Génesis 38

Tamar qeshyakunqan

1Tsay witsaymi wawqinkunawan täkuyanqanpita Hirapa wajinman Judá aywakurqan. Hiraqa Adulam markapitam karqan. 2Tsaychö täkurmi Súa shutiyuq cananeo runapa tsurin jipashwan reqinakuskir churakarqan. 3Tsay jipash qeshyaq tikraskirmi ollqu wamrata qeshyakuskir shutin churarqan Erta. 4Tsaypita yapay ollqu wamrata qeshyakuskirmi shutin churarqan Onánta. 5Tsaypita yapay juk ollqu wamrata qeshyakuskirmi shutin churarqan Selata. Quezibchö Judá täkuykaptinmi tsay tsurinkuna yuriyarqan.

6Mayor kaq tsurin Ertam Tamar shutiyuq jipashwan Judá churarqan. 7Erqa mana alli ruraq karmi Dios Yaya munanqannötsu kawarqan. Tsaymi mana cäsukunqanpita Dios Yaya wañuskatsirqan.

8Tsaymi qepa kaq tsurin Onánta Judá nirqan: <<Hïju, wawqikipa viüdanwan churakay paychö tsuriki yuriptin wawqikipa tsurinnö kananpaq>>.#Deut. 25.5-6.

9Peru Onánmi musyarqan tsurin yurirpis wawqinpa tsurinnö kananpaq kanqanta. Tsaymi llumtsuynin viüdawan puñur mana qeshyaq kananpaq jipikuskir jukläman shututsiq. Tsaynömi rurarqan wawqinpa tsurinnö kananta mana munar. 10Tsaynö Onán ruraptinmi Dios Yaya alläpa rabyar paytapis wañuskatsirqan.

11Tsaynö ishkan tsurinkuna wañuskiyaptinnam Judáqa yarparqan tsurin Selapis Tamarwan churakaskir wañunanpaq kanqanta. Tsaymi Tamarta nirqan: <<Tsurï Sela jövinyanqanyaq taytaykipa wajillanchöraq täkuy>>.

Tsaynö niptinmi taytanpa wajinman Tamar kutikurqan.

12Tsaypita atska wata päsaskiptinnam Judápa warmin wañukurqan. Tsay warmim Súapa tsurin karqan. Warminta lütur cumpliskirnam Timnatchö üshankunata rutuykäyanqanman Judá aywarqan. Tsaymi Adulam markapita reqinakunqan Hira compañarqan.

13Timnatman üsha rutuq suegrun aywanqantam Tamar musyaskirqan. 14Tsaymi lütunqan llatapata cambiakuskir pipis mana reqinanpaq vëluwan tsapakurkur Enaim marka yaykunaman jamarqan. Tsayqa Timnatman aywana nänichömi karqan. Tsaynömi Tamar rurarqan Sela yashqa jövinna kaykaptinpis suegrun mana churaptin.

15Qaqllan tsapashqa warmi jamaykaqta rikaykurmi Judá yarparqan prostitüta kanqanta. 16Tsaymi nänipa aywar parlapaqnin yaqarqan. Llumtsuynin kanqanta mana musyarmi nirqan: <<¿Mamïta, manaku puñukuskishwan?>>

Tsaynam nirqan: <<Puñushqaqa ¿imatatan pägamanki?>>

17Judánam nirqan: <<Malta cabratam apatsimushaq>>.

Warminam nirqan: <<Apatsimunayki kaptinqa ima prendallatapis jaqipamay>>.

18Judánam nirqan: <<¿Imata jaqipunaqtatan munanki?>>

Tsaynam nirqan: <<Watuntin sëlluykita y aptaranqayki tukruta jaqipamay>>.

Tsaynö niptinmi prendata jaqipuykur paywan puñurqan. Tsaynöpam Tamar qeshyaq tikraskirqan. 19Tsaypita Tamar wajinpa kutiskirnam shukuranqan vëlunta jipiskir lütu llatapanta yapay shukukurqan.

20Judánam amïgun Hirawan mallwa cabrata apatsirqan prenda jaqipunqanta qorimunanpaq. Cabrata aparkur aywarmi tsay warmita tarirqannatsu. 21Tsaymi tsay markachö täkuq runakunata tapukurqan: <<Taytakuna, tapukuyälläshayki. Kay Enaim markaman yaykunachö jamaraq prostitütata ¿rikäyällashkankiku?>>

Tsaymi tsaychö täkuq runakuna niyarqan: <<Kaychöqa manam ni pï prostitütatapis rikäyashkätsu>>.

22Runakuna tsaynö niyaptinmi Judá kaqpa kutiykur willarqan: <<Manam tsay warmita tarishkätsu. Tsaychö täkuqkunam niyämashqa tsaychöqa ni imaypis prostitüta mana kanqanta>>.

23Tsaymi Judá nirqan: <<Mana tariykaptikiqa imanäshuntan. Yapay ashishqaqa runakunach asipämäshun. Prenda jaqipamunqäkunata jina apatsunpis>>.

24Tsaypita kimsa killa päsaskiptinnam runakuna shamuykur Judáta niyarqan: <<¡Llumtsuyniki Tamarqa juk ollquwan kaskirmi qeshyaq kaykan!>>

Judánam alläpa rabyar nirqan: <<¡Tsaynö warmitaqa wajinpita jipiskir kayayay!>>

25Peru Tamarnam wañutsiyänanpaq apaykäyaptin suegrun Judáman willakatsirqan: <<Kay prenda katsinqäpa ämunpatam qeshyaq kaykä. Reqiyay watuntin sëllu y tukru pipa kanqantapis>>.

26Tsayta rikaykurmi kikinpa kanqanta reqiskir Judá nirqan: <<Payqa manam jutsayuqtsu. Noqam jutsayuq kä tsurï Selawan mana churanqäpita>>.

Tsay junaqpitam Judáqa llumtsuyninwan imaypis puñurqannatsu.

27Killan paqtaskiptinmi millïshuta Tamar qeshyakurqan. 28Qeshyakur ñakaykaptinmi jukaq wamrapa makin yarqaskamuptin puka jïluta watarkur partëra nirqan: <<Kay kaqmi mayor kanqa>>.

29Peru jina höram makinta kutiskatsirqan. Tsaypita wawqin puntata yuriskiptinmi partëra nirqan: <<¡Kayqa imanöparaq jukaqta llallimushqa!>>

Puntata yurinqanpitam tsay wamrapa shutin churarqan Faresta#38.29 Fares ninanqa kichaq ninanmi.. 30Tsaypitaraqmi puka jïluwan makin watashqa kaqqa yurirqan. Tsay wamrapa shutinmi churarqan Zarata#38.30 Zara ninanqa atsikyaq ninanmi. Tsaynö shutin churarqan puka jïluwan watashqa kanqanpitam..

Currently Selected:

Génesis 38: qxn

Highlight

Copy