1 Juan 3

Dios Yayapa wamrankuna kanqantsik

1¡Tantiyakuyay! ¡Dios Yayaqa alläpam kuyamantsik! Kuyamarnintsikmi <<wamräkunam kayanki>> nimantsik.#Juan 1.12. Rasunpam wamrankuna kaykantsik. Peru wamrankuna kanqantsiktaqa mana creyikuqkuna manam tantiyayantsu. Dios Yayata mana reqirmi paykunaqa tantiyayantsu.

2Kuyashqa wawqikuna y panikuna, Dios Yayapa wamran kanqantsikta kanan musyarpis manam musyantsikraqtsu imanö kanapaq kanqanta. Peru tsaynö kaykaptinpis musyantsikmi Jesucristo kutimuptin paywan tinkur kikin rikuqman tikranapaq kanqanta.#Fil. 3.21. 3Tsaynö kanapaq kanqanta shuyaykarqa Jesucristo jutsannaq püru kanqannö noqantsikpis jutsannaq püru kashun.

4Pipis jutsata rurarqa Dios Yayapa leyninkunata manam cäsuntsu. 5Musyantsikmi jutsannaq kanapaq Jesucristo kay patsaman shamunqanta. Payqa manam imaypis jutsata rurashqatsu. 6Tsaymi Jesucristupa poderninchö kawaqkunaqa jutsa rurayta dëjayan. Jutsa rurayta mana dëjaqkunaqa Jesucristuta manam chaskiyantsu ni reqiyantsu.

7Kuyay wamräkuna, pipis <<Dios Yayatam cäsukü>> nirqa Jesucristunömi allikunata rurar kawanman. <<Cäsukümi>> nikar jutsata ruraptinqa yachatsiyäshunqaykita ama chaskiyaytsu. 8Jutsa rurayta mana dëjaq kaqqa diablupa poderninchömi kayan. Diabluqa kay patsa qallanqanpitam jutsata ruran. Diablu ruranqankunata ushakätsinanpaqmi Dios Yayapa Tsurin Jesucristo shamushqa.#Heb. 2.14-15.

9Dios Yayapa wamran kaqkunaqa mananam jutsata rurayannatsu, sinöqa Dios Yaya munanqannönam kawayan. Dios Yayapa wamran karmi jutsa rurayta dëjayan. 10Pipis jutsata rurar runa majinta chikirqa manam Diospa wamrantsu, sinöqa diablupa wamranmi. Tsaynöpam musyantsik Diospa wamran pï kanqanta y diablupa wamran pï kanqantapis.

Pïmaywan kuyanakunapaq ninqan

11Juknin jukninwan kuyanakunapaq kanqantaqa unaypitanam musyantsik.#Juan 13.34; 15.12. 12Ama Caínnöqa kashuntsu. Payqa diablupa mandädunta rurarmi wawqin Abelta wañutsirqan.#Gén. 4.8. ¿Imanirtan wañutsirqan? Kikinpa rurayninkuna mana alli kaptin y wawqinpa rurayninkuna alli kaptinmi wañutsirqan.

13Kuyashqa wawqikuna y panikuna, musyantsikmi jutsa ruraq runakuna chikimanqantsikta. 14Tsaynöllam musyantsik wañushqanö kanqantsikpita mana ushakaq kawaytana tarinqantsikta. Wawqikunawan y panikunawan kuyanakur kawarmi tsayta musyantsik.#Juan 5.24. Mana kuyakuq kaqqa wañushqanömi kaykan. 15Llapanpis runa majinta chikiqkunaqa wañutsikuqnömi kaykäyan. Musyanqantsiknömi wañutsikuqkunaqa Dios Yayapa puntanman chäyanqatsu.

16Kuyakuq kanapaq Jesucristo noqantsik rayku wañunqanta tantiyakushun.#Juan 15.13. Noqantsikpis kuyakuq karqa runa majintsik rayku wañunapaqpis listum kaykäshun. 17Imantsikpis kaykaptin runa majintsik muchuychö kaykaqta mana yanaparqa manam Dios Yaya kuyakuq kanqannötsu kuyakuq kantsik.

18Kuyay wamräkuna, janan shonqullaqa ama kuyanakushuntsu, sinöqa imaypis yanapanakur rasunpa kuyanakushun. 19Tsaynö kuyanakurmi musyantsik Dios Yayapa willakuyninta rasunpa chaskikunqantsikta y jutsantsikpita perdonamanqantsikta. 20Mana perdonamanqantsikta yarpashqapis paymi jutsantsikpita llakikunqantsikta musyar perdonamantsik.

21Kuyashqa wawqikuna y panikuna, perdonashqa kanqantsikta musyaykarqa mana mantsapaypa Dios Yayata mañakushun. 22Mandamientunkunata cäsur pay munanqannö kawarmi ima mañakunqantsiktapis chaskishun.

23Dios Yayapa mandamientunmi nin Tsurin Jesucristuman creyikunapaq y juknin jukninwanpis kuyanakunapaq.#Juan 13.34; 15.12, 17. 24Mandamientunkunata cumplirmi paywan kaykantsik y paypis noqantsikwan kaykan. Noqantsikwan pay kanqantam musyantsik kachamunqan Espíritu Santuta chaskishqa kar.

Currently Selected:

1 Juan 3: qxn

Highlight

Copy