Génesis 39

Joséwan Potifarpa warmin puñuyta munanqan

1Ismaelita negociantikuna Egiptuman Joséta chaykatsiyaptinmi Potifar rantirqan. Potifarqa Faraónpa wardiankunapa capitanninmi karqan.

2 Dios Yaya paywan kaptinmi#Hech. 7.9. José ruranqankunaqa llapanpis alli karqan. Tsaynöpam patronninpa wajinchö täkurqan. 3Dios Yaya yanapanqanta tantiyarmi 4patronnin alläpa kuyar wajinman Joséta churarqan llapan imaykankunatapis rikar mandakuq kananpaq. 5Tsay junaqpitam Potifarta Dios Yaya yanaparqan. Tsaymi imaykankunapis atskayar mikuyninkunapis mas allish wayurqan. 6Josépa makinman llapan imaykanta churaykurmi Potifarqa yarpachakurqannatsu.

Joséqa kuyakuypaq buen mözum karqan. 7Tsaymi Potifarpa warmin munaparnin nirqan: <<¡Noqawan puñushun!>>

8Peru Josénam nirqan: <<Mamïta, tsaytaqa manam rurakaykullämantsu. Patronnï confiakamarmi llapan imaykanta rikänäpaq churamashqa. Tsaymi llapan imaykantapis shumaq rikaptï tranquïlu kawakun. 9Patronnïqa manam ni pitapis noqatanöqa confiakuntsu. Qamllatam warmin kaptiki makïman churamushqatsu. Tsaynö confiakaykämaptinqa ¿imanötan Dios Yayata rabyatsir mana alli rurakäman?>>

10José tsaynö niptinpis tsay warmiqa waran waranmi qatiraq. Tsaynö qatiraptinpis Joséqa mana cäsurninmi paywan puñuyta munarqantsu. 11Peru jukpunnam Joséqa rurayninkunata rurananpaq waji rurinman yaykurqan. Tsay höraqa manam ni pipis wajichö karqantsu. 12Tsaymi Potifarpa warminqa llatapapita Joséta aptakurkur nirqan: <<¡Sas kanan puñushun!>>

Tsaynö aptakurkuptinmi llatapanta llushtipuskir qeshpir aywakurqan.

13Llatapanta llushtipuskir qeshpiskiptinmi 14Potifarpa warmin serviqninkunata qayaskir nirqan: <<¡Ollqü apamunqan chöluqa manam respitamantsiktsu! Japallä kaykaptï yaykapaskamar apaykachämayta munaptinmi qayaraykacharqü. 15Tsaynöpam llatapantapis dëjaskir qeshpishqa>>.

16Tsaynö willakuskirmi Josépa llatapanta ollqun kutimunqanyaq churarätsirqan. 17Chaykuptinnam serviqninkunata willanqannölla ollquntapis willapar nirqan: <<Tsay rantimunqayki hebreo chölum cuartüman yaykapamar apaykachämayta munashqa. 18Qayaykachaptïmi llatapantapis dëjaskir qeshpishqa. 19Llapan imaykaykita rikänanpaq churanqayki alli serviqnikim tsaynö ruramashqa>>.

Josépaq tsaynö willaykuptinmi Potifar alläpa rabyarqan. 20Tsaymi Faraónpa serviqninkuna qaykuräyanqan carcelman Joséta qaykatsirqan.

21Joséta Dios Yaya yanapaptinmi#Hech. 7.9. cárcel cuidaqwanpis tantiyanakuyarqan. 22Tsaymi llapan prësukunata Josépa makinman carcelchö mandakuq churarqan. Joséraqmi prësukuna imata rurayänanpaqpis mandaq. 23Joséta Dios Yaya yanapaptinmi llapan ruranqanpis allilla karqan. Tsaymi carcelta cuidaq runaqa Josépa mandädunchö prësukunapaq yarpachakuqnatsu.

Currently Selected:

Génesis 39: qxn

Highlight

Copy