KUPUTUKA 41
41
Yosefwe mwalumbununa kulota caFwalo
1Kaha casolokele, omu mwahicile myaka yivali lukombo, Fwalo alotele, kaha tala, nemana kukalwiji.
2Kaha tala, mukalwiji mwakandukile vangombe vatanu navavali, vamwaza vakununa, valile mwila wakucikulo.
3Kaha tala, munyima yavo mukalwiji mwakandukile vangombe vatanu navavali, vakivo vakuhokama vavapi. Vemanyine navangombe vakwavo hamwe kungenge yakalwiji.
4Kaha vaze vangombe vakuhokama vavapi valile vaze vangombe vamwaza vakununa vatanu navavali. Ngoco Fwalo atonene.
5Asavalile ceka tulo, alotele kamucivali. Kaha tala, mitwe yatiliku yitanu nayivali yasokele kucisaci cimwe, yikiko yakununa yamwaza.
6Kaha tala, munyima yayo mwasokele mitwe yakuhokama yakuzuza napeho yakumusamuko yitanu nayivali.
7Mitwe yize yakuhokama yitanu nayivali yaminyine mitwe yize yakununa yayinene yitanu nayivali. Ngoco Fwalo atonene, kaha kumana, naloto.
8Kaha casolokele nacimene alinyengele muxipilitu yenyi. Atumine nakusanyika vanganga vamuEjipitu vosena navaka-mangana vaze vapwilemo vosena. Fwalo avambulilile kulota cenyi, oloze kakwapwile cipwe umwe ahaxile kucilumbununa kuli Fwaloko.
9Kwivwa, mukulwane wavaka-kuhana lupasa ambile kuli Fwalo ngwenyi, Lelo ngunanuka mulonga wami.
10Fwalo atusangumukililetu vangamba jenyi, kaha angusokelele mwakunguiamina muzuvo yacitapanga wamukulwane, nayami namukulwane wavaka-kwoca jimbolo.
11Twalotele naufuku woumwe, nayami naikiye. Twalotele mutu himutu nge mwalumbunukila kulota cenyi.
12Muze mwapwile mwanalunga nayetu hamwe, kaHepeleu, ndungo yacitapanga wamukulwane. Twamulwezele, kaha atulumbunwinyine kulota cetu. Amulumbunwinyine mutu himutu nge mwayile kulota cenyi.
13Kaha casolokele, nge muze atulumbunwinyineco, mukiko mwapwile, ami anguhanyine ceka milimo yami, oloze uze amusukikile.
14Jino Fwalo atumine mutu nakusanyika Yosefwe, kaha Vamulowele mukamenga lufuxi. Atewile wevu wenyi, avwalile mahineka, kahengilile muli Fwalo.
15Fwalo ambile kuli Yosefwe ngwenyi, Ngunaloto, kaha kakwexi mutu nahase kungulumbunwinacoko. Oloze ngunevu ngwavo, ove hakwivwa kulota nauhasa kucilumbununa.
16Yosefwe amukumbulwile Fwalo ngwenyi, Kacexi kuli amiko. Kalunga Ikiye mwakukumbululove Fwalo nakeke.
17Fwalo amwambulilile Yosefwe ngwenyi, Hakulota cami, tala, ngwemananga kungenge yakalwiji.
18Kaha tala, mukalwiji mwakandukanga vangombe vakununa vamwaza vatanu navavali, valyanga mwila kucikulo.
19Kaha tala, munyima yavo mwakandukanga vangombe veka vatanu navavali, vakivo vakuzeya vavapi vakuhokama, kanda ngumone lyehi vangombe vavapi ngacize mulifuci lyaEjipitu lyosena.
20Vaze vangombe vakuhokama vavapi valyanga vaze vangombe vakulivanga vakununa vatanu navavali.
21Kahomu valinganga hivanavali lyehi, mutu kaci katacikijileko ngwenyi, vanavali, oloze hanga vanapihila nge hakuputuka. Ngoco ngwatonanga.
22Hakulota ceka ngwamonanga, kaha tala, mitwe yitanu nayivali yasokanga kucisaci cimwe, yikiko vamwaza yayinene.
23Kaha munyima yayo mwasokanga mitwe yeka yitanu nayivali, yakuminyina, yakuhokama, yakuzuza napeho yakumusamuko.
24Mitwe yize yakuhokama yaminanga mitwe yize yamwaza yitanu nayivali. Ngwacambululanga kuli vanganga, oloze kakwapwanga cipwe umwe ahasanga kungulumbunwinacoko.
25Yosefwe ambile kuli Fwalo ngwenyi, Kulota caFwalo cinayi mumwe. Kalunga namulweze Fwalo eci mwasaka kulinga.
26Vaze vangombe vamwaza vatanu navavali vanapu myaka yitanu nayivali. Nayize mitwe yamwaza yitanu nayivali yinapu myaka yitanu nayivali. Kulota cinayi mumwe.
27Kaha vangombe vakuhokama vavapi vatanu navavali vaze vakandukanga munyima yavo vanapu myaka yitanu nayivali. Nayize mitwe yakuzuza napeho yakumusamuko yitanu nayivali nawa nayikapwa myaka yazala yakalombolombo yitanu nayivali.
28Mwomwo vene ngunambe kuli Fwalo ngwami, Eci mwasaka Kalunga kulinga namulwezeco Fwalo.
29Tala, nakwiza myaka yakulya cakulisala cikuma yitanu nayivali mulifuci lyaEjipitu lyosena.
30Munyima yayo namukeza myaka yazala yakalombolombo yitanu nayivali, kaha kulya cakulisala cosena cize navakacivulyama mulifuci lyaEjipitu. Zala yakalombolombo yize nayikenyeka lifuci.
31Kulya cakulisala cize kavexi kukacitacikiza ceka mulifuci hazala yakalombolombo yize nayikezako, mwomwo nayikatohwa cikuma.
32Hakumulotesa Fwalo kavali, mwomwo cuma kana vanacizamisa kuli Kalunga, kaha Kalunga linwomu mwacisolola.
33Xikaho jino, Fwalo atalatale lunga wakunangakana wamangana, amulingise kupwa mwata walifuci lyaEjipitu.
34Fwalo alinge ngoco, akatongole vamyata jalifuci, kaha hamyaka yakulya cakulisala yize yitanu nayivali akatambule cimbwa cimwe cakusokesa muvimbwa vitanu vyamulifuci lyaEjipitu.
35Vakakungulule kulya camyaka yamwaza yize nayikeza cosena, vakamuswekele Fwalo tiliku yakulya mumembo, vakayilamenga.
36Kaha kulya cize nacikapwa cakuvaswekela vaka-lifuci nakumyaka yazala yakalombolombo yitanu nayivali yize nayikeza mulifuci lyaEjipitu, kucina vaka-lifuci navakanonga nazala yakalombolombo.
Yosefwe navamulingisa kupwa mwata waEjipitu
37Cuma cize cawahile kumeso aFwalo nakumeso avangamba jenyi vosena.
38Fwalo ambile kuli vangamba jenyi ngwenyi, Natuhasa numba, kuwana weka nge ou, mutu mwatwama Xipilitu yaKalunga?
39Fwalo ambile kuli Yosefwe ngwenyi, Mwomwo Kalunga nakulweze vyosenevi, xikaho kakwexi weka wakunangakana wamangana nge oveko.
40 #
Samu 105.21, 22; Vili. 7.10. Ove upwenga umwata wazuvo yami, vatu jami vosena navavayulanga nge omu mwaya lizu lyove. Kulitanda lyawangana kaha nangukuhambakanove.
41Fwalo ambile kuli Yosefwe ngwenyi, Tala, ngunakulingisa kupwa umwata mulifuci lyaEjipitu lyosena.
42Fwalo azulile kazekeso kenyi kulivoko lyenyi, akahakile kulivoko lyaYosefwe, amuvwikile mahina alinyu lyamwaza, nakumuvwika lilenge lyaulu muxingo yenyi.
43Amunyinyixile halitemba lyenyi lyamucivali atambukilenga, kaha vatambakanyine kulutwe lwenyi ngwavo, Mufukaminenu. Amulingixile kupwa mwata wamulifuci lyaEjipitu lyosena.
44Fwalo ambile kuli Yosefwe ngwenyi, Ami yami Fwalo. Kakwexi mutu cipwe umwe mulifuci lyaEjipitu lyosena lino mwakazundula cipwe livoko lyenyi cipwe lihinji lyenyi cakuzenekoveko.
45Fwalo amulukile Yosefwe ngwenyi, #41.45:Nge ngwenyi, Muka-kulwila vaka-mavu. Mokomoko ngwenyi, Muka-kulumbununevi vyakusweka.Zafwenate-paneya. Kaha amuhanyine Asenate, mwanaPotefwela kapilixitu wakuOne kupwa pwevo lyenyi. Kaha Yosefwe alovokele, ahitanganyine mulifuci lyaEjipitu lyosena.
46Yosefwe apwile namyaka makumi atatu haze emanyine kumeso aFwalo mwangana waEjipitu. Yosefwe alovokele kumeso aFwalo, ahitanganyine mulifuci lyaEjipitu lyosena.
47Kaha kumyaka yakulya cakulisala yize yitanu nayivali hamavu hasokele kulya mikamo namikamo.
48Akungulwile kulya cosena camyaka yitanu nayivali yize yahicile mulifuci lyaEjipitu, aswekele kulya cize mumembo. Kulya camumawande akujingilika limbo hilimbo aciswekele mwimbo lize.
49Yosefwe akungulwile tiliku nge musekulula wakukalungalwiji, yayivulu cikuma, palanga nomu alitwaminyine kuyilava, mwomwo kavahaxile kuyilavako.
50Kuli Yosefwe kwasemukile vana vamalunga vavali ximbu wapwile mwaka wazala yakalombolombo kanda wize, vaze asemene naAsenate mwanaPotefwela kapilixitu wakuOne.
51Mwanenyi watwatwa Yosefwe amulukile ngwenyi, #41.51:Nge ngwenyi, Kuvulyamisa.Manase, ambile ngwenyi, Mwomwo Kalunga nanguvulyamisa kukilikita cami cosena nazuvo yatata yosena, xikaho.
52Mwanenyi wamucivali amulukile ngwenyi, #41.52:Nge ngwenyi, Kusemunwina.Efwalime, ambile ngwenyi, Mwomwo Kalunga nanguhane lusemo mulifuci lyaluyando lwami, xikaho.
53Myaka yakulya cakulisala yize yitanu nayivali, yize yahicile mulifuci lyaEjipitu, yahwile.
54Kaha myaka yazala yakalombolombo yize yitanu nayivali yaputukile, nge muze ambile Yosefwe. Kumafuci osena #Vili. 7.11.lwapwile zala yakalombolombo, Oloze kulifuci lyaEjipitu lyosena kwapwile kulya.
55Kahomu yapwile zala mulifuci lyaEjipitu lyosena, vatu vatetele kuli Fwalo, ngwavo, Tuhane kulya. Fwalo ambile kuli vaEjipitu ngwenyi, Yenu kuli Yosefwe. Mwexomwo mwakamilweza kalingenungamo.
56Zala yakalombolombo yize yapwile kwilu lyamavu kwosena. Kaha Yosefwe asokolwele mujizuvo jakusweka kulya josena, avalanjixile vaEjipitu.
57Zala yakalombolombo yize yatohwele mulifuci lyaEjipitu. Kaha vaka-mafuci osena vejilenga muEjipitu kuli Yosefwe nakulandalanda tiliku, mwomwo zala yakalombolombo yize yatohwele kumafuci osena, xikaho.
Currently Selected:
KUPUTUKA 41: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.