Matiyu 27

1Prūbokom ovun tavsogi tumpora, movun Talam, irorasū, dūmaūor ugi Iesū, mūmōkū wontalugi; 2mirora dūiti mūmūtōri pelah, mūmūtenĭmpe pugi Pontius Pīlat, Natemonok.

3Im Yūdas, mori yempirĭgi iyi, pol sugkū yemokesi ma irora dūmūnūwi nam mūmōkū wontalugi, yemorĭgi sat tamas, memefitorĭleki muni ovun peni wun hunder ĭm fĭfti mori punora ovun tavsogi tumpora, 4movun Talam, memenūwi pun ora memokū, Ya umnoworepatevi, ĭt ya ompirĭgi iyi mori tanepo wokon ĭm aremi ĭndōwi. 5Mirora dūmūnūwi mūmōkū, Worowo iramam? Ipe kĭk! Miyi yemelasevugi muni mori ūnisog nimo tumpora mempe, memesepen nelekiwan.

6Movun tavsogi tumpora dūmūvī muni mori mūmūnūwi mūmōkū, Tawi sugkū selnivi nam woretipe mori ra mumpon woretavĭnapon tumpora, popōwo nĭpmi de. 7Mirora dūmaūor ugi, mūmūvasĭgi muni mori, nūrū eni neteme poter, mūmōkū wontenemi yūi ovun dōmō. 8Popōwo imo sugkū, oveteme dūmūnūwi mūmōkū nūrū mori, Nūrūn de; nin sugkū mefeli imo dan. 9Yemampesog ugi imo, nam mori Yeremĭa profet yepmenūwi memokū, Mirora wampĭ ovun peni wun hunder ĭm fĭfti, 10nĭpmi eni iyi mori dūmū wanūwĭgi, eni iyi mori oveteme Isrēel dūmū wanūwĭgi; mirora wampugi worevasĭgi nūrū eni neteme poter, sugkū Iyi Novsūromon yemenūwi po yaū.

11Im Iesū yemetūrū ūnĭpmi eni Natemonok; miyi Natemonok yemtagkeli memokū, kĭk Natemonok ra nūsian enirora oveteme Isrēel, kū? Im Iesū yemenūwi pugi memokū, kĭk onūwi. 12Movun tavsogi tumpora, mōveteme Talam dūmūvievri iyi, miyi yetūtamsi. 13Im Pĭlat yōĭmtagkeli memokū, kĭk orĭgi imosū sikat irora ūtesūwĭ iram, kū? 14Miyi yetūtamsi, tawi sī nam; miyi Natemonok yemavlugi tamas.

15Im pol sugkū irora dūmumpi imo narĭgari, nevisū, iyi Natemonok yemorūn nesūli sĭ neteme yemeti, sī kū sī nĭsekonda mori irora dūmōkū ugi. 16Im ra nempugon mori yepmēti sĭ neteme, nin eni Barabas; irora sū dūmūkili iyi. 17Im pol sugkū dūmūsepen semsimokonda sū, Pĭlat yemtagkelora memokū, kūmagkū ya osūli nĭsekomi itokowo, Barabas, kū Iesū, nalĭg eni Krĭstō? 18It iyi yemokili ma irora dūmempirĭgi iyi popōwo ugi noworemi sat. 19Im pol sugkū iyi yemetesep ran tan potnumpūtūo nūrian, retepon eni yemtamūli nam pugi memokū, Etū-umpi sī en tie sĭ iran imo neteme tanepo, ĭt ya orĭgi ovun nesorū sikat ra nemeviak enyaū irē popōwo ugi iyi. 20Kō irora ovun tavsogi tumpora, movun Talam, dūinūsendovotni ovun numpūn lō ma sugkū irora wonesenĭgi Barabas, montalugi Iesū. 21Miyi Natemonok; yōĭmtagkelora memokū, kūmagkū ya osūli nĭsekomi Itokowo ra irora dūrū? Mirora dūmūnūwi mūmōkū, Barabas. 22Pīlat yemtagkelora memokū, Im ya onumpi tie ugi Iesū mori nalĭg eni Kristo? 23Mirora sū dūmūnūwi pugi mūmōkū, Talugi iyi ra nēūmparum. Miyi Natemonok yōĭmtagkelora memokū, Irantie? Iyi umpi tie? Kō irora dūōmūnūwisah mūmōkū, Talugi iyi ra nēūmparum. 24Im Pĭlat pol sugkū yemokesi ma iyi yematekĭsah wokon, im yematipotni nesesaū, yivi nū, morokilen ūnimĭnda numpun lō, mōmenūwi memokū, Ya otū warepatevi ugi de eni imo neteme tanepo wokon: enugkĭmi kimi. 25Im lō omwisū dūmūnūwi mūmōkū, Ovūlokam ugi de eni, mōvnetemami. 26Miyi yemsūli Barabas nĭsekonda; movselatevi Iesū, memtenĭmpe woretalugi ra nēūmparum. 27Mōveteme ūbrami eni Natemonok dūmūvĭ Iesū, mūmūve ūnisog sī siman lō, mūmūtōrora ovun numpūnaranda pugi. 28Mirora dūmūtūvwi nemas eni, mūmūvĭugi semplaūon navilara. 29Mirora dūmūvi ovun nemrataū mūmūitĭgi numpūwavekōra ūnumpūn mūmūtipe deniūg ra nokoven meves eni, mūmūsē numpūneteranda ūniprni eni, mūmagepĭ iran, mūmūnūwi mūmōkū, Kĭk e paū Natemonok enirora oveteme Isrēel! 30Mirora dūmūtūvani iran mūmūvī parugi deniūg, mūmūrunūtĭ numpūn. 31Im penūri dūmagipi iran, dūōmūtūvwi semplaūon, mōmeviugi ovun nemas eni, mūmūtōri pelah woretalugi ra nēūmparum.

32Im pol sugkū irora dūmprokeve dūmōkesi sī neteme Sīrenia, nin eni Simon, mūmūtelieli iyi mūmōkū iyi andiuki nēūmparum eni. 33Mirora dūmūvēlum mefeli nūrū Kolkota, fan nam, 34Neven-nuki numpūn, mūmūvugi nū nakan ĭm nimonū ūnisog, woremoneki, miyi yemtegavwi, kō yetūmoneki. 35Mirora dūmūteri iyi ra nēūmparum, mūmūtavūrakwokonda ovun nemas eni, mūmasenduri lot ugi, mūmampesog nam moriprofet yepmenūwi memokū, Irora wontavūrakwokonda ovun nemas enyaū, memasenduri lot ugi semplaūon enyaū. 36Mirora dūmūtesep mūmūsugkelōwi iyi yūi; 37mūmūtipe ūnumpūn imo netiyi ugi nevievri iran;

Imo Iesū Natemonok enirora oveteme Isrēel.

38Mirora dūmūteri dūrū ovun neforugi ra ovun nēūmparum dal iyi, sī ra nokoven meves ĭm sī ra moor.

39Mōveteme mori dūmavango ūselat dūmūvriuri iyi, memawi numpūnda, mūmūnūwi mūmōkū, 40Kĭk mori mokū ontasi nimo tumpora, mōmenumpi ra dan desel ovkĭkēōwara; nagkū kĭk Netni eni Nōbū, yep marugĭ nēūmparum. 41Mōvun tavsogi tumpora, mōvun Somul, mōvun Talam, sugkū, dūmagipĭ, mūmūnūwi mūmōkū, 42Iyi yumkorēōwara ōveteme; miyi tawi faneteme woresepen eviēōwara iyi. Nagkū iyi Natemonōk enirora ōveteme Isrēel, aremĭ iyi mēyep marima marugi nē ūmparum, ĭm kos kelentavnirĭgi iyi. 43Iyi yemtesūo iran Nōbū; marima aremĭ Iyi osemsempari iran nagkū Iyi umnakĭugi iyi; ĭt iyi yenūwi memokū, Yaū Netni eni Nōbū. 44Mōvun neforugi mori dūmūteri dal iyi dūmūnūwi mūmōkū sugkū.

45Marugi pōakas-pōakas mefeli ra pōarap, nelebōkevat yemetendōwi ra nūrūsū. 46Im pōarap Iesū yemovrugisah gi nasora tamas memenūwi memokū,

Elī, Elī; lama sabakthani?

fan nam mori, Ah Nōbū ēnyaū; ah Nōbū enyaū, Kĭk ōwi yaū irantie?

47Nugkoneme mori dūmūtūrū yūi dūmūrĭgi mūmūnūwi mūmōkū, Iyi umamperugi Elĭya. 48Marimago sī ra irora yemovugovag mempī namtimte memtavioku i ra vĭnekar memetipe ra deniūg memovugi woromoneki. 49Kō nugkoneme dūmūnūwi mūmōkū, Owi lap; kos lokesi lap nagkū Elĭya ampelum, mampiēōwara iyi.

50Iesū yōmssorasah gi nasora tamas memtenĭmpe naviat eni. 51Im pah, nemas woreseni ūnisog nimo tumpora yemtevaseri, nugkon dūrū, yemne ĭmĭlūo m yep ra nesep. 52Mōv nokol ra ōvun velitenemi dūmūtĭpelah, mōv nokolĭsiranda ōvun tumpora mori dūpmas dūvsorasah, 53mūmūwi ōvun nokol penūri nevsorasah eni, mūmūve ra sĭti, mōmūtūratumpeni punora ōve eme sikat.

54Miyi Sentūrion, mirora dal, mori dūmavles ugi Iesū, pol sugkū dūmōkesi nomiok, ĭm tiamesū mori dūmūtepū, irora dūmūvekōrekōra, mūmūnūwi mūmōkū, Itnesog, Imo Netni eni Nōbū.

55Mōvasiven sikat dūmūsugkelōwi yūi isūt, mori dūmūri Iesū marugi Kalĭli mūmuntorugat iran; 56dal irora Mēri Magdalini, ĭm Mēri dĭneme Yokōbō ĭm Yoses, ĭm dineme ōvun netnime eni Sepedi.

57Pōarap arap sī neteme Arimatia, nin eni Yosef, neteme nōete, miyi sĭ ra irora ōvun nūrie eni Iesu; 58iyi yive pugi Pīlat memsenĭgi nokolisiran eni Iesu. Im Pīlat yemenūwi memokū wampugi no olĭsiran mori. 59Im Yōsef yivī nokolisiran, memovsen ugi némas lĭnen sentevives, memetipe ra veli velitenemi Itevaū eni, mori iyi yepmurevi ra vetūnam nisekon; 60miyi yemevolevoli nūsian nevat ra nogūn veli mori, mempe. 61Im Mēri Magdalini, Im Mēri sĭ, dūmūtesep yūi ra nokoren mavrempora.

62Dan penūri daneworūm, ōvun tavsogi tumpora, mōvun Faresi dūmūsepen semsimokonda, mūmūve pugi Pīlat mūmūnūwi mūkōmū, Natemonok, ka kĭmlenentemi ma iyi neteme nempiri mori, yemenūwi, 63pol sugku iyi yetūmas, memokū, Penūri dan desel ya ōmamsorasah. 64Enūwi nam wosumpat nugkugko veli afeli dan deselugi, kū entawi ōvun nūrie eni wampelum pūmrok monumprokugi iyi, manūwi punora ōvun netevokontū magkū, Iyi ovsorasah marugi nemás; Im imo namli ra nisah anti mōmū ĭteobuki ra nōbūm. 65Pīlat yemenūwi punora memokū, Oveteme navles enugkĭmi; ūve mūfĭntesū sugkū kūmagkū ugi. 66Mirora dūmūve mūmūsumpat veli velitenemi nugkugko, mūmūvūli nevat ra nogūn selat, mūmūtipe oveteme woravles.

Currently Selected:

Matiyu 27: ERGNT79

Highlight

Copy