Génesis 27

Jacobman Isaac bendicionninta churanqan

1Awkinyar qaprayäkushqana karmi Isaac reqikurqannatsu. Jukpunnam mayor tsurin Esaúta qayaykur nirqan: <<Wamrallä Esaú>>.

Esaúnam nirqan: <<¿Imallatatan, taytay?>>

2Tsaymi Isaac nirqan: <<Noqaqa alläpa awkinnam kä. Talvezqa wañukushaqnach. 3Flëchaykita aparkur jirkapa ayway chucaru wätakunata flëchaskir apamunaykipaq. 4Tsay apamunqaykipita yachanqä mikuyta kusinaskir qaramay. Tsayta mikuskirnam manaraq wañukur bendicionnïta qamman churamushaq>>.

5Esaúta taytan tsaynö ninqantam Rebeca wiyarqan. Tsaymi chucaru wätakunata apamunanpaq Esaú aywaskiptin 6Jacobta Rebeca nirqan: <<Wawqiki Esaúta taytayki parlapanqantam wiyarqü. 7Paytam mañashqa chucaru wätata apaskamur yachanqan mikuyta kusinapänanpaq. Tsayta mikuskirshi Dios Yayapa shutinchö bendicionninta churanqa. 8Hïju, kanan yätsinqaqta shumaq wiyamay. 9Saslla aywar cabrantsikkunapita ishkay allin kaq mallwa cabrata apamuy. Tsay aytsapitam taytayki yachanqan mikuyta kusinashaq. 10Tsayta kusinaskiptïmi taytayki mikunanpaq apanki. Tsayta mikuskirmi manaraq wañukur bendicionninta qamman churamunqa>>.

11Tsaynö niptinmi mamanta Jacob nirqan: <<Noqapaqa manam wawqï Esaúpanötsu entëru cuerpü millwa püru.#Gén. 25.25. 12Taytä yatamar engañaykanqäta tantiyaskirqa bendicionninta churamunqanpa rantinmi maldicionämanqa>>.

13Tsaymi maman nirqan: <<Hïju, taytayki maldicionäshuptikiqa noqaman chämutsun. Ninqaqnölla sas aywar mallwa cabrakunata apamuy>>.

14Maman tsaynö niptinmi Jacob aywar ishkay malta cabrakunata apamurqan. Tsaytanam Isaac yachanqan mikuyta Rebeca kusinarqan. 15Tsaypitanam Esaúpa alli kaq llatapan churaraqpita Jacobta shukutsirqan. 16Tsaynöllam taytan mana tantiyananpaq mallwa cabrakunapa qaratsanta rikranman y kunkanman lashtaparqan. 17Kusinaskirnam tantantinta mikuyta alistaparqan taytanman apananpaq.

18Taytan kaqman chaykurmi Jacob nirqan: <<¡Taytay!>>

Tsaynam Isaac nirqan: <<Hïju, ¿imallatatan? ¿Mayqan kaq tsurïtan kanki?>>

19Tsaymi Jacob nirqan: <<Taytay, noqaqa mayor tsuriki Esaúmi kä. Nimanqaykitam kusinakamurqä. Shärimuy achkumunqä wätapa aytsanta mikuskir bendicionnikita noqaman churaykamunaykipaq>>.

20Tsaymi Isaac tapurqan: <<Hïju, ¿imanönatan saslla chucaru wätata achkuskamuruyki?>>

Tsaynö niptinmi Jacob nirqan: <<Diosniki yanapamaptinmi saslla tarimushkä>>.

21Tsaymi Isaac nirqan: <<Rasunpa Esaú kanqaykita musyanäpaq witimuy>>.

22Tsaynö niptinmi taytanpa lädunman Jacob witiykurqan. Taytan yataykurnam nirqan: <<Vozninqa Jacobpanömi, peru rikranmi sïqa Esaúpa>>.

23Esaúpa rikrannö millwashqa kaptinmi yataykarpis tantiyarqantsu Jacob kanqanta. Bendicionninta churananpaq kaykarnam 24yapay tapurqan: <<¿Rasunpaku tsurï Esaú kanki?>>

Tsaymi nirqan: <<Taytay, rasunpam Esaú kä>>.

25Tsaynö niptinmi taytan nirqan: <<Hïju, achkumunqayki wätapa aytsanta qaraykallämay. Mikuskirnam bendicionnïta qamman churamushaq>>.

Tsaymi mikuyta y vïnuta Jacob makyaykuptin Isaac mikurqan y upyarqan. 26Mikuyta ushaskirnam nirqan: <<Hïju, witiykamur mutsaykamay>>.

27Tsaynam witiykur mutsaykuptin Esaúpa llatapanpa mushkuyninta Isaac muskirqan. Tsaymi Esaú kanqanta yarpar bendicionninta churar nirqan:

<<Kayqa tsurïpa mushkuyninmi.

Dios Yaya bendicionninta churanqan jallqa chakranömi mushkunpis.

28Qam täkunqaykiman Dios Yaya tamyaykatsimutsun.

Qoriytapis mana puëdinqaykiyaq murukunqaykipis wayuykullätsun.

Trïguykipis vïnuykipis maytsika kaykullätsun.

29Qamtaqa atska runakunam serviyäshunki.

Tsaynölla llapan nación runakunapis puntaykiman qonqurikuyätsun.

Aylluykikunapis mandäduykichö kayätsun.

Paykunapis puntaykiman qonqurikuyätsun.

Pipis maldicionäshuqnikiqa maldicionashqam kanqa.

Bendisishuqnikim sïqa bendisishqa kanqa>>.#Gén. 12.3; Heb. 11.20.

30Bendicionta chaskiskir Jacob yarquskiptillannam Esaúqa charqan achkumunqan chucaru wätan aparishqa. 31Paypis taytan yachanqan mikuyta kusinaskirnin aparmi nirqan: <<Taytay, shärimuy kusinakamunqä mikuyta mikuskir bendicionnikita noqaman churaykallämunaykipaq>>.

32Tsaynam Isaac tapurqan: <<Hïju, ¿mayqan kaq tsurïtan kanki?>>

Esaúnam nirqan: <<Taytay, mayor kaq tsuriki Esaúmi kä>>.

33Tsaymi Isaacqa alläpa karkaryarraq nirqan: <<Tsaypunqa ¿pitan chucaru wätata achkuskamur kusinamushqa? Tsay mikuytam llapanta mikushkä manaraq chämuptiki. Tsay mikuyta apamuqmi llapan bendicionnïta chaskishqa>>.

34Taytan tsaynö niptinmi Esaú alläpa qayaraykachar nirqan: <<Taytay, noqamanpis bendicionnikita churaykallämuy>>.

35Isaacnam nirqan: <<Wawqikim engañamashqa. Qamman bendicionta churanäpaq kaqtam payman churashkä>>.

36Tsaymi Esaú nirqan: <<Tsaynö kananpaqchi Jacob#27.36 Jacob ninanqa ankuta aptan ninan y engañakuq ninanmi. shutin kananpaq churarqayki. Kananwanqa ishkay kutinam engañamashqa. Puntatanam mayor kay derëchüta qechumashqa.#Gén. 25.29-34. Kananpis noqapaq kaq bendiciontam chaskishqa. ¿Manaku wallkallapis bendición quëdashqa noqaman churaykallämunaykipaq?>>

37Isaacnam nirqan: <<Hïju, Jacobtanam nishkä qamwan llapan aylluykikunapis mandädunchö kayänaykipaq. Tsaynöllam nishkä trïgunwan üvanpis atska kananpaq. Hïju, qammanqa ¿ima bendicionllataraq churaykamümanpis?>>

38Esaúnam yapay nirqan: <<¿Taytay, manaku jukllayllatapis bendicionta churaykamunkiman? Noqamanpis bendicionnikita churaykallämuy>>.

Tsaynö nirmi taytanta alläpa waqaparqan.#Heb. 12.17.

39Tsaymi Esaúta Isaac nirqan:

<<Mikuy mana wayunqan chakrachö y tamya mana tamyanqanchömi täkunki.

40Espädaykiwan defendikurmi kawanki.

Wawqikipa mandädunchömi kanki.

Tsaynö kaykarpis mas poderyuq tikrarmi mandädunpita yarqukunki>>.#Heb. 11.20.

Esaúpita Jacob qeshpir aywakunqan

41Taytan bendicionta churanqan junaqpitam Jacobta Esaú alläpa chikirqan. Tsaymi yarparqan: <<Taytä wañuskiptinmi wawqï kaptinpis wañuskatsishaq>>.

42Esaú tsaynö yarpanqanta musyaykurmi Jacobta qayaskatsir Rebeca nirqan: <<Wawqiki Esaúmi wañutsishunaykipaq juraykäshunki. 43Hïju, yätsinqaqta shumaq wiyamay. Haránchö tiyuyki Labán kaqpa qeshpir sas aywakuy.#Gén. 24.28-30; 28.1-2. 44Pay kaqllachö täkunki wawqikipa rabyaynin päsanqanyaq. 45Rabyaynin päsaskiptinmi kutimunaykipaq qayatsimushayki. ¡Manam munätsu ishkan wawäkunata juk junaqllachö oqraskiyta!>>

46Tsaypitanam ollqun Isaacta Rebeca nirqan: <<Esaúpa warminkunata mana rikänä rayku jina wañuküman. Kay Canaánchö heteo warmikunata Jacob ashiptinqa ¿imapaqnatan kawashaqpis?>>

Currently Selected:

Génesis 27: qxn

Highlight

Copy