1 Timoteo 5

Creyikuq majinkunata respitananpaq yätsinqan

1Awkinkunata ama piñapaytsu. Masbien imayka taytaykitanö respitar alli shimillaykipa tantiyatsiy. Jövinkunatapis wawqikitanö shumaq tantiyatsiy. 2Chakwankunatapis imayka mamaykitanö respitarnin tantiyatsiy. Tsaynölla jipashkunatapis panikitanö respitay.

Viüdakunata yanapayänanpaq ninqan

3Ayllunnaq viüdakunata imaykallawanpis yanapayay. 4Peru mayqan viüdapapis wawankuna o willkankuna karqa paykuna yanapayätsun. Kuyar wätanqanta ama qonqäyätsuntsu. Tsaynö yanapaptinmi Dios Yaya kushikun.

5Ayllunnaq kaq viüdakunaqa Dios Yayaman creyikurmi paqasta junaqta mañakuyan. 6Peru wakin viüdakunam sïqa munanqannö purikur imayka wañushqanö kaykäyan.

7Viüdakunata ayllunkuna yanapayänanpaq wawqikunata y panikunata yachatsiy. Yanapayaptinqa manam ni pipis musyapäyanqatsu. 8Mamanta, awilanta y wajinchö täkuqkunata mana yanapaptinqa Dios Yayaman creyikunqanpis manakaqllapaqmi kanqa. Dios Yayata mana cäsukuqkunapitapis mas peormi kanqa.

9Viüdakunapa shutinkunata soqta chunka (60) watayuq kayaptinraq listaman churay. Tsaynöllam kayanman juk ollqullawan täkushqa, 10allita rurayanqanpita shumaq respitashqa, wamrankunata shumaq wätashqa, wajinman chaqkunata patsatsiq, Diosman creyikuqkunata llapan shonqunwan yanapaq, waktsakunata llakipaq y allita ruraq.

11Peru manaraq soqta chunka (60) watayuq viüdakunataqa listaman amaraq churankitsu. Paykunaqa mana ollqükuypa Jesucristuta serviyänanpaq prometiskirpis ollquyuq kaytam yapay munayan. 12Tsaymi juk ollquwan kakurnin Jesucristuta prometiyanqantapis mana cumplir jutsayuq kaykäyan. 13Alläpa qeläkurmi ima rurayninkunatapis dëjaskir wajin wajin purikuyan. Tsaynöllam runapa washan rimar y imaykamanpis mëtikurnin manakaqkunata parlar puriykäyan.

14Tsaynö mana kayänanpaq jipashllaraq viüdakunaqa ollquwan yapay churakar wawankunata shumaq wätayätsun y wajinchö imayka rurayninkunata rurayätsun. Tsaynö kawayaptinqa contrantsik kaqkunapis manam musyapämäshuntsu. 15Wakin kaq viüdakunaqa Jesucristuman creyikuyanqanta dëjaskirmi Satanás munanqannöna kawayan.

16Mayqan [wawqipa o] mayqan panipa ayllunchö viüda kaptinqa paykuna wätayätsun. Tsaynöpam wawqikuna y panikuna qoriyanqan paqtanqa ayllunnaq kaq viüdakunata yanapayänanpaq.

Mayor wawqikuna shumaq rikashqa kayänanpaq ninqan

17 Mayor wawqikuna Diospa willakuyninta willakuyaptin y yachatsiyaptin respitar alli pägayätsun. Tsaynölla llapanpis mayor wawqikunata alli mandayaptin respitar pägayätsun. 18Dios Yayapa palabranmi nin: <<Ërachö trïguta jarutsir töruta ama shinqawiyankitsu>>.#Deut. 25.4. Tsaynöllam nin: <<Arupukuq runata ama dembaldillaqa arutsinkitsu>>.#Mat. 10.10; Luc. 10.7.

19Mayor wawqi jutsata ruranqanta ishkaq o kimsaq niyäshuptikiraq cäsunki. Juk runalla niptinqa ama cäsunkitsu.#Deut. 17.6; 19.15. 20Jutsa rurayta mana dëjaptinqa llapanpa puntanchö piñapanki. Tsaynö piñapaptikim wakinpis mantsakur jutsata mana rurayänanpaq tantiyakuyanqa. 21Dios Yayapa, Señor Jesucristupa y payta serviq angelkunapa puntanchömi qamta niq: Pipapis favornin mana shärir kay ninqaqkunata cumplinki.

22Mayor wawqi kananpaq pipa umanmanpis sasllaqa makikita ama churankitsu. Jutsa ruraqta churarqa qampis jutsayuqmi kanki. Kikikipis Dios Yaya munanqannölla kawakuy.

23Pacha nanaywan jinalla qeshyarqa yakullata upyanqaykipa rantin vïnuta ichik upyarkunki.

24Wakin kaq runakuna jutsata rurayanqanqa manaraq tapukuptikim saslla musyakan. Peru wakin runakuna jutsata rurayanqanmi sïqa tsaypitaraq musyakan. 25Tsaynöllam wakin runakuna allita rurayanqanpis saslla musyakan. Peru wakinpam sïqa tsaypitaraq musyakan.

Currently Selected:

1 Timoteo 5: qxn

Highlight

Copy