Génesis 21

Isaac yurinqan

1 Dios Yaya Abrahamta äninqanta cumpliptinmi Saraqa qeshyaq karqan. 2Tsaymi Abraham awkinna kaykaptinpis Dios Yaya cïtanqan killachö ollqu wamrata Sara qeshyakurqan.#Heb. 11.11-12. 3Sara qeshyakuskiptinmi Abrahamqa tsurinpa shutin churarqan Isaacta. 4Yurinqanpita pusaq junaqyuq kaykaptinmi Dios Yaya ninqannölla tsurinpa penqayninchö señalarqan.#Gén. 17.12; Hech. 7.8. 5Abraham pachak (100) watayuq kaykaptinnam tsurin Isaac yurirqan.

6Tsaynam Sara yapay nirqan: <<Wawayuq kanäpaq Dios Yaya willamaptinmi asikushkä.#Gén. 18.12-15. Wakin kaq runakunapis wawayuq kanqäta musyarmi kushikur asikuyanqa. 7¡Piraq Abrahamta ninman karqan wawayuq kanäpaq kanqanta! Qojä awkinna kaykaptinpis wawayuqmi kaykä>>.

Agarta wawantawan Abraham qarqunqan

8Isaac jatunyarkuptinnam maman waqtsarqan. Tsay junaqmi Abraham kushikur fiestata rurarqan. 9Tsay junaqmi Isaacta burlakurnin Agarpa wamran Ismael pukllapaykaqta Sara rikarqan. 10Tsaymi Abrahamta Sara nirqan: <<¡Tsay servikuqtaqa wawantinta sas qarquy! Tsay warmipa wawanqa manam wawä Isaacwan herenciata rakipunakuyanmantsu>>.#Gál. 4.30.

11Tsaynö niptinnam Abrahamqa alläpa llakikurqan Ismaelpis tsurin kaptin. 12Tsaymi Abrahamta Dios Yaya nirqan: <<Tsuriki Ismaelpaqwan serviqniki warmipaqqa ama llakikuytsu. Qamta prometinqaqmi tsuriki Isaacpaq y paypita miraqkunapaq. Tsaynö kaykaptinqa Sara nishunqaykita ruray.#Rom. 9.7; Heb. 11.18. 13Serviqnikipa wamran Ismaeltapis tsuriki kaptinmi atskaman mirar jatun nación kananpaq permïtishaq>>.

14Dios Yaya tsaynö niptinnam Abrahamqa waränin atsik atsiklla Agarta millkapar tantatawan yakuta previniparqan. Tsaykunata aparkatsirmi wamrantawan despacharqan. Tsaymi Beerseba desiertuman chaykur wamranwan Agar oqrakashqa purirqan. 15Apanqan yaku ushakaskiptinmi wamranta jacha chakinchö dëjaykurqan. 16Yakunaywan wañuqta rikayta mana munarmi karuman aywaskir jamaräkurqan. Maman karuchö jamaptinmi wamra alläpa waqarqan.

17Wamra waqanqanta wiyarmi Dios Yayapa angelnin ciëlupita qayakamur nirqan: <<¿Imanankitan, Agar? Ama mantsakaytsu. Dios Yayam wiyashqa wawayki waqanqanta. 18Kutir wawaykita shoqarnin ama dëjaytsu. Paypita juk nación mirananpaqmi bendisishaq>>.

19Tsaypitam Agarta Dios Yaya rikätsirqan pukyuchö yaku kaykaqta. Tsaymi yaku puritsikunan bolsaman wiñarkur wamrata upyatsirqan. 20Dios Yaya yanapaptinmi wamra alli wiñarqan. Desiertuchö täkurmi flëchawan wätakuna wañutsiyta yachakurqan. 21Paykunam Parán desiertuchö täkuyarqan. Jatunyarkuptinnam Egiptupita jipashwan maman churarqan.

Abrahamwan Abimelec pactuta rurayanqan

22Tsay witsaymi rey Abimelec#Gén. 26.26. soldädunkunapa capitannin Ficolwan aywayarqan Abrahamwan parlaq. Chaykurnam niyarqan: <<Llapan imayka ruranqaykichö Dios Yaya yanapashunqaykitam tantiyashkä. 23Tsaymi kanan shamushkä shumaq willanakunapaq. Taytay, Dios Yayapa shutinchö jurar änimay noqawan alli kawakunqaykinölla tsurïkunawan y paykunapita miraqkunawanpis alli kawakunaykipaq. Tsaynölla kaychö täkuqkunawanpis alli kawaykullay>>.

24Tsaynam Abraham nirqan: <<Diospa shutinchö jurarmi prometiq nimanqaykinö kananpaq>>.

25Tsaypitanam Abimelecta Abraham nirqan: <<Serviqnïkuna uchkuyäyanqan pözutam serviqnikikuna qechuyämashqa>>.

26Tsaymi Abimelec nirqan: <<Taytay, tsaytaqa manam kananyaq musyashkätsu. Qampis manam willamashkankitsu. Manam musyätsu ni mayqan serviqnï tsayta ruranqanta>>.

27Tsaynö parlaskirmi Abraham Abimelecta üshakunatawan cabrakunata y wäkakunata qararqan. Tsay junaqmi Abrahamwan Abimelec pactuta rurayarqan imaypis shumaq päsakuyänanpaq. 28Tsaynöllam üshankunapita qanchis masta Abraham rakirqan. 29Tsaynö rakiqta rikarmi Abimelec tapurqan: <<¿Imapaqtan kay qanchis üshakunata rakiruyki?>>

30Tsaymi Abraham nirqan: <<Kay qanchis üshakunatam rakirqü chaskimaptiki tsay pözupa duëñun kanqäta pïmaypis musyayänanpaq>>.

31Tsaychö pactuta rurayanqanpitam tsay sitiupa shutin churayarqan Beerseba#21.31 Beerseba ninanqa Juramentu Pözu ninanmi. shutin kananpaq. 32Beersebachö pactuta ruraskirmi Abimelecwan Ficol filisteo runakuna täkuyanqan partiman kutikuyarqan. 33Beersebachömi Abraham plantarqan tamarisco jachata.#21.33 Tsay jachatam plantarqan Dios Yaya yanapanqanta yarparänanpaq. Tsaychömi mana imay ushakaq Dios Yayata mañakur adorarqan. 34Abrahamqa atska watam filisteo runakuna täkuyanqan sitiuchö täkurqan.

Currently Selected:

Génesis 21: qxn

Highlight

Copy