Génesis 31

Labánpita Jacob qeshpinqan

1Tsaypitanam Jacob wiyarqan Labánpa tsurinkuna rimarnin niyanqanta: <<Jacobqa taytantsikpa llapan imaykanta duëñükurmi rïcuyashqa>>.

2Tsaynöllam Jacob tantiyarqan suegrun Labánpis piñashqa purir ñawpatanönatsu rikanqanta. 3Tsaypitanam Jacobta Dios Yaya nirqan: <<Taytayki y aylluykikuna täkuyanqanman kutikuy. Qamwanmi imaypis kaykäshaq>>.

4Dios Yaya tsaynö niptinmi Raquelta y Leata Jacob qayatsirqan mitsikunqan jirkaman. 5Chaykuyaptinmi nirqan: <<Taytaykikuna noqawan piñashqa puriykanqantam tantiyashkä. Tsaynö kaptinpis taytä creyikunqan Dios manam dëjamashqatsu. 6Musyayanqaykinöpis taytaykitam llapan voluntänïwan arupashkä. 7Peru tsaynö arupaykaptïpis atska kuti engañamarmi parlayanqänötsu pägamashqa. Tsaynö ruraykämaptinpis Dios Yayam yanapamashqa. 8Tsaymi <arupämanqaykipita pägashayki yana muru üshakunawan> nimaptinqa llapan llullukunapis yana murullana yuriyarqan. Tsaynöllam <räya räya yuriqkunawan pägashayki> nimaptin llapan llullukunapis räya räyallana yuriyarqan. 9Tsaynöpam taytaykipa üshankunata Dios Yaya entregamashqa.

10<<Wätakuna calentanqan witsaymi sueñuynïchö rikashkä räya räya chïvukuna, yana muru chïvukuna y yuraqyuq chïvukuna cabrakunata tsariykäyaqta. 11Tsay sueñuynïchömi Dios Yayapa angelnin qayamar nimarqan: <¡Jacob!> Qayamaptinmi <¿imallatatan, Taytay?> nirqä.

12<<Tsaymi Dios Yayapa angelnin nimarqan: <Rikaykämi Labán sufritsishunqaykita. Tsaymi permïtishkä llapan yayankuna räya räya, yana muru y yuraqyuqlla kayänanpaq. Tsayta rikar shumaq tantiyakuy. 13Noqam kä Bet-elchö yuripushuqniki Dios. Tsaychömi rumita jawiykurnin aceitita wiñar änimarqayki servimänaykipaq.#Gén. 28.18-22. Kananqa yurinqayki Canaánman kutikuy> >>.

14Raquelwan Leanam niyarqan: <<Noqakunataqa manam ni ima herenciatapis taytäkuna rakipayämanqatsu. 15Tsaynöllam payqa fëraman churarayämar rantikayämashqa. Noqakuna rayku arupanqaykitapis mana rakipayämarmi kikillan ushashqa. 16Taytäpa üshankunata Dios Yaya makikiman churamunqanmi noqantsikpaq y wamrantsikkunapaq kaykan. Tsaymi Dios Yaya nishunqaykinölla llapanta ruray>>.

17-18Tsaymi Jacob alistakurqan taytan Isaac täkunqan Canaánman kutikunanpaq. Llapan imaykanta chaqnakurkur tsurinkunata y warminkunata camëlluman montarkatsirmi Padan-aramchö arunqanpita tarinqan wätakunatapis qatikurkur aywakurqan. 19Suegrun Labán millwa rutuq aywanqanyaqmi Jacob aywakurqan. Raquelnam taytanpa ïdulunkunata suwaypa aparqan. 20Suegrun Labánta mana willarllam Arampita Jacob aywakurqan. 21Llapan kikinpa kaqta apakurkurmi qeshpir aywakurqan. Tsaymi Éufrates mayuta päsar Galaad jallqakunapa aywarqan.

Jacobta Labán qatipanqan

22Tsaypita kimsa junaqtaraqmi Labán musyarqan Jacob qeshpir aywakunqanta. 23Tsaymi ayllunkunata minkakuskir Jacobta qatipäyarqan. Qanchis junaqtaraqmi Galaad jallqakunachö taripäyarqan. 24Taripänanpaq paqasmi sueñuyninchö Labánta Dios Yaya nirqan: <<Cuidädutaq Jacobta piñapankiman>>.

25Galaad jallqakunachö Jacob patsakushqa kaykaptinmi Labán tariparqan. Tsaychömi Labánpis ayllunkunawan patsakuyarqan. 26Jacobtanam Labán nirqan: <<¿Imatatan rurakaykanki? ¿Imanirtan mana willamar qeshpimushkanki? Guërrapita prësu apaqnö ¿imanirtan tsurïkunata apamushkanki? 27¿Imanirtan qeshpir upällalla shamushkanki? Willamar aywakamuptikiqa fiestata rurarmi panderëtakunata, arpakunata töcar kushishqa despachamuqman karqan. 28Tsurïkunata ni willkäkunata mutsar despidikunalläpaqpis willamashkankitsu. ¡Tsaytaqa upanömi rurakashkanki! 29Tsaynö rabyatsimanqaykipitam imaykatapis ruraskiqman karqan. Peru taytayki creyikunqan Diosmi nimashqa: <Cuidädutaq Jacobta piñapankiman>. 30Taytaykipa wajinman kutikurpis ¿imapaqtan diosnïkunata suwamushkanki?>>

31Jacobnam nirqan: <<Tsurikikunata qechumänaykita mantsakurmi upällalla qeshpir aywakayämushkä. 32Diosnikitaqa manam suwamushkätsu. Mayqanpis diosnikita apamushqa karqa wañutsun. Llapan aylluntsikkunapa puntanchö ashikuskiy. Qampa kaqta imatapis taripayämarqa kutitsikuy>>.

Jacobqa manam musyarqantsu diosninkunata Raquel suwamunqanta.

33Tsaynö niptinmi Jacobpa carpan rurinman Labán yaykurqan diosninkunata ashinanpaq. Tsaychö mana tarirmi tsurin Leapa carpanmanpis ashiq yaykurqan. Tsaypitanam ishkay wätay kaq warmikunapa carpankunamanpis yaykurqan. Tsaychöpis mana tarirmi Raquelpa carpanman ashiq aywarqan. 34Raquelnam tsay dioskunata camëllupa sillan qopinman pakaykur jananman jamakuykurqan. Tsaynöpam Labánqa entëru carpata ashirpis tarirqantsu.

35Raquelnam taytanta nirqan: <<Taytay, ama rabyakuytsu kay jamaykanqäpita mana shäriptï. Costumbrïwanmi kaykä>>.

Tsaymi Labán mayjina ashirpis ïdulunkunata tarirqantsu.

36Tsaynö ashirpis mana tariptinmi Jacob rabyar Labánta nirqan: <<¿Imatatan mana allita rurashkä? ¿Ima jutsatatan rurashkä tsayläya rabyashqa qatipämänaykipaq? 37Llapan imaykätam tikran tikran ashishkanki. Tsaynö ashirpis qampa kaqta ¿imatatan tarishkanki? Tarishqa karqa aylluntsikkunapa puntanman churamuy. Paykunam nimäshun mayqantsikpis rasun kaqta parlaykanqantsikta.

38<<Ishkay chunka (20) watantin wätaykikunata rikaptï manam üshaykikuna, cabraykikuna jukllayllapis shulluyashqatsu. Tsaynöllam ni juk carnërullatapis mikunäpaq pishtashkätsu. 39Manam imaypis chucaru wätakuna wañutsinqanta apapamushkaqtsu. Tsaypa rantinmi kikïpa kaqta rantinta churashkä. Wätaykikunata suwakuna paqaspa o junaqpa apayaptinpis llapanpitam rantinta mañamashkanki.

40<<Junaqpa achachaywan y paqaspa alalaywan alläpa sufrirmi wätaykikunata mitsishkä. Puñuytapis manam tarishkätsu. 41Ishkan warmi tsurikikuna raykum chunka chusku wata arupashkaq. Wätayki rayku soqta wata mas aruparnikim ishkay chunka (20) wata podernikichö kashkä. Atska kuti engañamarmi wätaykikunata mitsinqäpitapis parlanqantsiknötsu pägamashkanki. 42Awilü Abrahamwan taytä Isaac creyikunqan Dios Yaya mana yanapamaptinqa ni imannaqtam qarqamankiman karqan. Alläpa sufrir arunqäpitam Dios Yaya yanapamashqa. Tsaymi qanyan paqaspis sueñuynikichö piñapäshushkanki>>.

Labánwan Jacob prometinakuyanqan

43Jacob tsaynö niptinmi Labán nirqan: <<Rasun kaqtaqa kay warmikunaqa tsurïkunam y wamrakunapis willkäkunam kayan. Llapan wätakunapis wätäkunapa wawanmi kayan. Kaychö llapan rikanqaykim noqallapita kayan. Tsaynö kaykaptinpis tsurïkuna y willkäkuna raykum ni imanäyäshaykitsu. 44Masbien pactuta rurashun qampis y noqapis cumplinapaq>>.

45Tsaynö niptinmi shuytu rumita señalpaq Jacob jawirqan. 46Tsaymi llapan ayllunkunata nirqan: <<Rumikunata qoriyämuy>>.

Tsaymi rumita qorirnin montunayarqan. Tsay montunayanqan rumi lädunchömi mikuyarqan. 47Tsaypitam Labánqa kikinpa idiömanchö tsay sitiuta shutitsirqan Jegar Sahaduta. Jacobnam kikinpa idiömanchö shutitsirqan Galaad.#31.47 Tsay shutikunaqa testïgu rumi montunashqa ninanmi.

48Tsaymi Labán nirqan: <<Kanan kay muntunanqantsik rumikunam señal kanqa prometinakunqantsikta imaypis cumplinapaq>>.

Tsaypitam tsay sitiupa shutin karqan Galaad.

49Tsaynömi jukaq shutinpis churarqan Mizpa.#31.49 Mizpa ninanqa rikachakuna törri ninanmi. Tsay shutita churarqan Labán kaynö ninqanpitam: <<Kananpita manana rikänakushqapis Dios Yayam rikämäshun imanö kanqantsikta. 50Tsurïkunata maqaptiki o paykunapa jananman juk warmiwan churakaptiki mana musyaptïpis Dios Yayam juzgashunki>>.

51Mastam Labán nirqan: <<Kaychömi kaykan rumikunata muntunanqantsikwan jawinqantsik shuytu rumipis. 52Tsaykunam señal kanqa kanan prometinakunqantsikta imaypis cumplinapaq. Kananpitaqa qampis ni noqapis ama päsapunakushuntsu ni imatapis yatapunakushuntsu. 53Prometinakunqantsikta mana cumplishqaqa awiluyki Abraham y awilü Nacor creyikuyanqan Diosmi juzgamäshun>>.

Tsaymi Jacobpis taytan Isaac adoranqan Dios Yayapa shutinchö änirqan willanakuyanqanta imaypis cumplinanpaq.

54Tsaypitam wätakunata pishtaskir wiranta Dios Yayapaq Jacob waykarqan. Aytsatanam llapan ayllunkunawan mikuyarqan. Paykunam jallqallachö puñuyarqanpis.

55 55 (32.1) Patsa waraskiptinmi llapan willkankunatawan tsurinkunata Labán mutsarqan. Tsaypitanam alli kawayänanpaq bendicionta churaykur markanpa kutikurqan.

Currently Selected:

Génesis 31: qxn

Highlight

Copy