ZEKALIYA 12
12
Omu navakawahisa ceka Yelusalema
1Eci cikiko citeli calizu lyaYehova hali Isalele. Yehova, Ou mwakanyika lilu nakwala cihela camavu, Ou eji kutengelanga Xipilitu yamutu mutulo yenyi, ngwenyi,
2Tala, nangukalingisa Yelusalema kupwa lupasa lwakutelwomwesa kuli vatu veka naveka vosena vaze vanalijingilika. Nacikapwa nahali Yuta nawa hakuhaka Yelusalema mucingombela.
3Kaha nacikasoloka halikumbi lize, nangukalingisa Yelusalema kupwa lilolwa lyakulemuwisa vatu veka naveka vosena. Vexovo navakalitwikayo navakalilemejeka, kaha #14.2.vakamafuci ahamavu osena navakalikungulukila.
4Yehova ngwenyi, Halikumbi lize nangukaveta tuvalu vosena nakuvatuzwisa nawoma, navaka-kutambucaho nawa nakuvazalukisa. Kaha nangukatona kumeso ami nakutala zuvo yaYuta, nakuveta tuvalu twavatu veka naveka vosena naupuputa.
5Vamyata javaYuta navakalyamba mumicima yavo ngwavo, Ava vatwama muYelusalema vanapu ngolo jetu muli Kalunga kavo Yehova wamayongomena.
6Halikumbi lize nangukalingisa vamyata javaYuta kupwa nge mbaxiya yakakahya muvitondo, nge soka yakakahya mumikuta yakulya camanona. Navakavalya vatu veka naveka vosena jingulwixi ndo, nakulivoko lyacilyo nakulivoko lyacimoswe. Kaha vaze vakuYelusalema naveza kutwama ceka muma lyavo muYelusalema.
7Yehova mwakalwila jimbalaka javaYuta hakulivanga, kucina navakatohwesa upahu wazuvo yaNdavici naupahu wavava vatwama muYelusalema kuhambakana vaYuta.
8Halikumbi lize Yehova mwakavakingava vatwama muYelusalema, kahou mwakatalyangila muli vakivo halikumbi lize mwakapwanga nge Ndavici, vakuzuvo yaNdavici navakapwanga nge Kalunga, nge #Kulo. 14.19; 33.2.kangelo kaYehova ali kumeso avo.
9Kaha nacikasoloka halikumbi lize, #1.21; 14.2, 3.nangukasaka ngwenyeke vaka-mafuci vosena vaze navakeza nakulwa naYelusalema.
10Jino vakuzuvo yaNdavici navaze navakatwama kuYelusalema #Isa. 44.3; Ezeke. 39.29; Yowe. 2.28, 29.nangukavahingunwina Xipilitu yalikoji yakulembelela, kaha navakatala kuli Ami #Yowa. 19.37; Kuso. 1.7.vatuvasanyine, navakamulilila nganomu mwalila mutu mwanenyi umwe kaha lyamunwe, navakamwivwila kusasa nganomu mwevwila mutu mwanenyi watwatwa kusasa.
11Halikumbi lize muYelusalema namukapwa #Mateu 24.30.kulila cacinene, nge kulila caHatate-limone mucinema caMengitone.
12Lifuci nalikalila, cisaka nahaco cisaka nahaco, cisaka cazuvo yaNdavici nahaco namapwevo javo nawa nahavo, cisaka cazuvo yaNatane nahaco namapwevo javo nawa nahavo,
13cisaka cazuvo yaLevi nahaco namapwevo javo nawa nahavo, cisaka cavaXimei nahaco namapwevo javo nawa nahavo,
14visaka vyosena vize navikasalaho, cisaka hicisaka nahaco namapwevo javo nawa nahavo.
Currently Selected:
ZEKALIYA 12: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
