Génesis 40

Ishkay runakuna sueñuyanqanta José tantiyatsinqan

1Tsaypitanam vïnu ruraqkunapa y tanta ruraqkunapa mandaqninkuna mana allita rurar 2Egipto nacionpa mandakuqnin rey Faraónta rabyatsishqa kayarqan. 3Tsaymi wardiakunapa capitanninpa wajinchö kaykaq carcelman qaykatsirqan. Tsay carcelchömi Josépis qaykuraykarqan. 4Wardiakunapa capitanninmi tsay ishkan runakunata Josépa poderninman churarqan. Tsay runakunam carcelchö unay qaykuräyarqan.

5Juk paqasmi vïnu ruraqkunapa y tanta ruraqkunapa mandaqninkuna sueñuyarqan ima päsananpaq kanqanta. 6José alliqlla watukaqninkuna aywarmi mantsakashqa kaykäyaqta tarirqan. 7Tsaymi tapurqan: <<¿Imanirtan mantsakashqa kaykäyanki?>>

8Paykunanam niyarqan: <<Mana allitam sueñuyashkä. Manam pipis kantsu imapaq sueñuyanqätapis tantiyatsiyämänanpaq>>.

Josénam nirqan: <<Imapaq sueñuyanqaykitapis Dios Yayam tantiyatsiyäshunki. Imata sueñuyanqaykita mä willayämay>>.

9Tsaynam vïnu ruraqkunapa mandaqnin willar nirqan: <<Sueñuynïchömi juk üvata 10kimsa rämayuq kaykaqta rikashkä. Tsay rämankuna tseqllimurnin tukturmi poqushqa üvaman tikrashqa. 11Tsay poqushqa üvata Faraónpa väsun aptaraykanqäman qapiskirmi Faraónta makyashkä>>.

12Josénam nirqan: <<Sueñuynikichö kimsa rämakuna rikanqaykim kimsa junaq kaykan. 13Kananpita kimsa junaqtam kay carcelpita Faraón jipiskatsishurniki arunqaykiman kutitsishunki. Tsaymi väsuwan vïnuta yapay servinki. 14Ninqaqnölla arunqaykiman kutir yarpaykallämanki. Tayta Faraónta rugaykullanki kaypita jipimänanpaq. 15Hebreo runakuna täkuyanqanpitam imayka suwaqnö kay markaman apayämashqa. Jutsannaq kaykarmi kaychö qaykurä>>.

16Tsaynö allipaq sueñunqanta willaptinmi tanta ruraqkunapa mandaqninpis Joséta kushishqa willar nirqan: <<Sueñuynïchömi kimsa taksha canastakunachö janap janap umallishqa tantakunata puriykätsinaq kä. 17Janan kaq taksha canastachömi Faraón mikunanpaq tukuyläya pastelkuna kanaq. Tsay pastelkunatam pishqukuna shamur mikuyashqa>>.

18Tsaymi paytapis José nirqan: <<Sueñuynikichö kimsa taksha canastakuna rikanqaykim kimsa junaq kaykan. 19Kananpita kimsa junaqtam umaykita roquskatsir qeruman Faraón warkatsishuptiki ayaykita wiskulkuna mikuyanqa>>.

20Tsaynö ninqanpita kimsa junaqtanam Faraón santunta celebrar mandäsiqninkunata convidarqan mikupakur upyapakur kayänanpaq. Tsay junaqmi carcelpita jipitsimurqan tanta ruraqkunapa y vïnu ruraqkunapa mandaqninkunata. 21Vïnu ruraqkunapa mandaqnintam yapay churarqan puntata arunqanman. Tsaymi puntata arunqannölla väsuwan vïnuta Faraónta yapay makyarqan. 22Peru tantata ruraqkunapa mandaqnintam sïqa José willanqannölla wañuskatsir ayanta qeruman warkatsirqan. 23Vïnu ruraqkunapa mandaqninqa José rugakunqanta manam yarparqannatsu.

Currently Selected:

Génesis 40: qxn

Highlight

Copy