala ti hũnda lo ya: “Wa mɔ tɛ mɔ na? Ale e ma nga nyɔ mɔ, wa e nɔ e pa hɛ̃ awa tongɔ e na kwa. Mɔ nvɛni mɔ ndonɛ tɛ mɔ ya mɔ na?” 23La Yoanɛ agbinya hɛ̃ la ya: “Mbi tɛ mbi

‘Zo ko ndoto mbela ka bɛ ndo ya:

Ĩ lɛkɛ lege alo mbiri mbiri hɛ̃ Gbia oo.’ ”

(Tɛnɛ mɛ ndo Ezai wa pangɔ nyɔ Nzapa atɛnɛ la.)

24Afarizeo ndo nga na popo tɛ awa nɔngɔ kwa mɛ ndo ato la ka tɛ Yoanɛ. 25La Afarizeo ni ahũnda Yoanɛ ya: “Se ta mɔ du Mɛsia, bere Elia, bere wa pangɔ nyɔ Nzapa mɛ e ndoku lo ma ko, nda mɛ mɔ ndohɛ̃ azi batisimɔ nɛ?” 26Yoanɛ agbinya hɛ̃ la ya: “Mbi ndohɛ̃ ĩ batisimɔ ti ngu. Kanda mbanga zo kɔi na popo tɛ ĩ, ta ĩ hĩnga lo ma, 27lo na gangɔ pɛko mbi, ko ta mbi zo mɛ mbi lengbi bɛ ti zarangɔ kpu pɔrɔ ti gɛrɛ lo, hãngɔ ni ma.”

28Alo olo zu asi ndo ka kɔdɔrɔ ti Betania, ka mbage ngu ti Yurdɛnɛ mɛ ndo Yoanɛ ndohɛ̃ na batisimɔ hɛ̃ azi da.

Yezo lo Nyi Ngasã Ngbaga tɛ Nzapa

29Ĩ la bu ndã ĩ de ko, Yoanɛ ahũ Yezo so ndoga ka tɛ lo, la Yoanɛ apa hɛ̃ azi ya: “Ĩ ba Nyi Ngasã Ngbaga tɛ Nzapa mɛ aga so hãngɔ siɔ ye tɛ azi zingɔ lo mɛ! 30Lo biri la mbi pa lo tɛ lo ya: ‘Mbanga zo na gangɔ pɛko mbi, lo ɔ mbi na nguru, ta sanga ma, lo ndo uzu da gã na ngoi mɛ ta ade adú mbi ma.’ 31Ta mbi hĩnga ndo lo ma. Kanda mbi ga so hɛ̃ngɔ batisimɔ ti ngu hɛ̃ ĩ awa Izrayɛlɛ, wadila ĩ hĩnga lo.” 32Yoanɛ apa ndo nga lo ye mɛ lo hũ, lo ya: “Mbi hũ fɛrɛ Tɔrɔ Santo alo ka ndozu, azu nga ma se tɛ mbipa, adu ndo lo. 33Abɛ nga so ko, ta mbi dɛ ndo mbi hĩnga lo ma, kanda Nzapa mɛ ato mbi ya, mbi yɔrɔ azi ya ngu so hɛ̃ngɔ la batisimɔ, apa ndo hɛ̃ mbi ya: ‘Mɔ na hũngɔ Tɔrɔ Santo tɛ mbi, longɔ ka ndozu zungɔ na ndo mbanga zo. Zo ni ko la na sangɔ Tɔrɔ Santo tɛrɛ azi so hɛ̃ngɔ la batisimɔ!’ ” 34Yoanɛ apa nga ya, ni hũ ndo ye ni ko, la ni pa ya, zo ni ko lo Nyi Nzapa.

Yezo aili akɔzo ava lo

35Ĩ la bu ndã ĩ de ko, Yoanɛ na ambanga ava lo sɛ ade bo so ndo ko. 36Ngoi mɛ Yoanɛ ĩ hũ Yezo so ɔ ko, lo pa hɛ̃ azi ya: “Ĩ ba Nyi Ngasã Ngbaga tɛ Nzapa la!” 37Ava Yoanɛ ko sɛ ĩ ma so ko, ala dɔ Yoanɛ azia, anɔ pɛko Yezo. 38Yezo ĩ sana tɛrɛ lo, ĩ hũ ya, ala ndoga pɛko ni ko, lo hũnda la ya: “Ye mɛ ĩ ndogi nɛ?” Ala gbinya hɛ̃ lo ya: “Rabi, mɔ ndodu so wa?” (Nda Rabi ni la: “Wa hangɔ lo tɛ Nzapa.”) 39Yezo apa hɛ̃ la ya: “I ga é nɔ, ĩ na hũngɔ ndo ni.” Ala ĩ nɔ ĩ si kai ko, ala hũ ndo mɛ lo ndodu da, la ala ngbã bo so tɔ̃nda lo ngbĩi bi avũ. (Ngoi ati ndo nga ma saa siɔ ti pɛ bɛ kɔmbitɛ.)

40Azi sɛ mɛ ndo ama tɛnɛ tɛ Yoanɛ, la ala nɔ pɛko Yezo ko, ili mbanga ndo la Andre, lo nyita Simɔ Petro. 41Andre anɔ uzu, ata nyita lo Simɔ, apa hɛ̃ lo ya: “E hũ fɛrɛ Mɛsia.” (Nda Mɛsia ni la: “Kristo.”) 42So pɛni, Andre amu Simɔ, anɔ na ni ka tɛ Yezo. Yezo ĩ hũ Simɔ ko, apa hɛ̃ lo ya: “Mɔ Simɔ mɛ nyi Yoanɛ lo mɛ. Ili mɔ na olo la Sefasi.” (Nda Sefasi ni la: “Tɛ́nɛ.”)

Yezo aili Filipo na Natanaɛlɛ

43Ĩ la bu ndã ĩ de ko, Yezo asepara ya, ni gwe ka sese ti Galilea. Lo ĩ nɔ ĩ tã Filipo ko, lo pa hɛ̃ lo ya: “Ga é ɔ!” 44(Filipo ndo wa Bɛtɛsaida, kɔdɔrɔ mɛ ndo Andre na Petro ndodu da la.) 45So pɛni, Filipo ĩ nɔ ĩ tã Natanaɛlɛ ko, lo pa hɛ̃ lo ya: “E hũ fɛrɛ zo mɛ ndo Mɔizɛ asu lo tɛ lo ka ya buku ti ndia, zo mɛ ndo awa pangɔ nyɔ Nzapa apa nga lo tɛ lo. Adu Yezo, lo nyi Yozɛfu mɛ wa Nazarɛtɛ.” 46La Natanaɛlɛ apa hɛ̃ Filipo ya: “Ta mbi hũ nzɔ̃ lo kɔi mɛ alengbi ti longɔ ka Nazarɛtɛ, singɔ ge ma.” Filipo agbinya hɛ̃ lo ya: “Ga é nɔ, mɔ na hũngɔ na lɛ mɔ.”

47Ngoi mɛ Yezo ĩ hũ Natanaɛlɛ so ndoga ka tɛ lo ko, lo pa ya: “Ĩ ba beta wa Izrayɛlɛ la ndoga, ta lo ndopa nvɛnɛ bɛ yakere ma.” 48La Natanaɛlɛ ahũnda Yezo ya: “Ee, mɔ hĩnga mbi na nɛ?” Yezo agbinya hɛ̃ lo ya: “Uzu ti Filipo ilingɔ mɔ ko, mbi hũ fɛrɛ mɔ so gbe kɛkɛ figie.” 49La Natanaɛlɛ apa hɛ̃ lo ya: “Wa hangɔ lo tɛ Nzapa, mɔ Nyi Nzapa, mɔ kota gbia ti Izrayɛlɛ!” 50Yezo apa hɛ̃ lo ya: “Mɔ ye lo tɛ mbi, ta sanga ma, mbi pa hɛ̃ mɔ ya, mbi hũ fɛrɛ mɔ ka gbe kɛkɛ figie. Ko mɔ na hũngɔ akota ye mɛ aɔ omɛ mɛ mɔ hũ.” 51La Yezo apa nga hɛ̃ la ya: “Mbi pa hɛ̃ ĩ ti beta tɛnɛ ya, ĩ na hũngɔ lɛ ndozu zingɔ, ko aangelo tɛ Nzapa na longɔ kai zungɔ ge tɛ mbi Nyi Zo, so pɛni wa ala ti ma ka tɛ Nzapa.”

Currently Selected:

Yoanɛ 1: NGB87

Highlight

Copy